ކ. ގުޅިއަށް ދިމާވެފައިވާ ބިމުގެ ދަތިކަން ހައްލުކުރުމަށްޓަކައި އެ ރަށަށް ހިއްކުމުގެ އަމަލީ މަސައްކަތް މި އަހަރު ތެރޭގައި ފަށާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީގެ ޕްރައިމަރީ ކެމްޕޭންގެ ތެރެއިން މިއަދު ގުޅި އަށް ވަޑައިގެން ސަޕޯޓަރުންތަކަކާ ބޭއްވި ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، ގުރައިދު އާއި މާފުށީގެ ބިން ބޮޑުކުރެވި، އެދެރަށުގެ ރައްޔިތުންނަށް ދަތުރު ދެވޭނެ ރަށެއް ވެސް ހިމެނޭހެން ބިން ހިއްކާފައިވާ ކަމަށެވެ.
ކުރިއަށް އޮތީ ގުޅި ކަމަށާއި މިއަހަރުގެ ތެރޭގައި ގުޅި ހިއްކުމުގެ މަސައްކަތް އަމަލީ ގޮތުން ގުޅީގެ ރައްޔިތުންނަށް ފެނިގެންދާނެ ކަމަށް ރައީސް ވިދާޅުވިއެވެ.
ސަރުކާރުން ބިން ހިއްކުމަށްފަހު ހަވާލު ކުރަނީ ކައުންސިލުތަކަށް ކަން ފާހަގަކުރައްވާ ރައީސް ވިދާޅުވީ، އެ ބިން އެންމެ ރަނގަޅު ގޮތުގައި ބޭނުން ކުރެވޭނީ ރައްތިޔުން ބޭނުންވާ ގޮތަށް ކައުންސިލުން ގޮތް ނިންމައިގެން ކަމަށެވެ. އެކަމުގެ ތެރެއަށް ސަރުކާރުން ނުވަންނާނެ ކަމަށް ރައީސް ވިދާޅުވިއެވެ.
ރައީސް އިތުރަށް ވިދާޅުވީ، ގުޅީގައި ފެނާ ނަރުދަމާ އެޅުމުގެ މަސައްކަތް މިހާރު ނިމިފައިވާ ކަމަށެވެ. އަދި އެދާއިރާގައި ހިމެނޭ ގުރައިދޫގައި ކުރިން އަޅާފައިއޮތް ނަރުދަމާގައި މައްސަލަތައް ހުރުމުން މިސަރުކާރުން އެކަން ހައްލު ކުރަމުންދާ ކަމަށް ވެސް ރައީސް ވިދާޅުވިއެވެ.
އެމްޑީޕީން އަބަދުވެސް ވަކާލާތު ކުރަމުން އައީ އެއްވެސް ރަށެއް ބާކީނުކޮށް، ތަފާތު ނުކޮށް ހިދުމަތްތައް ދިނުން ކަމަށް ރައީސް ފާހަގަކުރެއްވިއެވެ. އެކަމަކު އެ ސިޔާސަތު މިއަދު އެމްޑީޕީގެ ބައެއް ބޭފުޅުންނަށް ކަމުނުދިއުމަކީ އެ ޕާޓީން ގެންގުޅުނު އެ ސިޔާސަތު ދޫކޮށްލަން ޖެހޭ ސަބަބެއް ނޫން ކަމަށް ރައީސް ވިދާޅުވިއެވެ.
