ބޯނިއޯގެ އުތުރުގައި އޮންނަ މެލޭޝިއާގެ ދައުލަތެއް ކަމަށްވާ ސަބާގެ އާންމު މަޖިލީހަށް މެމްބަރުން އިންތިހާބު ކުރުމަށް މިއަދު ކުރިއަށް ގެންދިޔަ ވޯޓުގައި، މެލޭޝިއާގެ ބޮޑުޒީރު މުހްޔިއްދީން ޔާސީންގެ އެލާޔަންސަށް ކާމިޔާބު ލިބިފައި ވާކަމަށް ވަގުތީ ނަތީޖާތަކާ ހަވާލާދީ، ބައިނަލްއަގުވާމީ މީޑިއާއިން ރިޕޯޓްކޮށްފިއެވެ.
ވަގުތީ ނަތީޖާއަށް ބަލާއިރު މުހްޔިއްދީންގެ ގަބުންގަން ރަކްޔާތު ސަބާ (ޖީއާރްއެސް) އެލާޔަންސްއިން ވަނީ، ސަބާގެ ދައުލަތުގެ ސަރުކާރު އެކުލަވާލުމަށް މަޖިލީހުން އެންމެ މަދުވެގެން ބޭނުންވާ 37 ގޮނޑި ކަށަވަރުކޮށްފައެވެ.
ސަބާ ދައުލަތުގެ ގާނޫނު ހަދާ މަޖިލިސް އެކުލެވިގެން ވަނީ ޖުމުލަ 73 ދާއިރާއެއްގެ މައްޗަށެވެ.
ސަބާ ދައުލަތުގެ މަޖިލީހުން މުހްޔިއްދީންގެ އެލާޔަންސްއަށް ކުރި ލިބުމަކީ، މެލޭޝިއާގެ އާ ފެޑެރަލް ސަރުކާރު އެކުލަވާލެއްވުމަށް އިދިކޮޅު ލީޑަރު އަންވަރު އިބްރާހީމް ކުރައްވަމުން ގެންދަވާ މަސައްކަތްތަކުގެ މައްޗަށް ލިބުނު ކުރިއެރުމެއްގެ ގޮތުގައި ސިފަކުރެވެއެވެ.
ސަބާ އިންތިހާބުގައި ޖީއާރްއެސްއަށް ކުރި ލިބިއްޖެނަމަ މެލޭޝިއާގައި އަވަސް އާންމު އިންތިހާބެއް ބާއްވާނެ ކަމުގެ އަޑުތައް އޮތީ ފެތުރިފައެވެ. މިހާރު ތާވަލުކޮށްފައި ވާ ގޮތުން، މެލޭޝިއާގައި އާންމު އިންތިހާބުގެ ވޯޓުލުން ކުރިއަށް ގެންދަން ޖެހޭނީ 2023 ގައެވެ.
ސަބާއަކީ މެލޭޝިއާގެ މައި ސަރުކާރުގެ ދަށުގައިވާ ދައުލަތްތަކުގެ ތެރެއިން 2 ވަނައަށް އެންމެ ބޮޑު ދައުލަތެވެ. ސަބާގައި ވޯޓު ދިނުމުގެ ހައްގު ލިބިފައިވާ 1.1 މިލިއަން މީހުން ތިބިއިރު، 60 ޕަސެންޓް މީހުން ވަނީ މިއަދުގެ އިންތިހާބުގައި ވޯޓު ދީފައެވެ.
