އަލީ ނަދީމް އާއެކު އިތުރު ހަ މީހަކު ބައިވެރިވެގެން އައްޑޫ ސިޓީގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރި ކުރި ތުހުމަތުގައި ހައްޔަރު ކުރި އެ ހަތް މީހުން ދޫކޮށްލައިފިއެވެ.
ޕްރޮސެކިއުޓާ ޖެނެރަލް އޮފީސް (ޕީޖީ) އިން ބުނީ، ސ. ހިތަދޫ، ކޮންމުލި، އަލީ ނަދީމް އާއި، އިތުރު ބަޔަކު ބައިވެރިގެން އައްޑޫ ސިޓީގައި ފުޅާ ދާއިރާއަކަށް މަސްތުވާތަކެތި ވިއްކައި ވިޔަފާރިކޮށް، އެކަމުން ހޯދާ ފައިސާ ލޯންޑާ ކުރާ ކަމަށް ތުހުމަތު ކުރެވޭ މައްސަލައިގެ ތަހުގީގު މުއްދަތު މިއަދުގެ ނިޔަލަށް ހަމަވެފައިވާ ކަމަށެވެ.
ނަދީމްގެ އިތުރުން މި މައްސަލައިގައި ތުހުމަތު ކުރެވޭ މީހުން:
- ސ. ހިތަދޫ، ވެޔޮފެހެބުރުގެ، އިބްރާހީމް ސިރާޖް
- ސ. ހިތަދޫ، ދޮރުފޮތިމާގެ، ހަސަން އަލްފާފު
- ސ. ހިތަދޫ، ކެކުރިމާގެ، އަމީން މުހައްމަދު
- ސ. ހިތަދޫ، ލޮބްސްޓަމް، ސަލާމް ސައީދު
- ސ. ހިތަދޫ، ފަލާހް، ހާފިޒް ފައުޒީ
- ދ. ހުޅުދެލި، އަންބަރީގެ، ޒަހްނާ އަހްމަދު
މި މައްސަލައިގައި މި މީހުންގެ މައްޗަށް ކުރެވޭ ތުހުމަތު:
- ގާނޫނު ނަންބަރު 9/2014 ގެ 720 ވަނަ މާއްދާގެ ދަށުން، ކުށް ކުރާ ޖަމާއަތެއްގައި ބައިވެރިވުމުގެ ކުށް.
- ގާނޫނު ނަންބަރު: 10/2014 ގެ 53 ވަނަ މާއްދާގެ ދަށުން މަނީ ލޯންޑްރިންގެ ކުށް.
މައްސަލަ ތަހުގީގު ކުރުމަށް ގާނޫނުގައި ކަނޑައެޅިފައިވާ މުއްދަތު ހަމަވުމާ ހަމައަށް ލިބިފައިވާ ހެކި ގަރީނާ ވަޒަންކޮށް ބެލިއިރު، މި މައްސަލާގައި ތުހުމަތުކުރެވޭ މީހުން، ކުށްކުރާ ޖަމާއަތެއްގައި ބައިވެރިވިކަން ނުވަތަ މަނީ ލޯންޑާ ކުރިކަން ގާނޫނުގައި ކަނޑައެޅިފައިވާ މިންގަނޑަށް ސާބިތުކޮށްދެވޭ މިންވަރަށް ހެކި ގަރީނާ ލިބިފައި ނުވާ ކަމަށް ޕީޖީ އޮފީހުން ބުނެއެވެ. މި މައްސަލައިގެ ތަހުގީގު މުއްދަތު ގާނޫނު ތަންދޭ އެންމެ ދިގު މުއްދަތާ ހަމައަށް އެކި ފަހަރު މަތިން އިތުރުކޮށްދީފައިވާ ކަމަށް ވެސް ޕީޖީ އިން ބުނެއެވެ. ނަމަވެސް، އެ މުއްދަތުގެ ތެރޭގައި ތަހުގީގު އެކަށީގެންވާ ވަރަށް ފުރިހަމަކުރެވި، ދައުވާ ކުރެވޭ މިންވަރަށް ހެކި ގަރީނާ ހޯދިފައި ނުވާ ކަމަށް ވެސް އެ އޮފީހުން ބުނެއެވެ.
ޖިނާއީ އިޖުރާއަތުގެ ގާނޫނުގެ 94 ވަނަ މާއްދާގެ (ކ) ގައި، ތަހުގީގު ކުރުމަށް ކަނޑައެޅިފައިވާ މުއްދަތުގެ ތެރޭގައި ދައުވާ ކުރެވޭ މިންވަރަށް ހެކި ލިބިފައި ނުވާ ނަމަ، ތަހުގީގީ އިދާރާއިން އެ މީހަކު ބަންދުން ދޫކޮށްލަންވާނެ ކަމަށް ބަޔާންކޮށްފައި ވެއެވެ. އެހެންކަމުން އެ ނިންމުމާއެކު މައްސަލާގައި ތުހުމަތުކުރެވޭ މީހުންގެ ތެރެއިން ބަންދުގައި ތިބި މީހުން ބަންދުން ދޫކޮށްލުމަށް ލަފާ ދީފައިވާ ކަމަށް ވެސް ޕީޖީ އިން ބުނެއެވެ.
މި މައްސަލާގައި ދައުވާ ކުރެވޭ މިންވަރަށް މިވަގުތަށް ހެކި ގަރީނާ ލިބިފައި ނުވާތީ މައްސަލަ ޑިކްލައިން ކުރި ނަމަވެސް، އާ ހެކި ލިބިއްޖެ ހާލަތެއްގައި، ޖިނާއީ އިޖުރާއަތުގެ ގާނޫނުގެ 94 ވަނަ މާއްދާގެ (ވ) ގެ ދަށުން އަލުން ދައުވާ ކުރުމަށް އެދި ހުށަހެޅުމަށް ފުލުހުންނަށް ލަފާ ދީފައިވާ ކަމަށް ޕީޖީ އިން ބުނެއެވެ.
އޮޕަރޭޝަން އަލިމަގުގެ ދަށުން އައްޑޫގައި ހިންގި އޮޕަރޭޝަންގައި ނަދީމް އާއި އިތުރު ބަޔަކު ހައްޔަރުކޮށްފައި ވަނީ މިދިޔަ އަހަރުގެ ނިވެމްބަރު މަހުގެ ފަހުކޮޅުއެވެ. މި މައްސަލައިގައި ހައްޔަރުކުރި މީހުންނަކީ 2017 އިން ފެށިގެން މަސްތުވާތަކެތީގެ ވިޔަފާރި ކުރަމުންދާކަން ތަހުގީގަށް ހޯދިފައިވާ ބައެއް ކަމަށް އޭރު ފުލުހުން ބުނެފައި ވެއެވެ. އަދި ފާއިތުވި 5 އަހަރު ދުވަހުގެ ތެރޭގައި އެ ނެޓްވޯކްގެ އިސް 4 މީހެއްގެ އެކައުންޓްގައި 19 މިލިއަނަށްވުރެ ގިނަ ދިވެހި ފައިސާ ދައުރުކޮށްފައިވާ ކަމަށް ވެސް ފުލުހުން ވަނީ ބުނެފައެވެ.
