އައްޑޫ ސިޓީ ގަމަކީ ދިވެހިރާއްޖޭގެ ތާރީހުގައި، ހާއްސަކޮށް ވިހިވަނަ ގަރުނުގެ ތާރީހުގައި ވަރަށް ފާހަގަކޮށްލެވޭ ރަށެކެވެ. ދެވަނަ ބޮޑު ހަނގުރާމައިގެ ދުވަސްވަރު އިނގިރޭސި އަސްކަރިއްޔާގެ މުހިންމު މަރުކަޒެއްގެ ގޮތުގައި ގަން ބޭނުންކުރުމަކީ އެ ރަށުގެ އާސާރީ އަދި ތާރީހީ ސޫރަ މުޅިން ބަދަލުކޮށްލި ކަމެކެވެ. މިގޮތުން ގަމުގައި ހުރި އެންމެ މުހިންމު އެއް ބިނާއަކީ "ބްރިޓިޝް ވާ މެމޯރިއަލް" ނުވަތަ އިނގިރޭސި ހަނގުރާމައިގެ ހަނދާނީ ބިނާއެވެ.
ދެވަނަ ބޮޑު ހަނގުރާމަ ހިނގަމުންދިޔަ ދުވަސްވަރު އިނގިރޭސި ރޯޔަލް އެއާ ފޯސް އިން އައްޑޫގައި "ޕޯޓް ޓީ" ގެ ނަމުގައި ސިއްރު އަސްކަރީ މަރުކަޒެއް ގާއިމުކުރިއެވެ. އިންޑިއާ ކަނޑުގެ ސަލާމަތާއި އިނގިރޭސި އިސްތިއުމާރީ ބާރުތަކުގެ މެދުގައި މުވާސަލާތީ ގުޅުންތައް ދެމެހެއްޓުމަށް ގަމަކީ ސްޓްރެޓީޖިކް ގޮތުން ވަރަށް މުހިންމު ތަނަކަށް ވިއެވެ.
މި މަރުކަޒުގައި ހިދުމަތް ކުރަމުންދަނިކޮށް، ހަނގުރާމައިގެ ތެރޭގައާއި އެކި އެކި ބަލިމަޑުކަމުގައި މަރުވި އިނގިރޭސި ސިފައިންގެ ހަނދާނުގައި މި ބިނާ ބިނާކުރެވުނެވެ.
މި ބިނާ އާއި ގުޅިގެން "ދަ ޕްރެސް" އަށް މައުލޫމާތު ދެއްވަމުން އައްޑޫ ސިޓީ ކައުންސިލްގެ ހެރިޓޭޖު ކޮންސަލްޓެންޓު އަލީ ފަހުމީ އަހުމަދު ވިދާޅުވީ މި ބިނާ އަކީ އައްޑޫއަށް ވަރަށް ހާއްސަ ބިނާއެއް ކަމަށާއި، މި ބިނާގައި ދިވެހިވަންތަ ހާއްސަ ކަމެއް ނެތަސް މިތަނަކީ އައްޑޫގެ ތާރީހު ރަމްޒުކޮށްދޭ މުހިންމު ތަނެއް ކަމަށެވެ.
ގަމުގެ އިރުމަތީ ފަރާތު އަތިރިމައްޗާ ކައިރީގައި ހުންނަ މި ބިނާއަކީ ހުދުކުލައިގެ އޮބެލިސްކް ބިނާއެކެވެ. މި ބިނާގެ ބޭސް ނުވަތަ ބިންގަލުގެ ވަށައިގެން ހަނގުރާމައިގައި މަރުވި ސިފައިންގެ ނަންތައް ލިޔެފައިވާ ބްރޮންޒް ފިލާގަނޑުތަކެއް ހަރުކުރެވިފައިވެއެވެ.
މީގެ އިތުރުން، މި ބިނާގެ ދެފަރާތުގައި ދެވަނަ ބޮޑު ހަނގުރާމައިގެ ދުވަސްވަރު ބޭނުންކުރި ބޮޑު ދެ ބަޑި ބެހެއްޓިފައިވެއެވެ. މި ބަޑިތަކަކީ އެ ޒަމާނުގައި ރަށުގެ ސަލާމަތަށްޓަކައި އަތިރިމަތީގައި ބަހައްޓާފައި ހުރި ހަތިޔާރުތަކެކެވެ.
މި ބިނާގެ މުހިންމީ ހަމައެކަނި އިނގިރޭސިންނަކަށް ނޫނެވެ. މިއީ އައްޑޫގެ ފަސްގަނޑުގައި ދުނިޔޭގެ ބޮޑު ހަނގުރާމައިގެ އަސަރުތައް ހުރިކަން އަންގައިދޭ ދިރިހުރި ހެއްކެކެވެ. ގަމަށް ޒިޔާރަތްކުރާ ފަތުރުވެރިންނާއި، ތާރީހު ދިރާސާކުރާ މީހުންނަށް މިއީ މިއަދުވެސް ވަރަށް ޝައުގުވެރި ތަނެކެވެ.
އިނގިރޭސިވިލާތުގެ އިސް ބޭފުޅުންނާއި، ކުރީގެ ސިފައިން މި ބިނާއަށް ޒިޔާރަތްކޮށް މަރުވި މީހުންގެ ހަނދާން އާކުރާކަން ފާހަގަކޮށް ފަހުމީ ވިދާޅުވީ އިނގިރޭސި ހައި ކޮމިޝަނުންނާއި އެފަދަ ބޮޑެތި މީސްމީހުން އަންނަ ދުވަސްދުވަހު މާ ބޮނޑި ޖެހުން ފަދަ ކަންކަން މިތާގައި ކުރާކަމަށެވެ.
ފަހުމީ އިތުރަށް ވިދާޅުވީ މިތަނަކީ ގަމުގެ ބެލުމުގެ ދަށުގައި އޮންނަ ތަނެއް ކަމަށާއި އެހެންކަމުން މިތަން މަރާމާތު ކުރުމާއި ކަންކަން ކުރިއަށް ގެންދަނީ އެ ފަރާތުން ކަމަށެވެ.
އައްޑޫ ގަން ބަލަހައްޓަނީ އެމްއެންޑީއެފް އަދި ގަން އިންޓަނޭޝަނަލް އެއާޕޯޓު ހިންގާ އައްޑޫ އިންޓަނޭޝަނަލް އެއާޕޯޓު ކުންފުނިންނެވެ. އެއާޕޯޓާއި އަސްކަރިއްޔާއިން ބަލަހައްޓާ ރަށެއް ކަމުން އެރަށުގެ ބައެއް ތަންތަނަށް ބޭނުންހާ ވަގުތެއްގައި ހުއްދަ ނެތި ނުދެވެއެވެ.
ބްރިޓިޝް ވާ މެމޯރިއަލްގެ އިތުރުން މިތަނުގައި އިނގިރޭސި ސިފައިން ފިލްމު ބެލުމަށްޓަކައި ގާއިމުކޮށްފައިވާ ސިނެމާ ތިއޭޓަރުތަކާއި އެ ނޫން އިމާރާތްތައްވެސް އެބަހުއްޓެވެ. މިތަންތަނުން އޭރު އެމީހުން ބޭނުންކޮށްފައި ހުރި ތަކެތި އަދިވެސް ފެންނަން ހުރެއެވެ.
ގަމުގެ ބްރިޓިޝް ވާ މެމޯރިއަލް އަކީ ދިވެހިރާއްޖޭގެ ތާރީހުގެ ތެރެއަށް ލާމެހިފައިވާ ބައިނަލްއަގުވާމީ ތާރީހީ ބިނާއެކެވެ. މިފަދަ ތަންތަން ރައްކާތެރިކޮށް ބެލެހެއްޓުމަކީ އައްޑޫގެ މުއްސަނދި ތާރީހު އަންނަން އޮތް ޖީލުތަކަށް ފޯރުކޮށްދިނުމަށްޓަކައި ކުރަންޖެހޭ މުހިންމު މަސައްކަތެކެވެ.
މިއީ ހަނގުރާމައިގެ ބިރުވެރިކަމާއި އިންސާނީ ގުރުބާނީތައް ހަނދާންކޮށްދޭ އަދި ސުލްހައިގެ އަގު ވަޒަންކުރަން ދަސްކޮށްދޭ ރަމްޒެކެވެ.
