ދިވެހި ރާއްޖޭގެ ވަރަށް ގިނަ ރަށްރަށުގައިވެސް ދަނޑު ހައްދަމުންދާކަމަށާއި، ދަނޑުވެރިކަމުގައި ރާއްޖޭގެ ބިންތަކުގަ އެންމެ ރަނގަޅަށް ހެދޭ ތަރުކާރީ އާ މޭވާ ތަކެތި ހެއްދުމަށް އިލްތިމާސްކުރައްވާކަމަށް ދަނޑުވެރިކަމާއި ދިރޭތަކެއްޗާ ބެހޭ މިނިސްޓަރު ޑރ. މަރްޔަމް މާރިޔާ ވިދާޅުވެއްޖެއެވެ.
މިނިސްޓަރު މިހެން ވިދާޅުވެފައިވަނީ މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
ފުޑް ސެކިއުރިޓީއަށް ދަނޑުވެރިކަމާ ބެހޭ މިނިސްޓްރީން ކުރާ މަސައްކަތްތަކާއި ބެހޭގޮތުން ވާހަކަ ދައްކަވަމުން މިނިސްޓަރު ވިދާޅުވީ ގޯތިތެރޭގައި ދަނޑުވެރިކަން ކުރާ ފަރާތްތަކާއި، ދަނޑުވެރިކަން ކުރާ ރަށްރަށުގައިވެސް، މިކަން ވަރަށް ރަނގަޅަށް ކުރާ ފަރާތްތައް ގިނަކަމަށެވެ. މިއާއެކު ދަނޑުވެރިކަން ކުރާ އާއިލާތަކަށް ދަނޑުގޮވާމުގެ ބާވަތްތައް ކަށަވަރުކުރެވޭނެކަމަށެވެ.
މިނިސްޓަރު ވިދާޅުވީ އާއިލާތަކުންނާއި، ރަށްރަށުގައިވެސް ރާއްޖޭގެ ދަނޑުބިންތަކުގަ އެންމެ ރަނގަޅަށް ހެދޭ ނޭޓިވް ތަރުކާރީ އާ މޭވާ ފަދަ ތަކެތި ހައްދައިގެން އެރަށެއްގެ ރައްޔިތުންނަށް ފައިދާވާވަރަށް ތަކެތި ހެއްދުމަށް ފުޑް ސެކިއުރިޓީ ޕޮލިސީގެ ދަށުން އިލްތިމާސް ކުރައްވާކަމަށެވެ. އަދި މިއީ ރައީސުލްޖުމްހޫރިއްޔާ ޑރ. މުއިއްޒުގެ ވިޝަންއެެއް ކަމަށްވެސް މިނިސްޓަރު މާރިޔާ ވިދާޅުވިއެވެ.
ދަނޑުވެރިކަން ފުޅާކޮށް، ދަނޑުވެރިންނަށް ގިނަ ފުރުސަތުތަކެއް ހޯދަދިނުމަށް މި ސަރުކާރުން ދަނީ ގިނަ ގުނަ މަސައްކަތްކުރަމުންނެވެ. އެގޮތުން ދިވެހި ދަނޑުވެރިން އުފައްދާ ތަކެތި ފަސޭހައިން ހަމަ އަގުގައި ވިއްކާނެ އިންތިޒާމުތައް ހަމަޖެއްސުމުގެ ގޮތުން މި ރޯދަ މަހު، ނޯތު ހާބަރުގައި ވަގުތީ މާރުކޭޓެއްވެސް ވަނީ ގާއިމުކޮށްފައެވެ. މި މާރުކޭޓުގައި ފުރަތަމަ ފަހަރަށް ރާއްޖޭގެ ދަނޑުވެރިންގެ، މޯލްޑިވްސް ގުޑް އެގްރިކަލްޗަރަލް ޕްރެކްޓިސެސް(އެމްގެޕް) ސެޓިފައިޑް ތަކެތި ދަނީ ވިއްކަމުންނެވެ.
