ޕީޕީއެމްގެ ރިޔާސީ ޓިކެޓު ރައީސް ޔާމީން ނޫން އިތުރު ބޭފުޅަކަށް ނުލިބޭނެ ކަމަށް މާވަށު ދާއިރާގެ މެންބަރު އަދި ޕީއެންސީގެ ނައިބު ރައީސް މުހައްމަދު ސައީދު ވިދާޅުވެއްޖެއެވެ.

އިދިކޮޅުން ކުރިއަށް ގެންދިޔަ "ހޯޕް" ކޮންފަރެންސް ނިންމަން ރޭ އާޓިފިޝަލް ބީޗު ސަރަހައްދުގައި ބޭއްވި "ދުއްޕާން" ޖަލްސާގައި ވާހަކަ ދައްކަވަމުން ސައީދު ވިދާޅުވީ ރައީސް ޔާމީންގެ ތަފާތަކީ އަޑާއި މަންޒަރާއި އޯޑިއޯއާއި ވީޑިއޯ ދިމާވުން ކަމަށާއި އާނއެކޭ ވިދާޅުވެއްޖެނަމަ އެކަން ކުރައްވާނެ ކަމަށާއި ނޫނެކޭ ވިދާޅުވެއްޖެނަމަ އެކަން ނުކުރައްވުން ކަމަށެވެ.

ވެރިކަމަށް ގެންނަން ޔާމީން ނޫން ބޭފުޅެއް ނެތް ކަމަށް ވިދާޅުވެ، ސައީދު ވަނީ މިސަރުކާރު "ދުއްޕާނަކަށް" ވާ ސަބަބު ތަކެއްވެސް ހާމަ ކުރައްވާފައެވެ.

އެގޮތުން ހަނިމާދޫގައި ނެޝަނަލް ޑިފެންސް ފޯސްގެ 45 މީހުން ތިބޭ ކަމަށާއި އޭގެ ތިން ގުނަ އިންޑިއާ ސިފައިން ތިބުމަކީ "ދުއްޕާނަކަށް" ނުވޭތޯ ސުވާލު ކުރައްވާފައެވެ. އަދި ހަނިމާދޫއަށް ބޭނުން ނުވާ ވަރުގެ އަސްކަރީ ބޮޑު ރަންވޭއެއް އަޅަން 135 މިލިއަން ޑޮލަރު އިންޑިއާއިން ދިވެހިންގެ ބޮލުގައި އެޅުވުމާއި އުތުރު ތިލަފަޅުގެ އެއްބަސްވުން ސިއްރުކުރުމަކީ ދުއްޕާނެއް ނޫންތޯ ސައީދު އެއްސެވިއެވެ. އަދި ރައީސް އޮފީހުގައި ހުރީ "ބޮޑު ޅޮހެއް" ކަމަަށް ވިދާޅުވެ، ރައީސް އިބްރާހިމް މުހައްމަދު ސޯލުހަށް ނިސްބަތް ވާ ގޮތަށް "ދުއްޕާނެއް" ކަމަށް ވިދާޅުވިއެވެ.

ރާއްޖޭގެ ކަނޑުގެ އަޑި ކުރަހަން ހައިޑްރޮގްރަފީގެ ނަމުގައި މި ސަރުކާރުން އިންޑިއާއަށް ހަވާލުކޮށްފައިވާ ކަމަށާއި އެއީ ވެސް ދުއްޕާނެއް ކަމަށާއި ތިލަފުށިން 1700 ރުފިޔާއަށް އަކަފޫޓެއްގެ މަގުން ވިއްކަމުން ދިއުމަކީ ވެސް ދުއްޕާނެއް ކަމަށް ސައީދު ވިދާޅުވިއެވެ.

ސޮވެރިން ޑިވަލޮޕްމަންޑް ފަންޑު ހުޅުވާ އެ ފަންޑުގައި 250 މިލިއަން ޑޮލަރު ބަހައްޓަވާފައި އަދި އެ ފަންޑުން އިންޓްރެސްޓް ބޮޑުވާ ބޭރުގެ އެކި ފަންޑްތަކުގައި އިންވެސްޓް ކޮށްފައި ވަނިކޮށް މިއަދު އެ ފަންޑުގައި ލާރި ނެތް ކަމަށް ސައީދު ވިދާޅުވިއެވެ. އަދި ރައީސް ސޯލިހަށް ސަރުކާރު ހިންގަން އެނގިވަޑައިނުގަތުމުގެ އަދަބެއްގެ ގޮތުގައި ޖީއެސްޓީ ބޮޑުކޮށް ދިވެހި ރައްޔިތުންނަށް ތަހުލީފު ޖައްސާފައިވާ ކަމަށް ސައީދު ވަނީ ވިދާޅުވެފައެވެ.

ހަބަރު އަބްދުﷲ ޔާމީން މުހައްމަދު ސައީދު ޕީޕީއެމް