ކޮވިޑް 19ގެ ވެކްސިންގެ ހަތަރު ވަނަ ޑޯޒް 18 އަހަރުން މަތީގެ އެންމެން ގަޔަށް ޖަހަން ފަށައިފިއެވެ.
އެޗްޕީއޭއިން ބުނީ 8 ސެޕްޓެމްބަރުން ފެށިގެން ކޮވިޑް 19 ވެކްސިންގެ 4 ވަނަ ޑޯޒް އުމުރުން 18 އަހަރުން މަތީގެ މީހުންނަށް ޖެހުމަށް ހަމަޖެހިފައިވާ ކަމަށާއި އެ ޑޯޒް ޖަހާނީ ކޮވިޑް 19 ގެ ފުރަތަމަ ބޫސްޓާ ކަމަށްވާ 3 ވަނަ ޑޯޒް ޖެހިފަހުން 4 މަސް ދުވަސް ފުރިހަމަ ވެފައިވާ ފަރާތްތަކަށް ކަމަށެވެ.
ހަތަރު ވަނަ ޑޯޒްގެ ގޮތުގައި ފައިޒަ ވެކްސިން ޖެހުމަށް ހަމަޖެހިފައި ވާއިރު އެޗްޕީއޭއިން ބުނީ މާލެ ސަރަހައްދުގައި ވެކްސިން ޖެހުމަށް ހަމަޖެހިފައި ވަނީ އެޕޮއިންޓްމެންޓް އުސޫލުން ކަމަށާއި އަތޮޅުތެރޭގައި ވެކްސިންޖެހުމުގެ އިންތިޒާމު ހަމަޖެހިފައިވާ ގޮތް އެރަށެއްގެ ހޮސްޕިޓަލް ނުވަތަ ސިއްހީ މަރުކަޒުން އާއްމު ކުރާނެ ކަމަށެވެ.
މީގެ އިތުރުން 12 އަހަރުން މަތީގެ މީހުންގެ ތެރެއިން ވެކްސިންގެ ފުރަތަމަ އަދި ދެވަނަ ޑޯޒް މިހާތަނަށް ފުރިހަމަ ނުކުރެވި ހުރި ފަރާތްތަކަށްވެސް ވެކްސިން ސެންޓަރުތަކުން ވެކްސިން ޖެހުމުގެ އިންތިޒާމް ހަމަޖެހިފައިވާ ކަމަށް ވެސް އެޗްޕީއޭއިން ބުނެއެވެ.
މާލެ ސަރަހައްދުގެ ވެކްސިން ސެންޓަރުތައް، ހިދުމަތްދޭ ދުވަސްތަކާއި ވަގުތުތައް:
ދަރުމަވަންތަ ހޮސްޕިޓަލް - މެންދުރު 12 އިން މެންދުރުފަހު 2 އަށް (އާދިއްތަ، އަންގާރަ، ބުދަ)
ހުޅުމާލެ ހޮސްޕިޓަލް - މެންދުރުފަހު 1 އިން މެންދުރުފަހު 3 އަށް (އާދިއްތަ، އަންގާރަ، ބުރާސްފަތި)
ދަމަނަވެށި - މެންދުރުފަހު 1 އިން މެންދުރުފަހު 3 އަށް (ސަރުކާރު ބަންދު ނޫން ކޮންމެ ދުވަހަކު)
އެޗްޕީއޭއިން ބުނީ ވެކްސިން ޖެހުމަށް ޝަރުތުހަމަވާ ފަރާތްތަކުން މި ލިންކުން އެޕޮއިންޓްމަންޓް ހެއްދޭނެ ކަމަށެވެ.
