އދ. މަހިބަދޫ ކައިރީގައި އޮންނަ މަންތާ ޕޮއިންޓަކަށް ދިޔަ ސަފާރީ އަކުން މޫދަށް ވެއްޓުނު ފަތުރުވެރިޔަކަށް އަނިޔާވެ އޭނާގެ ހާލު ސީރިއަސް ވެފައިވާކަމަށް ފުލުހުން ބުނެފިއެވެ.
ފުލުހުން ބުނީ މި ހާދިސާގައި އަނިޔާވެފައިވަނީ 29 އަހަރުގެ ޖަރުމަނުގެ ފިރިހެނަކަށް ކަމަށެވެ. މިހާދިސާ ހިނގާފައިވަނީ މަންތާ ޕޮއިންޓަށް ދިޔަ ސަފާރީގައި ތިބި މީހުން މޫދަށް ބޭލުމުގެ ތެރޭގައި ޖެހި ރާޅަކާ އެކު ފަތުރުވެރިޔާ މޫދަށް ވެއްޓި މޫދުގައި އޮތް މީހެއްގެ ބޮލުގައި އޭނާގެ އޮކްސިޖަން ފުޅިން ޖެހިގެން ކަމަށް ފުލުހުން ވަނީ ބުނެފައެވެ.
ފުލުހުން ބުނީ މި އެކްސިޑެންޓަށް ފަހު ސަފާރީގައި ތިބި މީހުން ވަނީ އަނިޔާ ލިބުނު ފަތުރުވެރިޔާ މަހިބަދޫ ހޮސްޕިޓަލަށް ގެންގޮސްފައެވެ. އަދި އޭނާއަށް އިތުރު ފަރުވާ ދިނުމަށް މިހާރު މާލެ ގެނެސްފައިވާ ކަމަށް ބުނެއެވެ.
ފުލުހުން ބުނީ މި އެކްސިޑެންޓު އިތުރަށް ތަހުގީގު ކުރަމުން ގެންދާކަމަށެވެ.
