ނަފްސާނީ ބަލިމަޑުކަމާ ބެހޭ މައުޟޫއު ބޭނުންކޮށްގެން ފުރައްސާރަކުރުން ފަދަ ކަންކަން ނުކުރުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު، މެންބަރުންގެ އަރިހުން އެދިވަޑައިގެންފިއެވެ.
ތިމަރަފުށި ދާއިރާގެ މެންބަރު އަބްދުﷲ ރިޔާޒް ހުށަހެޅުއްވި، ނަފްސާނީ ސިއްހަތާ ގުޅޭ ހިދުމަތްތަކާ ބެހޭ ވަށާޖެހޭ ސިޔާސަތުތަކެއްގެ ތެރެއިން މި ހިދުމަތްތައް ލިބޭނެ ނިޒާމެއް ރާއްޖޭގައި ގާއިމްކުރުމަށް ގޮވާލާ ހުށަހެޅުއްވި ކުއްލި މައްސަލަ އަށް ބަހުސްކުރެއްވި ބައެއް މެންބަރުން މިއަދު ވެސް ވަނީ މައުޟޫން ބޭރުން ވާހަކަ ދައްކަވައި، ނަފްސާނީ ބަލިމަޑުކަން ސިޔާސީ ކުރައްވާފައެވެ.
ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒު، ދައުލަތުގެ އޮފީސްތަކުގެ އިދާރާތައް ހިންގުމަށް އާންމުންގެ އިމާރާތްތަކަށް ގިނަ އަދަދަކަށް ކުލި ދައްކަން ޖެހޭ މައްސަލަ އަށް އަވަސް ހައްލެއް ހޯދުމަށް ހުށަހަޅާ ގަރާރުގެ ބަހުސަށް ފަހު، ދެން ކުރިއަށް ގެންގޮސްފައި ވަނީ ރިޔާޒް ހުށަހެޅުއްވި ކުއްލި މައްސަލަ އަށް ބަހުސްކުރުމެވެ.
އެ މައްސަލަ އަށް ބަހުސްކުރައްވަމުން، ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ސިފަކުރެއްވީ ދިވެހިން ނަފްސާނީ ވަނީ ރާއްޖޭގެ ރައީސް އިބްރާހީމް މުހައްމަދު ސޯލިހު ކަންކުރައްވާ ގޮތުން ވިސްނާތީ ކަމަށެވެ.
އެ މައްސަލަ އަށް ދެން ބަހުސްކުރެއްވި ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ (މޮސްޓާ) ވަނީ ނަފްސާނީ ބަލިމަޑުކަމާއި، އެމްޑީޕީގެ ޕްރައިމަރީ އާ ގުޅުވާ ވާހަކަ ދައްކަވައިފައެވެ.
"ހާލަތާ ވަގުތާ ގުޅޭ ގޮތުން ވަރަށް ރަނގަޅު ގަރާރެއް ކަމަށް އަޅުގަނޑަށް ފާހަގަކުރެވޭ، މުޅި ގައުމު ނަފްސާނީ ވެފަކަމަށް ރައްޔިތުން އަދި މަޖިލިސް މެންބަރުންތައް ވެސް ނަފްސާނީ ވެފަ އޮތްތަން މި ފެންނަނީ، 2023 ވަނަ އަހަރުގެ ޖެނުއަރީ 28 ވަނަ ދުވަހު ލީ ވޯޓެއްގެ ސަބަބުން،" މޮސްޓާ ވިދާޅުވިއެވެ.
އެއަށްފަހު އެ ގަރާރަށް ބަހުސްކުރައްވަން ހެންވޭރު ދެކުނު ދާއިރާގެ މެންބަރު ހުސައިން ޝަހީމް ފެއްޓެވުމުން ނަޝީދު، ހުސައިންގެ ވާހަކަ ހުއްޓުވައި ވިދާޅުވީ، ހުށަހެޅިފައިވާ މައްސަލައަކީ ހައްސާސް މައްސަލައަކާ ގުޅިގެން ހުށަހެޅިފައިވާ މައްސަލައެއް ކަމަށެވެ.
"އަޅުގަނޑުމެން މި މަޖިލީހުގައި އެ މައުޟޫއު (ނަފްސާނީ ބަލިމަޑުކަން) ބޭނުންކުރައްވައިގެން އެކިއެކި ގޮތްގޮތަށް މަލާމާތްކުރުމާއި ފުރައްސާރަ ކުރުމާއި ދިމާކުރުމާއި މި ބާވަތުގެ ކަންކަން ކުރުމަކީ އަޅުގަނޑު ދެކޭ ގޮތުގައި މި މަޖިލީހުން ކޮށްގެން ވާނެ ކަމެއް ނޫން،" ނަޝީދު ވިދާޅުވިއެވެ.
އެއާއެކު ނަޝީދު މެންބަރުންގެ އަރިހުން އެދިވަޑައިގަތީ ނަފްސާނީ ބަލިމަޑުކަން ތަހައްމަލުކުރަމުންދާ ރައްޔިތުންނަށް ލުއި ލިބޭނެ ގޮތްތައް ހޯދައި މަޖިލީހުގައި ފާހަގަކޮށްދިނުމަށެވެ.
އެއަށްފަހު، ވާހަކަ ކުރިއަށް ގެންދަވަމުން ހުސައިން ވަނީ ކުރީގެ ރައީސް މައުމޫން އަބްދުލްގައްޔޫމްގެ ސަލާމަތީ ކަންކަން ބެލެހެއްޓުމަށްޓަކައި އެންމެ ބޮޑީގާޑެއް ހުރުމުން، އެކަމާ ނަފްސާނީ ބަލިމަޑުކަމާ ގުޅުވައިފައެވެ.
ހުސައިންގެ ވާހަކަ އެ ހިސާބަށް ދިއުމުން އޭނާގެ ވާހަކަ މެދުކަނޑާލައްވައި، ނަޝީދު ވިދާޅުވީ، ނަފްސާނީ ބަލިމަޑުކަމާއި އެފަދަ ކަންކަމާ ގުޅުވާ ބަހުސްކުރައްވާކަށް ފުރުސަތު ނުދެއްވާނެ ކަމަށެވެ.
"އެބަހުރި ކަންކަން ތިބޭފުޅުންނަށް ގުޅުވައިގެން މަލާމާތްކުރެވެން ހުރި، އަދި ފުރައްސާރަ ވެސް ކުރެވެން ހުރި، އަދި ޒުވާބު ވެސް ދެވެން ހުރި، އެހެންނަމަވެސް މިއީ އެބާވަތުގެ މައްސަލައެއް ކަމަކަށް އަޅުގަނޑު ނުދެކެން، އެ ފުރުސަތެއް އަޅުގަނޑު ނާރުވާނަން،" ނަޝީދު ވިދާޅުވިއެވެ.
