ރައީސް ޑރ. މުހައްމަދު މުއިއްޒު، ޓޫރިޒަމް މިނިސްޓަރު އިބްރާހީމް ފައިސަލް މަގާމުން ވަކިކުރައްވައިފިއެވެ.
ރައީސް އޮފީހުން ބުނީ، ޓޫރިޒަމް މިނިސްޓަރުގެ މަގާމުން ފައިސަލް ވަކިކުރައްވައި އެ މިނިސްޓްރީ ވަގުތީގޮތުން ހިންގަން އިކޮނޮމިކް މިނިސްޓަރު މުހައްމަދު ސައީދާ ރައީސް ހަވާލުކުރައްވާފައިވާ ކަމަށެވެ.
ފައިސަލް ވަކިކުރެއްވި ސަބަބެއް ރައީސް އޮފީހުން ހާމައެއް ނުކުރެއެވެ.
އެހެންކަމުން ފައިސަލް ވެގެން ދިޔައީ މި ސަރުކާރަށް ރައީސް އައްޔަންކުރެއްވި ވަޒީރުންގެ ތެރެއިން އެމަނިކުފާނު ވަކިކުރެއްވި ފުރަތަމަ ވަޒީރަށެވެ.
ފައިސަލަކީ ވެރިކަން ކުރާ ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲގެ ދަރިކަލުންނެވެ.
ރާއްޖޭގެ އިގްތިސާދުގެ މައި އެއް ސިނާއަތް ކަމަށްވާ ފަތުރުވެރިކަމުގެ ކަންކަން ބެލެހެއްޓުމުގެ ޒިންމާ، އެ ދާއިރާއިން މާ ބޮޑު ތަޖުރިބާއެއް ހޯއްދަވާފައިނުވާ ފައިސަލާ ހަވާލުކުރުމުން ސަރުކާރަށް ކުރީކޮޅު ފާޑުކިއުން އަމާޒުވެފައިވެއެވެ.
