ސަރުކާރު އެކުލަވާލަން ޖޭޕީ ވަރެއް ނެތަސް ކޯލިޝަންގައި މެންބަރުންގެ ދައުރެއް އޮންނަކަމަށް ނުވާ ކަމަށް ޖޭޕީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
ޖޭޕީގެ ގައުމީ ކޮންފަރެންސް ހުޅުވައިދެއްވާ ވާހަކަ ދައްކަވަމުން ގާސިމް ވިދާޅުވީ، ޖުމްހޫރީ ޕާޓީ ސީދާ ވެރިކަމަށް ނާދެވި، ޕާޓީގެ ތަސައްވުރުތައް ގުޅާލަން ޖެހެނީ އެފަހަރަކު ޖުމްހޫރީ ޕާޓީއާ ކޯލިޝަން ހަދާ ފުރަތަމަ ބުރުން އެއްވަނަ ދެވަނަ ޕާޓީގެ ތެރެއިން ކޮންމެސް އެއްބަޔަކާ ކަމަށެވެ.
ޖޭޕީއާއެކު ކޯލިޝަން ނެހެދިނަމަ އެޕާޓީތަކުގެ ސަރުކާރުތަކެއް ވުޖޫދެއް ނުވާނެކަން ވިދާޅުވަމުން ފާއިތުވި އަދި ހިނގަމުން މިދާ ސަރުކާރުތަކުން ކޮށްފައިވާ ރަނގަޅުކަންކަމުގެ ހިއްސާ ޖުމްހޫރީ ޕާޓީއަށް ވެސް ނިސްބަތްވާނެ ކަމަށް ގާސިމް ވިދާޅުވިއެވެ.
ނަމަވެސް ހިތާމައަކީ ސަރުކާރު އެކުލަވާލުމަށް ފަހު ސަރުކާރުން ހާސިލްކުރާ ރަނގަޅު ކަންކަން ޖުމްހޫރީ ޕާޓީއަށް ނިސްބަތް ކުރުމަށް ބައެއް ފަރާތްތަކުން ޖެހިލުންވާތީ ކަމަށް ގާސިމް ވިދާޅުވިއެވެ.
ސިޔާސީ ކަންކަމުގައި އުޅޭއިރު ގޮށްރާޅުތަކާ ކުރިމަތިލާން ޖެހޭނެކަން ފާހަގަ ކުރައްވާ، ގާސިމް ވިދާޅުވީ އެމަނިކުފާނުގެ ސިޔާސީ ހަޔާތުގައި ވެސް ގޮށްރާޅުތަކާއި ގަދަފަދަ ކޮޅިގަނޑުތަކާ ކުރިމަތިލާން ޖެހިވަޑައިގެންނެވި ކަމަށެވެ.
ގާސިމް އިތުރަށް ވިދާޅުވީ، ވެރިއަކީ ރައްޔިތުންގެ ކަންބޮޑުވުންތަކާއި، އިހްސާސްތައް ދަންނަ ބަޔަކަށް ވާންޖެހޭނެ ކަމަށާއި މިދަފަ ވެރިއަކަށް ނޫނީ ދިވެހިންނަށް ހިދުމަތެއް ކޮށެއް ނުދެވޭނެ ކަމަށެވެ.
ޖޭޕީއަކީ ފުރުސަތުން ފުރިގެންވާ ޕާޓީއެއްކަން ފާހަގަކުރައްވާ ގާސިމް ވިދާޅުވީ، އެހެން ޕާޓީތަކުގައި ތިބެ އަންނަ ފަރާތްތަކަށް ވެސް ޖޭޕީން ފުރުސަތު ދޭނެ ކަމަށެވެ. އަދި ޒުވާނުންނާއި، ކަނބަލުންނަށް ވެސް އެހެން އެެއްވެސް ޕާޓީއެއްގައި ނެތް ވަރަށް ޖޭޕީގައި ފުރުސަތު އޮންނާނެ ކަމަށެވެ.
ގާސިމް ވަނީ އިސްލާހަށް ޓަކައި ތެދުވަން ޖެހޭ ކޮންމެ ވަގުތަކު ޖޭޕީގެ ފަހުލަވާނުން ތެދުވާނެ ކަމަށާއި އެފަދަ ކޮންމެ ވަގުތެއްގައި ޖަހާނީ އިސްލާހުގެ ވިންދު ކަމަށެވެ.
ޖޭޕީގެ ހަތަރުވަނަ ގައުމީ ކޮންފަރެންސް މިއަދު ފަށާފައި ވާއިރު މި ކޮންފަރެންސްގައި އެޕާޓީގެ އެތެރޭގެ އިންތިހާބުތަކުގެ އިތުރުން، 2023 ވަނަ އަހަރުގެ ރިޔާސީ އިންތިހާބާ ގުޅޭ ނިމުންތައް ނިންމާނެއެވެ.
މިގޮތުން އެ ޕާޓީގެ ލީޑަރު، ޕާޓީގެ ޑެޕިއުޓީ ލީޑަރުން، ޒުވާނުންގެ ލީގުގެ ރައީސް، ޒުވާނުންގެ ލީގުގެ ނައިބު ރައީސް، ޒުވާނުންގެ ލީގުގެ ސެކްރެޓަރީ، ޒުވާނުންގެ ލީގުގެ މެންބަރުން، އަންހެނުންގެ ލީގުގެ ރައީސް، އަންހެނުންގެ ލީގުގެ ނައިބު ރައީސް، އަންހެނުންގެ ލީގުގެ ސެކްރެޓަރީގެ އިތުރުން އަންހެނުންގެ ލީގުގެ މެންބަރުން، އަދި ގައުމީ ކޮންފަރެންސްއިން އިންތިހާބުކުރާ 25 މެންބަރުން އިންތިހާބު ކުރުމަށް ވަނީ ހަމަޖެހިފައެވެ.
މީގެ އިތުރުން، އަސާސީ ގަވާއިދަށް ގެންނަން ޕާޓީގެ ކައުންސިލުން އެންޑޯޒްކޮށްފައިވާ އިސްލާހުތަކަށް ބަހުސްކޮށް ގޮތެއް ނިންމުންވެސް މި ކޮންފަރެސްގައި އޮންނާނެއެވެ. އަދި އަސާސީ ގަވާއިދުގެ ދަށުން ޕާޓީގެ ލީޑަރު އައްޔަން ކުރައްވަން ޖެހޭ މަގާމުތަކަށް ބޭފުޅުން އައްޔަން ކުރުން ވެސް އޮންނާނެއެވެ.
މިސަރުކާރުގެ މިނިސްޓްރީ ތަކުން ފެއިލް ވެފައިވާ މިނިސްޓްރީ އަކީ ޓްރާންސްޕޯރޓް މިނިސްޓްރީ އިތުރު ވާހަކަ ދެއްކުމުގެ ބޭނުމެއް ނެތް.