އެމްޑީޕީ ރިޔާސީ ޕްރައިމަރީގެ ކެމްޕެއިން ހަރަކާތްތައް ކުރިއަށްގެންދިއުމަށް އެމްޑީޕީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ބޮޑު ތިލަދުންމައްޗަށް ވަޑައިގެންފިއެވެ.
އެގޮތުން ރައީސް ނަޝީދު މިއަދު ވަނީ ހއ. އިހަވަންދޫ އަށާއި އެ އަތޮޅު ހޯރަފުއްޓަށް ވަޑައިގެންފައެވެ.
އަންނަ މަހުގެ 28 ވަނަ ދުވަހު އެމްޑީޕީގެ ޕްރައިމަރީ ބާއްވަން ނިންމާފައިވާއިރު މިއަދު ވަނީ އެ އިންތިހާބުގައި ވޯޓުލުމުގެ ހައްގު ހަމަވާ މީހުންގެ ލިސްޓާއި ޝަކުވާ ހުށަހެޅުމަށް ހުޅުވާލައިފައެވެ.
އެމްޑީޕީ ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސޯލިހުގެ އިތުރުން އެމްޑީޕީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދުވެސް ވާދަކުރައްވައެވެ. ނަޝީދަށް ލިބިވަޑައިގެންފައި ވަނީ ކެންޑިޑޭޓް ނަންބަރު 1 އެވެ. އަދި ރައީސް ސޯލިހަށް ލިބިވަޑައިގެންފައި ވަނީ ކެނޑިޑޭޓް ނަންބަރު 2 އެވެ.
ޕްރައިމަރީ އަށް ވޯޓު ހޯދުމަށްޓަކައި 'ފިކުރެއްގެ ދިރުން'ގެ ނަމުގައި ރައީސް ނަޝީދުގެ ކެމްޕެއިން ވަނީ ލޯންޗުކޮށްފައެވެ. އަދި މިހާރު ކުރިއަށްގެންދާ ކެމްޕެއިން ދަތުރުތަކުގައި އެމްޑީޕީގެ މެމްބަރުންނާ ބައްދަލު ކުރައްވާނެ ކަމަށް އެ ޕާޓީއިން ބުނެއެވެ.
މި މަހުގެ 31 ވަނަ ދުވަހަށް ރައީސް ނަޝީދު ކުރައްވާ ދަތުރުފުޅުގައި ހއ، ހދ، އަދި ށ ގެ ބައެއް ރަށްތަކަށް ވަޑައިގަތުމަށް ވަނީ ނިންމާފައެވެ.
