ރައްޔިތުންގެ މަޖިލީހުގެ ނިޒާމު ގެއްލުމާ ގުޅިގެން މަޖިލީހުގެ ޖަލްސާ މެދުކަނޑާލައިފިއެވެ.
ރިޔާސީ ބަޔާން އިއްވުމަށް ރައީސް އިބްރާހީމް މުހައްމަދު ސޯލިހް ފެއްޓެވުމާ އެކު ނައިފަރު ދާއިރާގެ މެންބަރު އަހްމަދު ސިޔާމު އަޑުގަދަ ކުރައްވާފައި ވާއިރު މަޖިލީހުގެ ރިޔާސަތުން ވަނީ ސިޔާމުގެ ނަން އިއްވާފައެވެ.
މީގެ އިތުރުން މަޖިލީހުގެ ރިޔާސަތުން ވަނީ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދުގެ ނަން ވެސް އިއްވާފައެވެ.
މަޖިލީހުގެ ރައީސް މުހައްމަދު ނަޝީދު ވިދާޅުވީ މަޖިލީސް ދެން ކުރިއަށް ގެންދާނީ ނަން އިއްވި މެންބަރުން ޖަލްސާ ކުރާ މާލަމުން ނިކުންނެވުމުން ކަމަށެވެ.
ޖަލްސާ މެދުކަނޑާލުމާ އެކު ރައީސް ސޯލިހް އާއި ނަޝީދު ވަނީ ޖަލްސާ ކުރާ މާލަމުން ނިކުމެވަޑައިގެންފައެވެ.
މަޖިލީހުގެ ޖަލްސާ މެދުކަނޑާލާފައިވާއިރު އިދިިކޮޅުން އަންނަނީ މަޖީދިއްޔާ ސްކޫލު ކައިރީގައި އިހުތިޖާޖުކުރަމުންނެވެ. މި އިއހުތިޖާޖުން މިހާތަނަށް 8 މީހަކު ހައްޔަރުކޮށްފައިވާ ކަމަށް ޕީޕީއެމްއިން ވަނީ ބުނެފައެވެ.
