މި ސަރުކާރުން ގައުމު ކުނި ދެ ބިހަށް ވިއްކާލާފައިވާ ކަމަށް ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ، ހުސްވެފައިވާ، ކުރެންދޫ ކައުންސިލްގެ ރައީސްގެ މަގާމަށް ޕީޕީއެމްގެ ފަރާތުން ވާދަކުރައްވާ އިސްމާއިލް މަދީހުގެ ކެމްޕެއިން ހަރަކާތުގައި ވާހަކަ ދައްކަވަމުންނެވެ.
ޝިޔާމް ވިދާޅުވީ އިންޑިއާ ސިފައިން ހުރިހާ އަތޮޅެއްގައި ވެސް އެބަތިބި ކަމަށާއި އެހެންނަމަވެސް ތިބި އަދަދެއް އަންދާޒާ ކޮށްލަން ވެސް އެނގިވަޑައިނުގަންނަވާ ކަމަށެވެ.
މީގެ އިތުރުން ރާއްޖޭގެ ކަނޑުތަކުގައި ހުރި މައުދަންތަކުގެ މައުލޫމާތު ދިވެހިންނަށް ވުރެ ކުރިން މިއަދު އެނގޭނީ އިންޑިއާ މީހުންނަށް ކަމަށް ޝިޔާމް ފާހަގަ ކުރެއްވިއެވެ.
އިންޑިއާ ސިފައިން ރާއްޖޭގައި ނެތް ކަމަށް ކުރިން ސަރުކާރުން ބުނެފައިވީނަމަވެސް މިފަހުން މަޖިލީހުގެ ކޮމިޓީއެއްގައި އިންޑިއާ ސިފައިން ތިބި ކަމަށް އެއްބަސްވެފައިވާ ކަމަށް ޝިޔާމް ވިދާޅުވިއެވެ. ޝިޔާމް ވިދާޅުވީ އިންޑިއާ ސިފައިން ރާއްޖޭގައި ބައިތިއްބަންޖެހޭ ކަމަށް ބުނެ ސަރުކާރުން ދައްކަނީ ބިސް، ފިޔާ، ހަނޑޫ ނުލިބޭނެ ކަމުގެ ބަހަނާ ކަމަށެވެ.
މިއަދު ސަރުކާރުން އެތިބީ ކުނި ދެ ބިހަށް ގައުމު ވިއްކާލައިގެން ކަމަށާއި މިއީ އާދައިގެ ވާހަކައެއް ނޫން ކަމަށް ވެސް ޝިޔާމް ވިދާޅުވިއެވެ.
