އެމްޑީޕީ ޕްރައިމަރީގެ އިންތިހާބުގައި ލ. މުންޑޫގައި 9:00 ޖެހުމުގެ ކުރިން ވޯޓު ލުން ފެށި މައްސަލައެއް ފެންމަތިވެއްޖެއެވެ.
ޕްރައިމަރީގެ ވޯޓުލުން އޮންނާނީ މިއަދު ހެނދުނު 9:00 އިން ފެށިގެން ހަވީރު 5:00 އަށެވެ. ނަމަވެސް މަޖިލިހުގެ ހެންވޭރު ހުޅަނގު ދާއިރާގެ މެންބަރު، ހަސަން ލަތީފު ކުރެއްވި ޓްވީޓެއްގައި ވިދާޅުވީ މުންޑޫގައި ހެނދުނު 9:00 ޖެހުމުގެ ކުރިން ނަޝީދުގެ މަމްދޫބުން ނެތި ވޯޓުލާން ފެށި ކަމަށެވެ.
މުންޑޫގައި 9 ޖެހުމުގެ ކުރިން މަންދޫބުން ނެތިސް ވޯޓުލި މައްސަލަ ފެންމަތިވެފައި ވާއިރު ރ. އަތޮޅުގެ ތިން ދާއިރާގެ ވޯޓު އެއް ފޮއްޓަކަށް އަޅާ މައްސަލައެއް ވަނީ ފެންމަތިވެފައެވެ. މިގޮތުން ރ. އތޮޅުގެ އަލިފުށި، އުނގޫފާރު އަދި ދުވާފަރު ދާއިރާގެ ވޯޓުވެސް އަޅަމުން އަންނަނީ އެއް ފޮއްޓަކަށެވެ.
މި ތިން ދާއިރާއެއްގެ ވޯޓު އެއް ފޮއްޓަކަށް އަޅާތީ އެކަމާ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.
މީގެ އިތުރުން ވެސް ގިނަ ޝަކުވާތަކެއް އެކި ފަރާތްތަކުން، ހާއްސަކޮށް ރައީސް ނަޝީދަށް ތާއީދުކުރާ ފަރާތްތަކުން އަންނަނީ ސޯޝަލްމީޑިއާގައި ހިއްސާކުރަމުންނެވެ.
ރިޔާސީ ޕްރައިމަރީގައި މާލެ ސަރަހައްދުގައި ޖުމްލަ 49 ވޯޓުފޮށި ފޮށި ބަހައްޓާފައިވާއިރު މާލެ ސަރަހައްދުގައި ވޯޓުފޮށިތައް ބަހައްޓަނީ ސީއެޗްއެސްސީ އާއި އަމީނިއްޔާ އާއި އެމްއެންޔޫ އާއި އިސްކަންދަރާއި ހިރިޔާ އާއި އިމާދުއްދީނާއި މާފަންނު މަދަރުސާ އާއި ތާޖުއްދީނާއި އިއްޒުއްދީނާއި ރެހެންދި އަދި ކަލާފާން އިތުރަށް މުހިއްދީން ސްކޫލްގަ އެވެ.
އަތޮޅުތެރޭގެ ރަށްތަކުގައި ވެސް ވޯޓު ފޮށި ބަހައްޓަނީ ރަށްރަށުގެ ސްކޫލްތަކުގައެވެ.
މި ޕްރައިމަރީގައި ރައީސް އިބްރާހިމް މުހައްމަދު ސޯލިހު ވޯޓު ލައްވާފައިވާއިރު ރައީސް ނަޝީދު މިއަދު 11 ޖަހާއިރު ވޯޓު ލެއްވުމަށް ވަނީ ހަމަޖެހިފައެވެ.
