ވީނުވީ ނޭނގި ގެއްލޭ މީހުން އިތުރުވާތީ އެ މީހުން ހޯދުން ހަރުދަނާކުރުމަށް ގޮވާލާ ހުށަހެޅި މައްސަލަ ބޭރުކޮށްލައިފިއެވެ.
އެ މައްސަލަ ހުށަހެޅުއްވީ އިދިކޮޅު ޕީއެންސީގެ ޕީޖީ ލީޑަރު، އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ.
އާދަމް ޝަރީފް ވިދާޅުވީ، ވީނުވީ ނޭނގި ގެއްލޭ މީހުންގެ އަދަދު އިތުރުވެ، އެކަމުގެ ސަބަބުން މުޖުތަމައުގެ މެދުގައި ކަންބޮޑުވުން އިތުރުވެފައިވާ ކަމަށާއި، މިފަދަ މައްސަލަތަކުގައި ސަރުކާރުން ފަރުވާކުޑަކުރާ ކަމުގެ ޝަކުވާ އިތުރުވަމުންދާ ކަމަށެވެ.
މިއަދު ހުށަހެޅި ކުއްލި މައްސަލައިގައި، މިދިޔަ މަހުގެ ފަހުކޮޅު ގެއްލުނު ގެއްލުނު އއ. މަތިވެރި، ހަސަން އަލީ އާއި މި މަހުގެ ހަތަރު ވަނަ ދުވަހުން ފެށިގެން ގެއްލުނު އައްޑޫ މަރަދޫފޭދޫ، ގަސްކަރަ، މުހައްމަދު އާސިރުގެ ވާހަކަ ފާހަގަކުރައްވާ އާދަމް ޝަރީފް ވިދާޅުވީ، އެ ދެ މީހުން ހޯދުމަށް ސަރުކާރުން އެއްވެސް މަސައްކަތެއް ކޮށްފައިވާކަން ގަބޫލުނުކުރެވޭ ކަމަށެވެ،
އެ މައްސަލަ މަޖިލިހުން ބޭރުކޮށްލާފައި ވަނީ ވޯޓުދެއްވި 47 މެންބަރުންގެ ތެރެއިން 29 މެންބަރުންގެ ވޯޓާ އެކުގައެވެ. މައްސަލަ ބަލައިގަންނަން ފެންނަ ކަމަށް ވޯޓު ދެއްވީ 18 މެންބަރުންނެވެ.
އާސިރާ ބެހޭ ގޮތުން ފުލުހުން އެންމެ ފަހުން ހާމަކުރި މައުލޫމާތުގައި ބުނީ، އާސިރު ފެނިފައި ވަނީ މި މަހުގެ ހަތަރުވަނަ ދުވަހުގެރޭ 7:20 ހާއިރު ހުދު ޓެކްސީ އަކަށް އަރާ މަންޒަރު ކަމަށާއި، ޓެކްސީ އެއާޕޯޓަށް ގޮސް މަޑުކުރުމުން ފައިބާ މަންޒަރު ކަމަށެވެ. އާސިރު އެއާޕޯޓަށް ދިޔަ ނަމަވެސް، އެއްވެސް ތަނަކަށް ފުރައިގެން ދިޔަކަން އެނގިފައިނުވާ ކަމަށް ފުލުހުން ބުންޏެވެ.
މަތިވެރިން ގެއްލުނު ހަސަން އަލީގެ ހަބަރެއްނުވާއިރު، އޭނާ ހޯދުމަށްޓަކައި ބޮޑު ސަރަހައްދެއް ވަނީ ބަލާފައެވެ.
