ލަންކާގައި މާދަމާ ފަށާ މަހިންދަ ރާޖަޕަކްސަ ޓްރޮފީ މުބާރާތުގައި މާދަމާރޭ ރާއްޖެއާއި ލަންކާ ކުޅޭ މެޗު ކާނިވާ ސަރަހައްދުގައި، އަދި ޒުވާނުންގެ މަރުކަޒުގައި ބޮޑު ސްކްރީނުން ދައްކާ ގޮތަށް ހަމަޖައްސައިފިއެވެ.
ޔޫތު މިނިސްޓަރު އަހުމަދު މަހްލޫފް ވިދާޅުވީ، އެ މިނިސްޓްރީ އާއި އުރީދޫ ގުޅިގެން މާދަމާރޭ ރާއްޖެއާއި ލަންކާ ކެޅޭ މެޗު ކާނިވާ ސަރަހައްދުގައި އަދި ޒުވާނުންގެ މަރުކަޒުގައި ހުންނަ ބޮޑު ސްކްރީނުން ދައްކާ ގޮތަށް ވަނީ ހަމަޖައްސާފައި ކަމަށެވެ. އަދި މިކަމުގައި ސިޓީ ކައުންސިލުން އެއްބާރުލުން ދިންކަން ފާހަގަކުރައްވާ، މަހްލޫފް ވަނީ ކައުންސިލަށް ޝުކުރު ދަންނަވާފައެވެ.
ރާއްޖެއާއި ލަންކާ ކުޅޭ މެޗު ފެށުމަށް ހަމަޖެހިފައިވަނީ މާދަމާރޭ ލަންކާގެ ގަޑިން ރޭގަނޑު އަށެއް ޖަހާއިރެވެ. އެއީ ރާއްޖެ ގަޑިން 7:30 އެވެ.
އެންމެ ފަހުން ރާއްޖެއާއި ލަންކާ ކުޅުނީ މިދިޔަ މަހު ރާއްޖޭގައި ކުރިއަށްދިޔަ ސާފް ޗެމްޕިއަންޝިޕްގައެވެ. އެ މެޗުން ރާއްޖެ މޮޅުވީ އަލީ އަޝްފާގް (ދަގަނޑޭ) ކާމިޔާބު ކުރި ލަނޑުން، 1-0 އިންނެވެ.
މާދަމާރޭ ރާއްޖެއާއި ލަންކާ ކުޅޭ މެޗު ޝަރަފުވެރިކޮށްދެއްވައި، މެޗު ބައްލަވާލެއްވުމަށްޓަކައި ލަންކާގެ ރައީސް ގޮތަބަޔާ ރާޖަޕަކްސާގެ ދައުވަތު ގަބޫލު ކުރައްވައި، ރައީސް އިބްރާހީމް މުހައްމަދު ސޯލިހު މާދަމާ ލަންކާއަށް ވަޑައިގަންނަވާނެއެވެ
މުބާރާތުގައި ރާއްޖެއާއި ލަންކާ ބައްދަލުކުރާ މެޗު މާދަމާ ރޭ ކުޅޭއިރު މި މެޗުގެ ޓިކެޓުތައް ވިއްކުމަށް ހަމަޖެހިފައި ވަނީ ކޮލަމްބޯގައި ހުންނަ ރާއްޖޭގެ އެމްބަސީންނާއި ދިވެހިންގެ ކޮމިއުނިޓީ ސެންޓަރުންނެވެ. ނަމަވެސް ދިވެހިންނަށް ހާއްސަކޮށް ވިއްކާނީ ކިހާ އަދަދެއްގެ ޓިކެޓެއް ކަމެއް ހާމައެއް ނުކުރެއެވެ.
މި މުބާރާތުގައި ދިވެހިންނަށް މެޗު ބަލަން ވަދެވޭގޮތަށް ކުރިން އޮތީ މީހަކަށް 5000 ރުޕީސްއަށެވެ. ނަމަވެސް މިހާރު ވަނީ ޓިކެޓްގެ އަގު 3000 ރުޕީސް އަށް ކުޑަކޮށްފައެވެ
