ލުބްނާނުގެ ވެރިރަށް ބެއިރޫތުގައި އަންގާރަ ދުވަހު ހިނގި ބާރުގަދަ ގޮވުންތަކަކީ "ހަމަލާ" އެއްގެ ގޮތުގައި ސިފަކުރައްވާ، އެމެރިކާގެ ރައީސް ޑޮނާލްޑް ޓްރަމްޕް، ނޫސްވެރިންގެ ބައްދަލުވުމެއްގައި 2 ފަހަރެއްގެ މަތިން ވާހަކަފުޅު ދެއްވުމާއެކު، ލުބްނާނުގެ އޮފިޝަލުން ކަންބޮޑުވުން ފާޅު ކުރައްވައިފިއެވެ.
ލުބްނާނުގެ އޮފިޝަލުން ވަނީ، އެމެރިކާގެ ޑިޕްލޮމެޓުންނަށްވެސް މިކަން ހުށަހަޅުއްވާފައި ކަމަށް، އެމެރިކާގެ ހާރިޖީ އޮފިޝަލުން ވަނީ ބައިނަލްއަގުވާމީ މީޑިއާއަށް ވިދާޅުވެފައެވެ.
އަންގާރަ ދުވަހުގެ ހާދިސާގައި އެތައް ބަޔަކު މަރުވެ އެތައް ހާސް ބަޔަކު ޒަހަމްވިއިރު ލުބްނާނަށް ހަމްދަރުދީ ފޮނުއްވަމުން ޓްރަމްޕް ވަނީ، މި ހާދިސާއަކީ "ހަމަލާ" އެއްގެ ގޮތުގައި ސިފަކުރައްވާފައެވެ. ނަމަވެސް އެއީ ކީއްވެ ވިދާޅުވި އެއްޗެއްކަމެއް ވިދާޅެއް ނުވެއެވެ.
ލުބްނާނުގެ ބޮޑުވަޒީރު ހަސަން ދިއާބް ވިދާޅުވި ގޮތުގައި އަންގާރަ ދުވަހުގެ ގޮވުން ގޮވާފައިވަނީ ގަވައިދާ ހިލާފަށް 2750 ޓަނުގެ އެމޯނިއަމް ނައިޓްރޭޓް ރައްކާ ކޮށްފައި ހުންނަތާ 6 އަހަރުވީ ގުދަނެއްގައެވެ. މި ހާދިސާ ހިނގަން މެދުވެރިވި ސަބަބެއް ހޯދުމުގެ ތަހުގީގުތައް ކުރިއަށްދާއިރު 5 ދުވަހުގެ ތެރޭގައި ތަހުގީގު ރިޕޯޓް ނެރެވޭނެ ކަމަށްވެސް ވަޒީރު ވަނީ ވިދާލުވެފައެވެ.
އަންގާރަ ދުވަހުގެ ހާދިސާއަކީ، ބަޔަކު ދިން ހަމަލާއެއް ކަމަށް ލުބްނާނުގެ އޮފިޝަލުން އަދި އެއް ފަހަރުވެސް ވިދާޅުވެފައެއް ނުވެއެވެ.
ކަންމިހެން އޮތްއިރު، ތުހުމަތުގެ އިނގިލި އެންމެ ފުރަތަމަ އަމާޒު ކުރެވެން ފެށުނު ހިޒްބުއްލޯ ޖަމާއަތާ، އިސްރާއީލުން ވަނީ މިކަމުގައި އެބައި މީހުންގެ އަތެއް ނުވާނެ ކަމަށް ބުނެފައެވެ.
އަންގާރަ ދުވަހުގެ ގޮވުމުގައި ބެއިރޫތު ސިޓީގެ ބޮޑު ސަރަހައްދެއް ސުންނާފަތި ވެފައި ވާއިރު، ގަތަރު، ކުވައިތު އަދި އިރާގުން ވަނީ ލުބްނާނަށް ސިއްހީ އެހީތެރިކަން ފޯރުކޮށްދޭން ފަށާފައެވެ.
