އެސްޓީއޯއިން ވިއްކާ ކެރެޓުގެ އަގު ބޮޑުތަނުން ހެޔޮކޮށް، ކިލޯއެއް 10 ރުފިޔާއަށް ވިއްކަން ފަށައިފިއެވެ.
މިއަދު އާންމުކޮށްފައިވާ އެސްޓީއޯއިން ވިއްކާ އަސާސީ ކާބޯތަކެތީގެ އަގުތަކަށް ބަލާއިރު، ކުރިން ކެރެޓު ކިލޯއެއް 37 ރުފިޔާ އަށް ހުރިއިރު، ކެރެޓު ކިލޯއެއް ހުރީ 10 ރުފިޔާއަށެވެ.
ކެރެޓުގެ އިތުރުން އެސްޓީއޯއިން ވިއްކާ ފިޔާ، އަލުވި، އަދި ބައެއް ތަރުކާރީ އާ މޭވާގެ ބާވަތްތައް ވެސް ވަނީ އަގު ހެޔޮކޮށްފައެވެ. އެގޮތުން ކުރިން 12 ރުފިޔާއަށް ވިއްކި ފިޔާ ކިލޯގެ އަގު ހުރީ 10 ރުފިޔާއަށެވެ. ކުރިން 14 ރުފިޔާއަށް ވިއްކި އަލުވި ކިލޯއެއްގެ އަގު 12 ރުފިޔާއަށް ހުރިއިރު ކުރިން 75 ރުފިޔާއަށް ވިއްކި ސްޕިނެޗް ކިލޯއެއްގެ އަގު މިހާރު ހުރީ 60 ރުފިޔާއަށެވެ.
މިއަދު އާންމުކޮށްފައިވާ އެސްޓީއޯއިން ވިއްކާ އެހެނިހެން ތަރުކާރީގެ އަގުތަކަށް ބަލާއިރު ބަށި ކިލޯއެއް 57 ރުފިޔާއަށް، ކެބެޖު ކިލޯއެއް 19 ރުފިޔާއަށް، ސްވީޓް ޕޮޓޭޓޯ ކިލޯއެއް 44 ރުފިޔާއަށް، ބަރަބޯ ކިލޯ އެއް 12 ރުފިޔާއަށް، ލޮނުމެދު ކިލޯއެއް 35 ރުފިޔާއަށް އަދި އިނގުރު ކިލޯއެއް ހުރީ 30 ރުފިޔާއަށެވެ.
މިއަދުގެ މޭވާގެ އަގުތަކަށް ބަލާއިރު ދޮންކެޔޮ ކިލޯއެއް 30 ރުފިޔާއަށް، ފެހި އާފަލު ކިލޯއެއް 40 ރުފިޔާއަށް، ރަތް އާފަލު ކިލޯއެއް 42 ރުފިޔާއަށް، އޮރެންޖު ކިލޯއެއް 40 ރުފިޔާއަށް އަދި ލުނބޯ ކިލޯއެއް ހުރީ 22 ރުފިޔާއަށެވެ. މީގެ އިތުރުން ރާއްޖެއިން ބޭރުން އެތެރެކުރާ ޕެޝަން ފްރުޓް ކިލޯއެއް 104 ރުފިޔާއަށް ހުރި އިރު ރާއްޖޭގައި ހައްދާ ޕެޝަން ފްރުޓްގެ އަގު ހުރީ ކިލޯއެއް 88 ރުފިޔާއަށެވެ.
ހަމައެއާއެކު އަނބު ކިލޯއެއް 120 ރުފިޔާއަށް، ފަޅޯ ކިލޯއެއް 30 ރުފިޔާއަށް، ކަރާ ކިލޯއެއް 17 ރުފިޔާއަށް، ފެހި މިރުސް ކިލޯއެއް ހުރީ 74 ރުފިޔާއަށެވެ. އަދި ކުރިން 153 ރުފިޔާއަށް ވިއްކަމުން ދިޔަ ރަތް މޭބިސްކަދުރު ކިލޯއެއް މިހާރު ހުރީ 139 ރުފިޔާއަށެވެ.
އެސްޓީއޯއިން ވިއްކާ މުގު ކިލޯއެއްގެ އަގު 42 ރުފިޔާއަށް ހުރިއިރު، ކާއްޓެއްގެ އަގު 25 ރުފިޔާއަށް އަދި ބިހުގެ އަގު ހުރީ 2 ރުފިޔާއަށެވެ.
