ރާއްޖޭގެ ތާރީހުގައި މިހާތަނަށް ހިންގި އެންމެ ބޮޑު ހިޔާނާތް ކަމަށްވާ އެމްއެމްޕީއާރުސީ ހިޔާނާތުގެ ތަހްގީގު، ރައީސް އިބްރާހީމް މުހައްމަދު ސޯލިހުގެ ދައުރުގައި ހިންގިފައި ނުވާ ކަމަށް ވިދާޅުވެ، އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރައީސަށް ފާޑުވިދާޅުވެއްޖެއެވެ.
އެމްއެމްޕީއާރުސީ ހިޔާނާތުގެ ތެރެއިން ފަޅުރަށްރަށާއި ފަޅުތައް ހިމެނޭހެން 30 ތަނެއް ވިއްކާލައި، ލިބުނު ދޮޅު ބިލިއަން ރުފިޔާ ވަނީ ދައުލަތުގެ އެކި ވެރިންނަށާއި ކުރީގެ ނައިބު ރައީސް އަހްމަދު އަދީބާ ގާތް ބޭފުޅުންނަށް ބަހާލައިފައެވެ.
މިއަދު ކުރެއްވި ޓްވީޓެއްގައި ނަޝީދު ވިދާޅުވީ، އެމްއެމްޕީއާރުސީގެ ހިޔާނާތުގެ މައްސަލަ އާއި ވެންޓިލޭޓަރުން ވައްކަން ކުރި މައްސަލައިގައި ދައުވާކޮށް ހުކުމް އިއްވުމުން، އެ މުއާމަލާތްތަކުގެ ފައިސާ އަށް ވީ ގޮތް ރަނގަޅަށް ސާފުވެގެން ދާނެ ކަމަށެވެ.
"ރައީސް ސޯލިހުގެ ދައުރު މި ނިމެނީ، އަދި މި އިން އެއްވެސް ކަމަކަށް ކާމިޔާބު ތަހްގީގެއް ހިންގާ ދައުވާ އުފުލިފައެއް ނެތް." ނަޝީދު ވިދާޅުވިއެވެ.
އެމްއެމްޕީއާރުސީ ހިޔާނާތުގެ މައްސަލައިގައި އިސް ދައުރެއް އަދާކުރީ އަދީބާއި އެ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތެވެ. ދެ މީހުންގެ މައްޗަށް މި މައްސަލައާ ގުޅިގެން އުފުލި ދައުވާތައް ސާބިތުވި ނަމަވެސް، އެ ދެ މީހުން ޖަލަށް ލާފައި ވަނީ ކުރު މުއްދަތަކަށެވެ. 2019 ކުރީކޮޅުން ފެށިގެން ޒިޔަތާއި އަދީބު ތިބީ ގޭ ބަންދުގައެވެ.
ވެންޓިލޭޓަރުން ވައްކަން ކުރި މައްސަލަ އަށް ބަލާލާއިރު، ވެންޓިލޭޓަރު ގަތުމަށް ހިންގި މުއާމަލާތުގައި ކޮރަޕްޝަން ހިންގާފައިވާ ކަމަށް އޭސީސީން ތަހްގީގުކޮށް ނިންމައި، ތިން މީހަކަށް ދައުވާކޮށްދޭން އެދި ވަނީ ޕީޖީ އަށް ފޮނުވައިފައެވެ.
