މޯލްޑިވްސް ބްރޯޑްކާސްޓިން ކޮމިޝަންގެ މެންބަރު އަމްޖަދު ވަހީދުގެ މެންބަރު ކަމުގެ މުއްދަތު އަންނަ މަހަށް ހަމަވާތީ، ރައީސް އިބްރާހިމް މުހައްމަދު ސޯލިހު ހަތަރު ނަމެއް ރައްޔިތުންގެ މަޖިލީހަށް ފޮނުއްވައިފިއެވެ.
މަޖިލިހުގެ މިއަދުގެ ޖަލްސާ އަށް އިއްވި ރައީސްގެ ސިޓީފުޅުގައި ވިދާޅުވީ، ބްރޯޑްކޮމްގެ މެންބަރު އަމްޖަދުގެ މެންބަރު ކަން އަންނަ މަހުގެ 15 ވަނަ ދުވަހަށް ހަމަވާ ކަމަށާއި އެ މަގާމަށް ކުރިމަތިލުމަށް އާންމުކޮށް ހުޅުވައިލުމުން ކުރިމަތިލި މީހުންގެ ނަންތައް ފޮނުއްވީ ކަމަށެވެ.
ބްރޯޑްކޮމަށް އައްޔަން ކުރަން ރައީސް ފޮނުއްވި ނަންތައް:
- ޝިހާމް މުހައްމަދު ވަހީދު، ދަފްތަރު 5143
- ޝާން ސޯލިހު މުހައްމަދު، ފިނިވާދީ، ދ. ކުޑަހުވަދޫ
- ހުސައިން އަމްރު، ވ. ރޯޝަން
- ސަފާ ޝަފީގް، ބިއްލޫރިވިލާ، ދ. މީދޫ
ރިޔާސަތުގައި އިންނެވި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ ރައީސް ފޮނުއްވި ނަންތައް ދިރާސާ ކުރުމަށް މިނިވަން މުއައްސަސާތަކާ ބެހޭ ކޮމީޓީއަށް ފޮނުވަން ނިންމަވައިފައެވެ.
ބްރޯޑްކޮމުގެ މެންބަރުގެ މަގާމެއް ހުސްވީ ހަތް މެންބަރުންގެ މައްޗަށް އެކުލެވޭ ބްރޯޑްކޮމްގެ މެންބަރުކަމުގެ މަގާމުގައި ހުންނެވި އަހުމަދު ގައިސް މަގާމުން އިސްތިއުފާ ދެއްވުމާ ގުޅިގެންނެވެ. ގައިސް އިސްތިއުފާ ދެއްވުމާ ގުޅިގެން، ބްރޯޑްކޮމްގައި މިހާރު ތިއްބަވަނީ ހަ މެންބަރުންނެވެ. އެއީ އެ ކޮމިޝަންގެ ރައީސް މަރިޔަމް ވަހީދާ އާއި، މެންބަރުން ކަމަށްވާ އަލީ ޔޫސުފާއި އަމްޖަދު ވަހީދާއި މުހައްމަދު ފަޒީންގެ އިތުރުން، އައިމިނަތު އަނާ އާއި ޝިފްލާ އިބްރާހީމެވެ.
