ރައީސް އިބްރާހިމް މުހައްމަދު ސޯލިހް ވެެރިކަން ކުރައްވަނީ ރައްޔިތުންގެ އިހުސާސްތައް ދެނެވަޑައިގެން ކަމަށް ސްޓެެލްކޯގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވެއްޖެެއެވެ.
ޝަރީފު މިހެން ވިދާޅުވީ، ކުރީގެ ރައީސް އަބްދުﷲ ޔާމީން ކުރެއްވި ޓުވީޓަކަށް ރައްދު ދެއްވަމުންނެވެ.
ލަންކާގެ މިހާރު ހާލަތާ ގުޅިގެން ޔާމީން ކުރެއްވި ޓްވީޓެއްގައި ވިދާޅުވީ، ގާނޫނު ތަންފީޒުކުރާ އިދާރާތަކުން ވަރަށް ރަނގަޅަށް ސަމާލުކަން ދީގެން ޓީވީން ފެންނަ މަންޒަރުތައް ބަލަންޖެހޭ ކަމަށެވެ.
މިގޮތުން ރާއްޖޭގެ ހާލަތަކީ އުފެދެމުން ބޮޑުވަމުން އަންނަ ހާލަތެއް ކަމަށާއި ބޯހަރުކަން އިސްކުރުމުން މިހާލަތު ރަނގަޅު ނުވާނެ ކަން ޔާމީން ފާހަގަކުރެއްވިއެވެ. އަދި އެމްޑީޕީގެ ހުވަފެންތަކުގައި ކުލަޖެހުމުގެ ކުރިން އެހުވަފެންތައް ފެނަށް ވެފައިވާ ކަމަށް ވެސް ޔާމީން ވަނީ ވިދާޅުވެފައެވެ.
އެޓްވީޓާ ގުޅިގެން ޝަރީފު ވިދާޅުވީ، މުލިއާގެއަށް ވަދެ ރައީސުލްޖުމްހޫރިއްޔާ އަވަހާރަފުޅުލައްޕަވާ އެނދުކޮޅަށް އަރާ ސެެލްފީ ނެގުމަކީ ރައްޔިތުންގެ ބާރު ކަމަށް ބައެއް މީހުންނަށް ހީވާ ކަމަށެވެ. އަދި ރައީސް ސޯލިހްއަކީ ރައްޔިތުންގެ އިހުސާސްތައް ރަނގަޅަށް ދަނެވަޑައިގެން ވެރިކަން ކުރައްވާ ހިކުމަތްތެރި ރައީސްއެއް ކަމަށް ޝަރީފް ވިދާޅުވިއެވެ.
ކޮވިޑާ ގުޅިގެން ލަންކާގައި އެޅި ހަރުކަށި ފިޔަވަޅުތަކާއެކު ގައުމުގެ އިގުތިސޯދު މަޑުޖެހިގެން ދިޔަ ވަގުތު، ތެލާއި ގަސް ކާނާ ލިބުން ދަތިވެ ގައުމުގެ އާންމު ހާލަތު ބޮޑުތަނުން ދަށަށް ގޮސް، ބޭނުން ކުރެވޭ ގޮތަށް ހުރި ޑޮލަރުގެ ރިޒާވުވެސް އެކީހެން ހުސްވެ، ބޭހާއި ކާބޯތަކެތި ލިބުމުގައިވެސް އެގައުމަށް ވަނީ ދަތިތަކާ ކުރިމަތިވެފައެވެ.
މި ނުތަނަވަސްކަމުގައި ރައްޔިތުން އުޅޭތާ އެތައް ދުވަހެއްވެފައި ވާއިރު، އާންމު މުޒާހަރާތަކާ ގުޅިގެން އޭރު ބޮޑުވަޒީރު ކަމުގައި ހުންނެވި މަހިންދަ ރާޖަޕަކްސައަށް ވެސް އިސްތިއުފާ ދެއްވަން މަޖުބޫރުވެ ވަޑައިގަތެވެ. އޭގެ ފަހުން ބޮޑުވަޒީރުކަމާ ހަވާލުވެވަޑައިގަތީ މިހާރުގެ ބޮޑުވަޒީރު ރަނިލް ވިކްރަމަސިންގްހަ އެވެ. ނަމަވެސް ފާއިތުވި 3 ދުވަސް ތެރޭގައި ލަންކާގެ ހާލަތު އިތުރަށް ގޯސްވެ، ރައްޔިތުން ވަނީ ރިޔާސީ ގަނޑުވަރު ވެސް ހިފާފައެވެ. އެތާނގައި ތިބި ރައްްޔިތުން ބުނެފައި ވަނީ، އާ ސަރުކާރެއް އެކުލަވާ ނުލެވެނީސް އެތަން ދޫކޮށް ނުދާނެ ކަމަށެވެ.
މީގެ އިތުރުން ރަނިލް އާއި އާއިލާ ދިރިއުޅުއްވި ގެކޮޅުގައި ރޯކޮށްލައި ބޮޑެތި ގެއްލުންތައް ވެސް ވަނީ ދީފައެވެ. މިކަމާ ގުޅިގެން ރަނިލް ވިދާޅުވީ، އޭނާގެ ގެކޮޅުގައި އެތައް ސަތޭކަ ފޮތެއް ހިމެނޭ ގޮތަށް ހުރި ލައިބްރަރީއާއި 200 އަހަރުވެފައި ހުރި އާސާރީ ކުރެހުންތަކާއި ތަކެއްޗަށް ގެއްލުންދީ އަންދާލާފައި ވާ ކަމަށެވެ.
