ޕީޕަލްސް ނެޝަނަލް ފްރަންޓް (ޕީއެންއެފް) އަދި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ)އިން އަހަރީ ރިޕޯޓް ހުށަހަޅާފައި ނުވާ ކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.

ސިޔާސީ ޕާޓީގެ ގާނޫނުގެ 6 ވަނަ މާއްދާގެ (ކ)ގެ ދަށުން ކޮންމެ އަހަރަކު ވެސް ސިޔާސީ ޕާޓީތަކުން އަހަރީ ރިޕޯޓް ހުށަހަޅަން ހުށަހަޅަންޖެހެއެވެ.

އީސީއިން އާންމު ކުރި ތަފާސްހިސާބުތަކުން ދައްކާގޮތުގައި ދަ ޑިމޮކްރެޓްސްއިން ވެސް އަހަރީ ރިޕޯޓް ހުށަހަޅާފައި ވަނީ އަހަރީ ރިޕޯޓު ހުށަހަޅަންޖެހޭ މުއްދަތަށްވުރެ ފަހުންނެވެ. މާޗު 1ގައި އަހަރީ ރިޕޯޓު ހުށަހަޅަން އީސީއިން އަންގާފައިވީ ނަމަވެސް ޑިމޮކްރެޓްސްއިން އަހަރީ ރިޕޯޓް ހުށަހަޅާފައި މާޗު މަހުގެ 2 ވަނަ ދުވަހުއެވެ.

މޯލްޑިވްސް ނެޝަނަލް ޕާޓީ (އެމްއެންޕީ)އިން މާޗު މަހުގެ 1 ވަނަ ދުވަހު އަހަރީ ރިޕޯޓް ހުށަހަޅާފައިވާއިރު އެހެން ޕާޓީތަކުން ވަނީ ފެބްރުއަރީ މަހުގެ ތެރޭގައި އަހަރީ ރިޕޯޓް ހުށަހަޅާފައެވެ.

އެގޮތުން އެންމެ ފުރަތަމަ އަހަރީ ރިޕޯޓް ހުށަހަޅާފައި ވަނީ ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިންނެވެ. އެމްޑީޕީއިން ވަނީ ފެބްރުއަރީ މަހުގެ 17 ވަނަ ދުވަހު އަހަރީ ރިޕޯޓް ހުށަހަޅާފައެވެ.

ސަރުކާރުގެ މައި ޕާޓީ ކަމަށްވާ ޕީޕަލްސް ނޭޝަނަލް ކޮންގްރެސް (ޕީއެންސީ)އިން އަހަރީ ރިޕޯޓް ހުށަހަޅާފައި ވަނީ ފެބްރުއަރީ މަހުގެ 26 ވަނަ ދުވަހުއެވެ.