މަސައްކަތްތެރިންނަށް ދިމާވެފައިވާ ދަތިތަކުން އަރައިގަތުމަށްޓަކައި އިންޝުއަރެންސާއި އެހީތެރިކަން ފޯރުކޮށްދިނުމުގެ ގޮތުން، ވޯލްޑް ބޭންކުން ރާއްޖެއަށް 24 މިލިއަން ޑޮލަރު (370 މިލިއަން ރުފިޔާ) ގެ ހިލޭ އެހީއެއް ދީފިއެވެ.
ވޯލްޑް ބޭންކުން ރާއްޖެއަށް ހިލޭ އެހީގެ ގޮތުގައި 370 މިލިއަން ރުފިޔާ ދީފައިވަނީ އެ އިދާރާއިން އަލަށް ފެށި ސަސްޓެއިނަބަލް އެންޑް އިންޓަގްރޭޓަޑް ލޭބާ ސާވިސަސް (ސެއިލްސް) މަޝްރޫއުގެ ދަށުންނެވެ. އެ މަޝްރޫއަކީ ޕެންޝަން އޮފީހާއި އިކޮނޮމިކް މިނިސްޓްރީން ގުޅިގެން ހިންގާ މަޝްރޫއެކެވެ.
އެ އިދާރާއިން ބުނީ:
- ބޮޑު މުސާރަ ލިބޭ ވަޒީފާތަކަށް ދިވެހިން ހޯދުމަށް ދަތިތައް ހުރިކަމަށް
- ވަޒީފާ ދޭ ފަރާތްތަކަށް ދަތިތައް ހުރިކަމަށް
އޭގެ އިތުރުން، ގިނަ ދިވެހި ޒުވާނުން އަމިއްލަ މަސައްކަތްކުރުން އިތުރުވަމުން ދާ ކަން ފާހަގަކޮށް، ވޯލްޑް ބޭންކުން ބުނި ގޮތުގައި، އެ ޒުވާނުން ރިޓަޔާކުރާ އުމުރާ އެކު، އެކަށީގެންވާ އަދަދަކަށް ފައިސާ ރައްކާކޮށް، އާމްދަނީ އަށް އަންނާނެ ހީނަރުކަމާ ކުރިމަތިލާނެ ގޮތްތައް ހޯދުމުގައިވެސް ދަތިތަށް އެބަ ހުއްޓެވެ.
ރާއްޖެއަށާއި ލަންކާ އަށް ވޯލްޑް ބޭންކުން ކަނޑައަޅާފައިވާ ކަންޓްރީ ޑިރެކްޓަރު ފާރިސް އެޗް ހަދާދު-ޒާވޮސް ވިދާޅުވީ، ކޮވިޑުގެ ބަލިމަޑުކަމުގެ ސަބަބުން، ރާއްޖޭގައި ވަޒީފާއަށް ނުދާ މީހުން އިތުރު ކަމަށާއި، ވަޒީފާތަކަށް އަލުން ނެރެދިނުމަށް އެމީހުންނަށް އެހީތެރިކަން ދޭން ބޭނުންވާ ކަމަށެވެ.
"އަޅުގަނޑުމެންގެ މި އެހީތެރިކަމުގެ ސަބަބުން ޓޫރިޒަމާއި އިއާދަކުރަނިވި ހަކަތަ ފަދަ މުހިންމު ދާއިރާތަކުން ވަޒީފާ އިތުރުކޮށް، އިގްތިސާދީ ފުރުސަތުތަކަށް ވާސިލުވެވޭނެ މަގު ތަނަވަސްވެގެންދާނެ." އޭނާ ވިދާޅުވިއެވެ.
ސެއިލްސް މަޝްރޫއުގެ ދަށުން ކުރާ ބައެއް ކަންކަމުގެ ތެރޭގައި:
- ވަޒީފާ ދޭ ފަރާތްތަކާއި އަދާކުރާ ފަރާތްތައް ގުޅިގެން ވަޒީފާ ނެތް މީހުންނަށް އިނާޔަތް ދިނުމަށް، ޕެންޝަން އޮފީހުން ފަންޑެއް އެކުލަވައިލުން
- ސަރުކާރުގެ ޖޮބް ސެންޓަރު ފުޅާކުރުން
- އެކި ސަރަހައްދުތަކުގައި ޖޮބް ސެންޓަރުގެ ފަސް ހަބު ގާއިމްކުރުން
- ޖޮބް ސެންޓަރުތައް މެދުވެރިކޮށް ވަޒީފާ ހޯދަން އެހީތެރިވެދީ ކައުންސެލިން ދިނުން
ވަޒީފާއެއް ނެތް މީހުން ރާއްޖޭގައި އިތުރުވަމުން ދާއިރު، ވަޒީފާއެއް ނެތި ގިނަ މީހުން ދިރިއުޅެނީ ރަށްރަށުގައެވެ. އޭގެ ތެރެއިން 46 ޕަސެންޓަކީ އަންހެނުންނެވެ.
