އެމްޑީޕީ ކޮންގްރެސް 2026 ގައި ބައިވެރިވުމަށް އޮންލައިންކޮށް ރަޖިސްޓަރީ ނުކުރެވުނު ފަރާތްތަކަށް މާލަމަށް ގޮސްގެން ރަޖިސްޓަރީވުމުގެ އިތުރު ފުރުސަތެއް ދިނުމަށް އެ ޕާޓީން ނިންމައިފިއެވެ.
އެމްޑީޕީން އާންމުކުރި އިއުލާނުގައި ބުނެފައިވަނީ، މި މަހުގެ 1 އިން 3 އަށް ބޭއްވުމަށް ހަމަޖެހިފައިވާ ކޮންގްރެސްގެ ބައިވެރީން އޮންލައިންކޮށް ރަޖިސްޓަރީ ކުރުމުގެ ސުންގަޑިއަކީ ސެޕްޓެމްބަރު 25، 2026 ކަމަށެވެ. ނަމަވެސް، އެ ތާރީހާ ހަމައަށް ރަޖިސްޓަރީ ނުވެވުމުގެ ސަބަބުން ކޮންގްރެސްގައި ބައިވެރިވުމުގެ ފުރުސަތު ގެއްލިފައިވާ ފަރާތްތަކަށް އެ ފުރުސަތު ފަހިކޮށްދިނުމަކީ ޕާޓީގެ މަގްސަދު ކަމަށްވެސް އެމްޑީޕީން ބުނެފައިވެއެވެ.
އެހެންކަމުން، ރަޖިސްޓަރީ ނުވެވުނު މަންދޫބުންނަށް އޮކްޓޯބަރު 3، 2026 ވަނަ ދުވަހުގެ ހެނދުނު 8:00 އިން 8:30 އަށް ކޮންގްރެސް ބޭއްވުމަށް ހަމަޖެހިފައިވާ މާލަމަށް ދިއުމުން ރަޖިސްޓަރީކޮށްދިނުމުގެ އިންތިޒާމް ހަމަޖެހިގެންދާނެކަމަށް އެމްޑީޕީން ވަނީ ބުނެފައެވެ.
މީގެ ކުރިން އެމްޑީޕީގެ އޮފީހުގައި ބޭއްވި މީޑިއާބް ރީފިންއެއްގައި އެ ޕާޓީގެ ޗެއާޕާސަންގެ ނައިބު މުހައްމަދު ޝިފާޒް ވިދާޅުވީ، ކޮންގްރެސްގައި ބައިވެރިވާން މިހާތަނަށް 986 މަންދޫބަކު ރަޖިސްޓަރީ ކޮށްފައިވާ ކަމަށެވެ. އިތުރަށް ޝިފާޒް ވިދާޅުވީ މި ފަހަރުގެ ކޮންގްރެސްގައި އެންމެ ތަފާތު ކަމަކީ އިންވެސްޓްމަންޓް ފޯރަމެއް ބޭއްވުން ކަމަށެވެ.
