ނިޒާމް ބަދަލުކޮށްގެން ވިޔަސް ނުވަތަ ގާނޫނު އަސާސީ ބަދަލު ކޮށްގެން ވިޔަސް ވެރިކަމަށް ވަޑައިގަންނަވަން އުޅުއްވަނީ ކޮން ބޭފުޅެއްކަން އެންމެނަށް ވެސް އެނގޭ ކަމަށް ވިދާޅުވެ، ރައީސް އިބްރާހިމް މުހައްމަދު ސޯލިހް، ރައީސް ނަޝީދަށް ނުސީދާ ރައްދެއް ދެއްވައިފިއެވެ.
ހުޅުމާލޭގައި ރޭ ބޭއްވި އެމަނިކުފާނުގެ ކެމްޕެއިން ޖަލްސާގައި ރައީސް ސޯލިހް މިހެން ވިދާޅުވީ ވެރިކަމަށް އައުމަށްޓަކައި ގާނޫނު އަސާސީއަށް ގެންނަން ޖެހޭ ބަދަލެއް ގެނެސްގެން ވެސް ރައީސް ސޯލިހް 3 ވަނަ ދައުރެއްވެސް ބޭނުންވެވަޑައިގަންނަވާނެ ކަމަށް ރައީސް މުހައްމަދު ނަޝީދު އިއްޔެ ބ ހިތާދޫގައި ވާހަކަފުޅު ދައްކަވަމުން ވިދާޅުވުމުންނެވެ.
ރައީސް ސޯލިހު ވިދާޅުވީ، ނިޒާމު ބަދަލުކޮށްގެން ވެސް ރައީސް ނަޝީދު ބޭނުންފުޅުވަނީ ވެރިކަން ކަމަށާއި އަދި ބޭނުންފުޅުވެގެން އުޅުއްވަނީވެސް ނިޒާމު ބަދަލުކޮށް ބޮޑުވަޒީރުކަން ކުރައްވަން ކަމަށެވެ.
ނަޝީދުގެ ވާހަކަފުޅުގައި އެމަނިކުފާނު ވިދާޅުވީ، 2018 ގައި ރައީސް ސޯލިހު ވެރިކަމަށް ނެރުނީ އޭރު ހުރިހާ ސިޔާސީ ލީޑަރުން ބަންދު ކޮށްފައި ތިބުމުން ކަމަށާއި 18 މަސްދުވަހަށް ކަމަށެވެ. އަދި އެވާހަކަ އެމްޑީޕެ މެނިފެސްޓޯގައި އޮންނާނެ ކަމަށްވެސް ނަޝީދު ވިދާޅުވިއެވެ.
ރައީސް ނަޝީދު އެ އިޝާރާތް ކުރައްވާ މެނިފެސްޓޯ އާއި ރައީސް ސޯލިހު އިޝާރާތް ކުރައްވާ މެނިފެސްޓޯ ތަފާތެވެ. ރައީސް ސޯލިހު ވިދާޅުވެފައި ވަނީ، އެމްޑީޕީގެ މެނިފެސްޓޯއަކީ ރިޔާސީ އިންތިހާބަށް ކޯލިޝަން ހެދުމުގެ ކުރިން އޮތް ޕާޓީގެ އިދާރީ އެއްޗެއް ކަމަށާއި މިހާރު ވެރިކަން ކުރައްވަނީ ކޯލިޝަން މެނިފެސްޓޯއާ އެއްގޮތަށް ކަމަށެވެ. އަދި އެ މެނިފެސްޓޯގައި ދައުރުގެ މެދުތެރެއިން ވޯޓެއް ނަގާ ވާހަކަ ނޯންނާނެ ކަމަށާއި، އަދި ނިޒާމު ބަދަލު ކުރާ ވާހަކަވެސް ނޯންނާނެ ކަމަށެވެ.
ރައީސް ސޯލިހު ވިދާޅުވީ އެމަނިކުފާނަށް ވެރިކަމަށް ވަޑައިގެންނެވުނީ މާތްﷲގެ އިރާދަފުޅާއެކު އެތައް ބައެއްގެ ތާއީދާއެކު ކަމަށާއި، އެއީ ވަކި މީހަކު ދިން އެއްޗެއް ނޫން ކަމަށެވެ. ރައީސް ސޯލިހު އެހެން ވިދާޅުވީ، އެމަނިކުފާނަށް ވެރިކަން ދިނީ ވެސް އަދި ވެރިކަން ބަދަލު ކުރާނީ ވެސް ތިމަން މނަިކުފާނު ކަމަށް ވިދާޅުވެ ރައީސް ނަޝީދު ވާހަކަފުޅު ދައްކަވާފައި ވާތީއެވެ.
ރިޔާސީ ވެރިކަމެއްގައި އެމަނިކުފާނު 2 ދައުރަށް ވުރެ އިތުރަކަށް ހުންނަވަން ބޭނުންފުޅު ނުވާކަމަށް ވެސް ރައީސް ވަނީ ވިދާޅުވެފައެވެ.
މި މަހުގެ 28 ވަނަ ދުވަހު އޮންނަ އެމްޑީޕީ ޕްރައިމަރީ އަށް ވަގުތު ކުޑަތަން ވަމުން އަންނަ އިރު ދެ ބޭފުޅުން ވެސް ގެންދަވަނީ ފޯރީގައި ކެމްޕެއިން ކުރައްވަމުންނެވެ. އަދި ދެ ފަރާތުން އަންނަނީ ބަހުގެ ހަަމަލާތައް ވެސް ރައްދުކުރަމުންނެވެ.
ރައީސް ނަޝީދު ވެރިކަމަށް ބަގުޑި ބައްދަނީއޭ ވިދާޅުވާއިރު އިބްރާހީމް ރައީސް އެކުރައްވަނީ ކީއްބާ ވެރިކަމާހެދި ދަންޖެހެނީބާ