ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް ތަރައްގީ ކޮށްފައި ވާ ވެކްސިން ޖަހާފައި ނުވާ ދުނިޔޭގެ މަޝްހޫރު ޓެނިސް ކުޅުންތެރިޔާ، ނޯވާކް ޖޮކޮވިޗް، އޮސްޓްރޭލިއާއިން ޑީޕޯޓް ކޮށްލައިފިއެވެ.
ވެކްސިން ފުރިހަމަ ނުކޮށް އޮސްޓްރޭލިއާގައި ހުރުމަށް ޝަރުއީ އިމުގެ ތެރެއިން ޖޮކޮވިޗް ކުރި މަސައްކަތް ކާމިޔާބު ނުވެ، އޮސްޓްރޭލިއާއިން އޭނާ ޑީޕޯޓްކޮށްފައި ވާ އިރު، އޮސްޓްރޭލިއާގެ ސަރުކާރުން ވަނީ 2 ފަހަރެއްގެ މަތިން ޖޮކޮވިޗްގެ ވިސާވެސް ބާތިލު ކޮށްފައެވެ.
ޖޮކޮވިޗް ބުނީ، އޮސްޓްރޭލިއާގެ ނިންމުމާ މެދު އޭނާ ހިތާމަ ކުރާ ކަމަށާ، ނަމަވެސް އެ ނިންމުން ބަލައިގަންނަ ކަމަށެވެ. އޮސްޓްރޭލިއާއިން ޑީޕޯޓް ކުރުމާއެކު ޖޮކޮވިޗް ވަނީ އެ ގައުމު ދޫކޮށް، ދުބާއީއަށް ފުރާފައެވެ.
ޖެނުއަރީ 6 ވަނަ ދުވަހު، ޖޮކޮވިޗް އޮސްޓްރޭލިއާއަށް ދަތުރު ކުރީ އޮސްޓްރޭލިއާ އޯޕަން ޓެނިސް މުބަރާތުގެ ޓައިޓަލް ދިފާއު ކުރުމަށެވެ. ޖޮކޮވިޗްގެ ފޭނަކު ވަނީ، ޖޮކޮވިޗްއާ ނުލާ، މި ފަހަރުގެ މުބާރަތް ފަޅުވާނެ ކަމަށް ސިފަކޮށްފައެވެ.
އޮސްޓްރޭލިއާގެ ވެކްސިން އުސޫލާ ހިލާފު ވެފައި ވާ މީހަކު އެ ގައުމުގައި ހުއްޓަ ނުދީ ބޭރު ކުރުމަށް ނިންމި ނިންމުމަށް، އޮސްޓްރޭލިއާގެ ބޮޑުވަޒީރު ސްކޮޓް މޮރިސަން ވަނީ މަރުހަބާ ވިދާޅުވެފައެވެ. އެއީ އޮސްޓްރޭލިއާގެ ބޯޑަރު ވަރުގަދަކޮށް، އޮސްޓްރޭލިއާގެ ރަށްވެހިންނަށް ސަލާމަތްތެރިކަމަށްޓަކާ ނިންމި ނިންމުމެއް ކަމަށްވެސް މޮރިސަން ވަނީ ސިފަ ކުރައްވާފައެވެ.
އޮސްޓްރޭލިއާއަށް އެތެރެވުމަށް ހުށަހަޅަން ޖެހޭ ލިޔެކިއުންތަކުގައި އޮޅުމެއްގެއް ތެރެއިން ދޮގު މައުލޫމާތު ދެވިފައި ވާނެ ކަމަށްވެސް ޖޮކޮވިޗް ވަނީ އިއުތިރާފުވެފައެވެ. އަދި ކޮވިޑް ޖެހިފައި ހުރެމެ، މީޑިއާއަށް އިންޓަވިއުތަކެއް ދީފައި ވާނެ ކަމަށްވެސް އޭނާ ވަނީ އިއުތިރާފުވެފައެވެ.
