ފާމަސޫޓިކަލް ކުންފުނި ޖިލިއަޑް ސައެންސަސްގެ އެންޓިވައިރަލް ޑްރަގް – ވެކްލަރީ ނުވަތަ އާންމު ނަމުން ނަމަ، ރެމްޑެސިވިއާއަކީ، މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19)ގެ ފަރުވާގެ ގޮތުގައި އެމެރިކާގެ ފުޑް އެންޑް ޑްރަގް އޮތޯރިޓީ (އެފްޑީއޭ) އިން ބަލައިގެންފައި ވާކަމަށް އެ ކުންފުނިން ހާމަކޮށްފިއެވެ.
ވެކްލަރީ ބްރޭންޑްގެ ނަމުގައި ޖިލިއަޑްއިން ތަރައްގީ ކޮށްފައި ވާ ރެމްޑެސިވިއާއަކީ ކޮވިޑް-19ގެ ބަލިމަޑުކަމުގައި ކުއްލި ނުރައްކާ ކުރިމަތިވެގެން އަންނަ ވަގުތުތަކުގައި ބޭނުން ކުރުމަށް އެފްޑީއޭއިން މީގެ ކުރިންވެސް ހުއްދަ ދީފައިވާ ޑްރަގެކެވެ. ކުއްލި ހާލަތުގެ ބޭނުމުގެ ބޭރުން ކޮވިޑް-19ގެ ފަރުވާއަކަށް އެމެރިކާއިން ލައިސަންސް ދޫކުރި އެންމެ ފުރަތަމަ، އަދި ހަމައެކަނި ކުންފުނީގެ ރެކޯޑްސްވެސް މިހާރު އޮތީ ޖިލިއަޑް ސައެންސްގެ އަތުގައެވެ.
ރެމްޑެސިވިއާއަކީ ޖިލިއަޑް ކުންފުނިން، އެބޯލާ ރޯގާއަށް ހާއްސަ ކުރި ފަރުވާއެކެވެ. ނަމަވެސް، މި ބޭހަކީ، ކޮވިޑް-19 ޖައްސާ ސިވިއާ އެކިއުޓް ރެސްޕިރޭޓަރީ ސިންޑްރޯމް ކޮރޯނާވައިރަސް 2 (ސާސްކޮވް-2) ނަކަލު ކުރުން ހުއްޓުވާ ބޭހެއްކަން ވަނީ ދެނެގަނެވިފައެވެ. ޖިލިއަޑްއިން ބުނާ ގޮތުގައި މި ބޭސް ބޭނުން ކުރުމުން، ކޮވިޑް-19ގެ ޕޭޝަންޓުން ހޮސްޕިޓަލުގައި ހޭދަ ކުރަންޖެހޭ މުއްދަތުން 5 ދުވަސް މަދުކޮށްލެވެއެވެ.
ދާދިފަހުން ކޮވިޑް-19އަށް ޕޮޒިޓިވްވެ، ވޯލްޓާ ރީޑް ނޭޝަނަލް މިލިޓަރީ މެޑިކަލް ސެންޓަރުގައި ފަރުވާ ހޯއްދެވި އެމެރިކާގެ ރައީސް ޑޮނާލްޑް ޓްރަމްޕްވެސް ވަނީ ރެމްޑެސިވިއާ ތަޖުރިބާ ކުރައްވާފައެވެ.
ކަން މިހެން އޮތް ނަމަވެސް، ދުނިޔޭގެ ސިއްހަތު ޖަމިއްޔާއިން ހުސްވި ހަފުތާގައި ބުނީ، މި ބޭހުގެ ސަބަބުން ފުރާނަ ސަލާމަތް ކުރުމަށް އާދަޔާ ހިލާފު ކާމިޔާބީއެއް ލިބޭތީ ފާހަގަ ކުރެވިފައި ނުވާ ކަމަށެވެ. ރައްދުގައި ޖިލިއަޑްއިންވަނީ، ސިއްހަތު ޖަމިއްޔާގެ ބުނުމަކީ، އެކަށީގެންވާ ގޮތެއްގައި ތަފާސް ހިސާބުތައް މުރާޖައާ ނުކޮށް، ބުނި ބުނުމެއް ކަމަށް ބުނެ، ދިފާއަށް ކުޅެފައެވެ.
ކޮވިޑް-19އަށް ކަނޑައެޅިގެން ވަކި ފަރުވާއެއް ހޯދިފައި ވާ ކަން، ޑަބްލިއުއެޗްއޯއިން އަދިވެސް ކަށަވަރުކޮށްދީފައެއް ނުވެއެވެ.
