ސަރުކާރަށް 500 މިލިއަން ޑޮލަރުގެ ލޯނެއް ހޯދުމަށް ކުޑަކުދިންނަށް ޖިންސީ ގޯނާ ކުރުމުގެ އިތުރުން އެ ކުދިންގެ ބަރަހަނާ މަންޒަރު ވީޑިއޯކޮށް ބްލެކްމެއިލްކުރި ޖެފްރީ އެޕްސްޓީންގެ އެހީތެރިކަން ކުރީގެ ރައީސް ޑރ. މުހައްމަދު ވަހީދު ހޯދެއްވިކަން ހާމަވެއްޖެއެވެ.
ރައީސް ވަހީދު ޖެފްރީ އެޕްސްޓީންގެ އެހީތެރިކަން ހޯދިކަމާށާއި އޭނާއާ ބައްދަލުކުރެއްވިކަން އެނގޭ ލިޔެކިޔުންތަކެއް ވަނީ އާންމުވެފައެވެ.
އާންމުވެފައިވާ ލިޔެކިޔުންތަކުން އެނގޭ ގޮތުގައި ލޯނު ހޯދުމުގައި އެހީތެރިވެދިނުމަށް އެދި ރައީސް ވަހީދު ވަނީ މެއިލެއް ފޮނުވާފައެވެ. އެ މެއިލްގައި ސަރުކާރަށް 500 މިލިއަން ޑޮލަރުގެ ލޯނެއް ހޯދުމަށް މަސައްކަތް ކުރަމުންދާ ކަމަށާއި އެކަމާ އޭރުގެ ފިނޭންސް މިނިސްޓަރު (އަބްދުﷲ ޖިހާދު)އާ މަޝްވަރާ ކުރެއްވި ކަމަށް ވިދާޅުވެފައިވެއެވެ.
ލޯނު ބޭނުންވަނީ 10 އަހަރުގެ ތެރޭގައި އަނބުރާ ދައްކާ ގޮތަށް 1 އަހަރުގެ ގްރޭސް ޕީރިއަޑް ހިމެނޭ ގޮތަށް ކަމަށް ވެސް އެ މެއިލްގައި ރައީސް ވަހީދު ވިދާޅުވެފައިވެއެވެ.
މީގެއިތުރުން އާންމުވެފައިވާ ލިޔެކިޔުންތަކުން އެނގޭ ގޮތުގައި އިޒްރޭލުގެ ކުރީގެ ރައީސް އިހޫދު ބަރާކަށް ޖެފްރީ އެޕްސްޓީން ފޮނުވި މެއިލްތަކެއްގައި ބުނެފައިވަނީ ދިވެހިރާއްޖޭގެ ކުރީގެ ރައީސެއްގެ ބައްދަލުވުމެއް އޮންނާނެ ކަމަށެވެ. ޖުލައި 28، 2012ގައި ފޮނުވި އެ މެއިލްގައި އެއީ ކޮން ރައީސެއްކަން ބުނެފައި ނުވާއިރު އެ ބައްދަލުވުންކުރިއަށް ގެންދިޔަކަން އީމެއިލްތަކުން ކަށަވަރެއް ނުވެއެވެ.
އެއީ އޭޕްރީލް 28، 2014ގައި ފޮނުވާފައިވާ އީމެއިލްއެއް ކަމަށްވާއިރު، އެ ތާރިހާ ހިސާބަށް ރާއްޖޭގެ ވެރިކަން ކުރައްވާފައި ވަނީ ރައީސް މައުމޫން އަބްދުލްގައްޔޫމާއި ރައީސް މުހައްމަދު ނަޝީދުގެ އިތުރުން ކުރީގެ ރައީސް ޑރ. މުހައްމަދު ވަހީދުއެވެ.
މެއިލް ފޮނުވި ތާރީހުގައި ރައީސް މައުމޫން ހުންނެވީ ސްރީލަންކާގައި ކަމާއި ނަޝީދު ހުންނެވީ ރާއްޖޭގައިކަން އެނގޭ މީސް މީޑިއާ ޕޯސްޓްތަކެއް ވެސް މިފަހުން ވަނީ ދައުރުވެފައެވެ.
ގިނަ އަދަދެއްގެ ކުދިންނަށް ޖިންސީ ގޯނާ ކުރުމާއި އެ ކުދިންގެ ބަރަހަނާ ފޮޓޯ ގެންގުޅުމުގެ ތުހުމަތުގައި ޖެފްރީ އެޕްސްޓީން ހައްޔަރުކުރީ 2005 އަހަރުއެވެ. އަދި 2008 ވަނަ އަހަރު އޭނާއަށް 18 މަސް ދުވަހުގެ ޖަލު ހުކުމެއް އައެވެ. ނަމަވެސް 13 މަސް ދުވަހަށްފަހު އޭނާވަނީ މިނިވަންވެފައެވެ.
އޭގެފަހުން 2019 ވަނަ އަހަރު އަނެއްކާވެސް އޭނާ ހައްޔަރުކުރިއެވެ. އެ އަހަރުގެ އޮގަސްޓުމަހުގެ 19 ވަނަ ދުވަހު ޖެފްރީ އެޕްސްޓީން ފެނުނީ އޭނާ ހައްޔަރުކޮށް، ބަހައްޓާފައި ހުރި ޖަލު ގޮޅީގައި މަރުވެފަ ހުއްޓައެވެ.