ރައީސް ޑރ. މުހައްމަދު މުއިއްޒު އޭނާ އާ ހަވާލުކުރެއްވި މަސައްކަތް ކުރައްވާފައި ވާނީ އިހުލާސްތެރިކަމާއި ތެދުވެރިކަމާ އެކު، ގާބިލްކަން ހުރި މިންވަރަކުން ކަމަށް، ކުރީގެ ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެއެވެ.
ފައިސަލް ޓޫރިޒަމް މިނިސްޓަރުކަމުން ވަކިކުރައްވައި ވަގުތީގޮތުން ޓޫރިޒަމް މިނިސްޓްރީ ހިންގުމަށް އިކޮނޮމިކް މިނިސްޓަރު މުހައްމަދު ސައީދާ ހަވާލުކުރައްވަން ރައީސް ނިންމެވީ މިދިޔަ އަންގާރަ ދުވަހުގައެވެ. ނަމަވެސް ފައިސަލް ވަކިކުރެއްވި ސަބަބެއް ރައީސް އޮފީހުން ހާމަނުކުރެއެވެ.
އެކަމާ ގުޅިގެން ނެރުއްވި ބަޔާނެއްގައި ފައިސަލް ވިދާޅުވީ، ޓޫރިޒަމް މިނިސްޓަރުގެ މަގާމުގައި ހިދުމަތްކުރުމަށް އޭނާ އަށް ލިބުނު ފުރުސަތަށް ޝުކުރުވެރިވެ ވަޑައިގަންނަވާ ކަމަށާއި، ގައުމަށާއި ރައްޔިތުންނަށް ހިދުމަތްކުރުމަށް ލިބުނު ފުރުސަތާ މެދު ފަހުރުވެރިވެ ވަޑައިގަންނަވާ ކަމަށެވެ.
"ވޭތުވެދިޔަ ތަނުގައި، އަޅުގަނޑާ ހަވާލުކުރެއްވި މަސައްކަތް އަޅުގަނޑު އަދާކޮށްފައި ވާނީ ޝައުގުވެރިކަމާއި އިހްލާސްތެރިކަމާ އެކު ތެދުވެރިވެ ހުރެއެވެ. އަޅުގަނޑު ގާބިލިއްޔަތު ތަންދިން އެންމެ އުސް ދަރަޖައިގައި ވަރުބަލިނުވެއެވެ. އަޅުގަނޑާ ހަވާލުކުރެއްވި ޓޫރިޒަމްގެ އަމާޒުތަކަށް ވާސިލުވާން މަސައްކަތްކޮށްފައި ވާނީ ދިވެހި ރައްޔިތުންނާ ގާތުންނެވެ. ބަދަލުވަމުންދާ ދުނިޔޭގެ ފަތުވެރިކަމަށް ބަލައިގެނެވެ." ފައިސަލްގެ ބަޔާނުގައި ވެއެވެ.
މިދިޔަ އަހަރު ސަރުކާރުން ކަނޑައެޅި އެއް ލަނޑުދަނޑި ކަމަށްވާ ދެ މިލިއަން ފަތުރުވެރިން ރާއްޖެ ގެނައުމުގެ އަމާޒަށް ވާސިލްވެވުނުކަން ފާހަގަކުރައްވައި، އެއީ ދިވެހި ތާރީހުގައި ބޮޑު ކާމިޔާބެއް ގޮތުގައި ފައިސަލް ސިފަކުރެއްވިއެވެ.
އޭނާގެ ވަޒީރުކަމުގައި ރައީސާއި ވަޒީރުންނާއި އެމްއެމްޕީއާރުސީ އާއި މަޓާޓޯގެ އިތުރުން ޓޫރިޒަމް މިނިސްޓްރީގެ މުވައްޒަފުންގެ ފަރާތުން އެއްބާރުލުން ލިބުނުކަން ފާހަގަކުރައްވައި ފައިސަލް ޝުކުރު އަދާކުރެއްވިއެވެ.
އެއާއެކު ރާއްޖޭގެ ފަތުރުވެރިކަން ކުރިއެރުވުމަށްޓަކައި އަޅަން ޖެހޭ ބައެއް ފިޔަވަޅުތަކަށް ފައިސަލް އަލިއަޅުވާލެއްވިއެވެ. އެ ފިޔަވަޅުތަކަކީ:
- ފަތުރުވެރިކަމުގެ ސިނާއަތުގައި ޒުވާނުންނަށް ފުރުސަތު ފަހިކޮށްދީ ދިވެހިންގެ އަތްމައްޗަށް ދިވެހި ފަތުރުވެރިކަން ގެނައުން
- އިތުރު އެނދު ތަރައްގީކުރާނެ ފަންޑު ހޯދައިދިނުމާ އެކު ފަސޭހަ މާހައުލެއް ޒުވާނުންނަށް އުފައްދައިދިނުން
- ކުޑަ އިންޓްރެސްޓުގައި ލޯނު ދޫކޮށް ފަތުރުވެރިކަން ނެތް ސަރަހައްދުތަކަށް ލުއިތައް ހޯދައިދިނުން
- ލ. ހުޅިމެންދޫގައި ތަރައްގީކުރަން ނިންމާފައިވާ ޓޫރިޒަމް ޓްރެއިނިން ސްކޫލް އުފެދުން
- ތަރައްގީނުކުރެވި ހުރި ރިސޯޓުތައް ތަރައްގީކޮށް ބާޒާރަށް ގެނައުން
ދައުލަތަށް އެންމެ ބޮޑު އާމްދަނީއެއް ލިބެނީ ފަތުރުވެރިކަމުން ކަން ފާހަގަކުރައްވައި ފައިސަލް ވިދާޅުވީ އެ ސިނާއަތް ފުޅާކޮށް އިސްތިހާރުކުރުމަށް އެމްއެމްޕީއާރުސީ އަށް ދޫކޮށްފައިވާ ބަޖެޓު 25 މިލިއަން ޑޮލަރާއި 50 މިލިއަން ޑޮލަރުގެ އަދަދަކަށް ބަދަލުވެ ބަޖެޓު ބޮޑުވާން ޖެހޭ ކަމަށެވެ.
އަބަދު ވެސް އެދެނީ ރާއްޖޭގެ ފަތުރުވެރިކަމަށް އާރޯކަން ލިބުމަށް ކަމަށް ފައިސަލް ވިދާޅުވިއެވެ.
