އެމްއެމްޕީއާރުސީ ހިޔާނާތުގެ މައްސަލާގައި ކުރީގެ ރައީސް އަބްދުﷲ ޔާމީންގެ މައްސަލަ ބެއްލެވި ފަނޑިޔާރުންގެ އޯޑިއޯ ރެކޯޑިންތަކެއް ކަމަށް ބުނެ، މީޑިއާގައި ދައުރުވަމުން ދިޔަ އޯޑިއޯތަކުގައިވާ އަޑާއި، ގާޒީ ހުސައިން ފާއިޒު ރަޝާދުގެ އަޑު ދިމާވާކަމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ބުނެފިއެވެ.
ޖޭއެސްސީން މިހެން ބުނީ، ޔާމީނަށް ހުކުމްކުރަން ބޭއްވި ޝަރީއަތުގައި ބައިވެރިވެވަޑައިގެންނެވި ގާޒީ ފާއިޒަށް، އެމައްސަލަ ވަކި ގޮތަކަށް ނިންމުމަށް ނުފޫޒު ފޯރުވި ކަމަށް އޭނާ ވިދާޅުވާ ކަމަށް ބުނެ އޯޑިއޯއަކާއި، އެ ހުކުމުގައި އޮތް އެއްޗެއް ގާޒީ އަލީ އާދަމަށް އެނގިވަޑައިނުގަންނަވާ ކަމަށް ބުނާ އޯޑިއޯތަކެއް މީޑިއާގައި ލީކުވުމާ ގުޅިގެން، ފުލުހުން ކުރި ފޮރެންސިކް ތަހުގީގުތަކަށް ފަހު، އެކޮމިޝަނަށް ތަހުގީގުގެ ނަތީޖާތައް ފޮނުވާފައި ވަނިކޮށެވެ.
އެކޮމިޝަނުން ނެރުނު ބަޔާނުގައި ބުނީ، ފުލުހުން ކުރި ފޮރެންސިކް އެނަލިސިސްގެ ނަތީޖާއިން ދައްކާ ގޮތުން، އެ އޯޑިއޯތަކުގައިވާ އަޑުތައް ގާޒީ އަލީ އާދަމްގެ އަޑާއި ގާޒީ މުހައްމަދު ސަމީރުގެ އަޑާ ދިމާނުވާކަން ވަނީ ކަށަވަރު ކުރެވިފައި ކަމަށްވާތީ، އެ ދެ ފަނޑިޔާރުންގެ މައްޗަށް ތުހުމަތު ކުރެވޭ އެއްވެސް މައްސަލައެއް ނެތްކަމަށެވެ.
ފުލުހުންގެ ތަހުގީގަށް ފޮނުވި އެ ތިން އޯޑިއޯއަކީ ޓެމްޕާކޮށް، ވަކި ބައިތަކެއް ޑިލީޓްކޮށް، ނުވަތަ ވަކި ކްލިޕްތަކުން ގުޅުވާފައިވާ އޯޑިއޯތަކެއް ކަން ފުލުހުން ކުރި ތަހުގީގުން އެނގޭ ކަމަށް އެކޮމިޝަނުން ބުންޏެވެ.
ހަމަ އެހެންމެ، ގާޒީ ފާއިޒުގެ އޯޑިއޯ ކަމަށް ބުނާ އޯޑިއޯވެސް އޮތީ ޓެމްޕާކޮށްފައި ކަމަށާއި، ނަމަވެސް އޯޑިއޯގައިވާ އަޑާއި އޭނާގެ އަޑު ދިމާވާ ކަމަށް ފުލުހުން ކުރި ތަހުގީގަށް ހާމަވާތީވެ، ފާއިޒުގެ މައްސަލަ ބެލުމަށް ކޮމިޝަންގެ އިސްނެގުމުގެ މަތިން ތަހުގީގު ކުރުމަށް ނިންމާ، ތަހުގީގު ކޮމިޓީއެއް ވަނީ އެކުލަވާލާފައި ކަމަށްވެސް ބުންޏެވެ.
އޭގެ އިތުރަށް އެކޮމިޝަނުން ފާހަގަކުރި ބައެއް ކަންކަން
- ޔާމީންގެ ޝަރީއަތާ ގުޅިގެން، ޝަރީއަތަށް ނުފޫޒު ހިންގުމަށް މަސައްކަތްކޮށްފައި ވާކަން ބުނެފައި ނުވާކަން
- ނަމަވެސް، ކޯޓުން ބޭރުގައި ކޯޓުގެ ޝަރީއަތަކާ ގުޅޭ ގޮތުން ވާހަކަ ދައްކާފައިވާކަން
- އެކަމުގެ ސަބަބުން، ބައެއް ފަރާތްތަކަށް ނާޖާއިޒް ފައިދާ ނެގުމަށް މަގުފަހިވެފައިވާކަން
- އެހެން ފަނޑިޔާރުންގެ އިތުބާރު ގެއްލޭ ގޮތަށް އޯޑިއޯ ހަދައިގެން ދައުރުކުރުމުގެ އަމަލު ހިންގުމަށް މަގުފަހިވެފައިވާކަން
"ފަނޑިޔާރުންގެ އޯޑިއޯތަކެއްކަމަށް ބުނެ، ބަޔަކު ހަދައިގެން ފަނޑިޔާރުންގެ މައްޗަށް ތުހުމަތުކޮށް ދައުރުކުރި ސައްހަނޫން އޯޑިއޯތަކާއި، އެމައްޗަށް ބިނާކޮށް ފަނޑިޔާރުންގެ މައްޗަށް މަތިކުރި ދޮގު ތުހުމަތުތައް މިކޮމިޝަނުން ކުށްވެރިކުރަމެވެ." ޖޭއެސްސީގެ ބަޔާނުގައިވެއެވެ.
ޖޭއެސްސީން ފަނޑިޔާރުންގެ އޯޑިއޯ އާ މެދު ބަޔާނެއް ނެރެފައިވާއިރު، އިދިކޮޅު ކޯލިޝަނުން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވީ، އެ އޯޑިއޯތަކުގެ ސައްހަކަން ބެލޭނެ މަގެއް ފެނޭތޯ ކަމާ ބެހޭ ހުރިހާ ފަރާތްތަކާ ބައްދަލުކޮށް، އަދި ލިޔެކިޔުމުން ވެސް ހުށަހަޅަމުން ގެންގޮސްފައި ވާނެ ކަމަށެވެ.
ޤާޒީ ފާއިޒާ ސަމީރު ދަންނަ މީހަކަށް ސާފުކޮށް އެނގޭނެ އެމީހުންގެ އަޑުކަން އެއީ. ފުލުހުންގެ ޕޮރެންސިކް ޓީމުގެ އިތުބާރު ތި ގެއްލުނީ.. މިވަރު ބަޔަކު ހަދާ ޑީ.އެން.އޭ އެނަލިސިސް އަކުން ޒިނޭ ކުރި މީހާ ދެނެގަންނަން ހެޔޮ ނުވާނެ.