މި ރޯދަ މަހު 'ދަ ޕްރެސް' އިން ކިޔުންތެރިންނަށް މި ދޫކޮށްލަނީ، ދުނިޔޭގެ އެކި ކަންކޮޅުތަކުން ކޮންމެހެން ވެސް ދަތުރުކޮށްލަން ރަނގަޅު ގައުމުތަކާ، އެ ގައުމުތަކުގައިވާ ހާއްސަ ތަންތަނެވެ. ބަލާލާ ހިތްވާ ފަދަ ތާރީހީ ބިނާތަކާ، ވާދީތަކާ، އަޖައިބުން ފުރިގެންވާ އެތައް ޝައުގުވެރި ވާހަކަތަކެވެ.
އެގޮތުން މި ލިޔުމުގައި ވެސް ކިޔުންތެރިންނަށް ގެނެސްދޭން މިއުޅެނީ ހުޅަނގު އޭޝިއާއަށް ނިސްބަތްވާ ގައުމެއް ކަމަށް ތުރުކީއާއި ގުޅޭ ބައެއް މައުލޫމާތެެވެ. މިއީ ޗުއްޓީ ހޭދަ ކުރުމަށް ދިވެހީންގެ ތެރޭގައި އާންމު މަންޒިލަކަށްވާއިރު މި ގައުމުގައި ގިނަ އަދަދެއްގެ ދިވެހިން ދިރިއުޅެމުންވެސް ދެއެވެ. ކިޔެވުމަށާއި ވަޒީފާ އަދާ ކުރުމަށް ވެސް ގިނަ ދިވެހިން ދިރިއުޅެމުންދާ ތުރުކީގެ ވެރިކަން ކުރަނީ 'އަންކާރާ' ސިޓީގައެވެ.
މެޖޯރިޓީ މުސްލިމުން އުޅޭ މި ގައުމުގައި ފައިސާގެ ގޮތުގައި ބޭނުން ކުރަނީ 'ޓާކިޝް ލިރާ' އެވެ. 85 މިލިއަނަށްވުރެ ގިނަ މީހުން އުޅެމުން އަންނަ މި ގައުމަކީ މުއްސަނދި ތާރީހަކާއި ހިތްގައިމު ސަގާފީ އެތައް ކަމެއްގެ އިތުރުން އެ މީހުންގެ މީރު ކާނާއިން މަޝްހޫރު ގައުމެކެވެ. މީގެ އިތުރުން ވެސް ބަލާލަން ރީތި އެތައް ތަނެއް އެކުލެވޭ ތުރުކީއަކީ ފަތުރުވެރިންގެ މެދުގައި މަގްބޫލު މަންޒިލެކެވެ.
ރާއްޖެ އާއި 5،521 ކިލޯމީޓަރު ދުރުގައި އޮންނަ ތުރުކީ އަށް ދިއުމަށް 10 ވަރަކަށް ގަޑިއިރު ހޭދަވެއެވެ. ޓިކެޓުގެ އަގު އާންމު ގޮތެއްގައި އުޅެނީ 800-1100 ޑޮލަރާއި ދެމެދުގެ އަގެއްގައެވެ. ނަމަވެސް އެކި ދުވަސްވަރާ ދިމާކޮށް ޓިކެޓުގެ އަގަށް ބަދަލު އައުމަކީ އެކަށީގެންވާ ކަމެކެވެ. ދެން މި ގެނެސްދެނީ ތުރުކީއަށް ގޮސް ޒިޔާރަތްކޮށްލަން ރަނގަޅު ތަންތަނުގެ މައުލޫމާތެވެ.
ސަގާފީ އެތައް ކަމަކުން ބަރާ ވެފައިވާ އިސްޓަންބުލް:
އިސްޓަންބުލް އަކީ ތުރުކީގެ އެންމެ ބޮޑު އެއް އަވަށެވެ. މިއީ ސަގާފީ އެތައް ކަމަކުން މަޝްހޫރު އަވަށަކަށްވާއިރު މިތަނުގައި އެ ގައުމުގެ މީރު ކާނާ ތަކަށްވެސް ވެސް މަޝްހޫރެވެ.
މި އަވަށުގައި ހިމެނޭ 'ބްލޫ މޮސްކް'، 'ސުލްމޭނިއާ މޮސްކް'ގެ އިތުރުން ގްރޭންޑް ބާޒަރަކީ ޒިޔާރަތް ކޮށްލަން ހިތްގައިމު ތަންތަނެވެ. 5,461 ކިލޯމީޓަރުގެ ބޮޑު މި އަވަށަކީ ފަތުރުވެރިންގެ މެދުގައި މަގްބޫލު އަވަށެކެވެ. އަދި މިތަނުގައި އެކުލެވޭ މީރު ކާނާތަކަކީވެސް ތަޖުރިބާ ކޮށްލުމަށް ރަނގަޅު ކަމެއް ކަމުގައި ދެކެމެވެ.
'ހޮޓް އެއާ ބެލޫން' އާއި ގުދުރަތީ ހިތްގައިމުކަން ތަޖުރިބާ ކޮށްލުމަށް 'ކެޕްޕަޑޯޝިއާ':
ތުރުކީގެ މެދު ތެރޭގައި ހިމެނޭ ސަރަހައްދެއް ކަމަށްވާ ކެޕްޕަޑޯޝިއާ އަކީ ހޮޓް އެއާ ބެލޫންގެ ތަޖުރިބާ ކޮށްލުމަށް މަޝްހޫރު ތަނެކެވެ. މީގެ އިތުރުން ވެސް ގަލުން އުފެދިފައިވާ އެކި އެކި ބިނާ ތަކާއި ބިންގަރާސްގެ އިތުރުން ގަލުގައި ކަނޑާ ނަގާފައިވާ ގެ ތަކަކީ މި ސަރަހައްދަށް މަޝްހޫރު ތަންތަނެވެ.
އިސްޓަންބުލް އިން މި ސަރަހއްދަށް ޓްރެއިން މެދުވެރިކޮށް ދަތުރުކުރެވެއެވެ. މިތަނަކީ ވެސް ގުދުރަތީ އަޖައިބުތަކާއި މުއްސަނދި ތާރީހީ ސަގާފީ އެތައް ކަމެއް ތަޖުރިބާ ކޮށެލެވޭނެ ފަދަ ހިތްގައިމު މަންޒިލެކެވެ.
ތަފާތު އެކި ވައްތަރުގެ ޔޮޓުތަކުން ޖަރީވެފައިވާ އަންތާލްޔާ:
ރީތި ނަލަ ގޮނޑު ދޮށާއި ހިތްގައިމު ބޮޑެތި ޔޮޓުތަކުން ފުރިފައިވާ އަންތާލްޔާއަކީ ރިސޯޓެކެވެ. މިތަން މަޝްހޫރުވެފައި ވަނީ ރީތި މޫދަކާއި ބޮޑު ބަނދަރެއްގެ އިތުރުން ހިތްގައިމު ތަޖުރިބާއެއް ކޮށްލުމަށް ނިކަން ރަނގަޅު ސަރަހައްދެއްގެ ގޮތުގައެވެ.
މީގެ އިތުރުން ވެސް މިތަނުގައި ފެން އާރަކާއި ކަނޑު އަޑީގެ ރީތިކަން ދައްކުވާދޭ އެކުއޭރިއަމް އެއް އެކުލެވެއެވެ. އެހެންކަމުން ތުރުކީއަށް ދަތުރު ރާވާނަމަ މިއީ ޒިޔާރަތް ކޮށްލުަމށް ރަނގަޅު މަންޒިލެކެވެ.
ޕަމުއްކަލެ (ކަފައިގެ ގަނޑުވަރު):
ތުރުކީގެ ހުޅަނގު ދެކުނުގައި އޮންނަ ޑެނިޒްލީ ޕްރޮވިންސުގައި ހިމެނޭ ޕަމުއްކަލެ އަކީ ތުރުކީ ބަހުން ނަމަ ކަފައިގެ ގަނޑުވަރެވެ. މިތަނަށް މި ނަން ދެވިފައި ވަނީ ކާބަނޭޓް މިނަރަލްގެ ސަބަބުން އުފެދިފައިވާ ކަފައިގެ ހިތްގައިމު ކަމުގެ މައްޗަށެވެ. ކުދި ކުދި ފެން އާރުތައް ސިފަ ވާގޮތަަށް ގުދުރަތުން އުފެދިފައިވާ މިތަނަކީ ވެސް ފަތުރުވެރިންގެ މެދުގައި މަގްބޫލު ސަރަހައްދެކެވެ.
ކޮންމެ އަހަރަކުވެސް މިތަނަށް ގިނަ އަދަދެއްގެ ފަތުރުވެރިން ޒިޔާރަތް ކުރާއިރު މިތަނުގައި އުފެދިފައިވާ ފެންގަނޑު ތެރޭ ފަތާ އާއިލާ އާއެކު މަޖާ ވަގުތު ކޮޅެއް ހޭދަ ކުރުމަށް މިއީ ރަނގަޅު ތަނެކެވެ.
މީގެ އިތުރުން ވެސް ތުރުކީގައި ޗުއްޓީ ހޭދަ ކުރުމަށް ތަފާތު އެކިތަންތަން ވެއެވެ. ގުދުރަތީ ހިތްގައިމުކަމުން ފުރިގެންވާ ތުރުކީ އަކީ އަޖައިބުން ފުރިގެންވާ ރީތި މާހައުލެކެވެ.
