އެމްޑީޕީގެ ރިޔާސީ ޕްރައިމަރީގައި ވާދަކުރައްވާ އެމްޑީޕީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ޓެކްސީ ޑްރައިވަރުންނާ ބައްދަލުކުރެއްވުމަށް ނިންމަވައިފިއެވެ.
އެގޮތުން މިރޭ ކާނިވާ ސަރަހައްދުގައި ހުންނަ ޓޭސްޓްމީ ކެފޭގައި 8:30 ގައި އެ ބައްދަލުވުން ބޭއްވުމަށް ވަނީ ނިންމާފައެވެ. އެ ބައްދަލުވުމަށް ޓެކްސީ ޑްރައިވަރުންނަށް ވަނީ ދައުވަތު ދީފައެވެ.
މި މަހުގެ 28 ވަނަ ދުވަހު އެމްޑީޕީ ޕްރައިމަރީ ބޭއްވުމަށް ނިންމާފައިވާއިރު އެ ޕްރައިމަރީގައި ރައީސް ނަޝީދުގެ އިތުރުން ރައީސް އިބްރާހިމް މުހައްމަދު ސޯލިހު ވާދަކުރައްވައެވެ.
ރައީސް ނަޝީދު ވަނީ "ފިކުރެއްގެ ދިރުން" ނަމުގައި ކެމްޕެއިން ހަރަކާތްތައް ފައްޓަވާފައި ހއ، ހދ، ށ އަތޮޅުގެ ބައެއް ރަށްތަކުގެ އިތުރުން ފުވައްމުލަކު ސިޓީއަށްވެސް ވަޑައިގެންފައެވެ. އަދި އިއްޔެ ހިޔާ ސަރަހައްދުގެ ރައްޔިތުންނާ ބައްދަލުކުރައްވާފައިވާއިރު މިއަދު ހެނދުނު އަންނަވަނީ ގަލޮޅު އުތުރުގައި ދޮރުން ދޮރަށް ހަރަކާތް ކުރިއަށް ގެންދަވާ އެމްޑީޕީގެ މެންބަރުންނާ ބައްދަލުކުރައްވަމުންނެވެ.
މީގެ އިތުރުން "ކުރިއަށް" ނަމުގައި ރައީސް ސޯލިހުގެ ކެމްޕެއިން ފަށްޓަވާފައިވާއިރު މިއަދު ރ އަތޮޅަށް ވަނީ ވަޑައިގަންނަވާފައެވެ. އަދި ނ އަތޮޅުގެ ރަށްތަކަށް ވަޑައިގަތުމަށް ވަނީ ނިންމަވާފައެވެ.
