ރާއްޖެއަށް ޒިޔާރަތްކުރާ ފަތުރުވެރިންގެ އަމާޒުގެ ތެރެއިން ދެ މިލިއަން ފަތުރުވެރިން އަންނަ މަހުގެ ތިން ވަނަ ހަފްތާތެރޭ ހާސިލް ކުރެވޭނެ ކަމުގެ ޔަގީން ކަން ޓޫރިޒަމް މިނިސްޓަރު އިބްރާހިމް ފައިސަލް ދެއްވައިފިއެވެ.
ފައިސަލް މިހެން ވިދާޅުވެފައި ވަނީ މި ސަރުކާރުގެ ހަފްތާ 52 ފާހަގަކުރުމުގެ ގޮތުން މިރޭ ބޭއްވުމަށް ހަމަޖެހިފައިވާ ހާއްސަ ރަސްމިއްޔާތް ފެށުމުގެ ކުރިން ސަންގް ޓީވީއަށް ދެއްވި މައުލޫމާތުގެ ތެރެއިންނެވެ. މި ވެރިކަމުގެ ދުވަސްވަރު ހާސިލް ކުރެވިފައިވާ ކަންކަން ހާމަ ކުރައްވަމުން ފައިސަލް ވިދާޅުވީ، ފަތުރުވެރިކަމުގެ ދާއިރާގައި ވެސް މި ވެރިކަމުގައި ވަރަށް ބައިވަރު ކަންކަން ހާސިލް ވަމުން އަންނަ ކަމަށާއި ފަތުރުވެރިކަން ކުރިއަރަމުން އަންނަ ކަމަށެވެ. އެ ގޮތުން ދެ މިއަލްނ ފަތުރުވެރިޔާ އަންނަ ޑިސެމްބަރު މަހުގެ ތިން ވަނަ ހަފްތާތެރޭގައި ރާއްޖެއަށް އަންނާނެ ކަން މިނިސްޓަރު ފާހަގަ ކުރެއްވިއެވެ.
މީގެ އިތުރުން މި ވެރިކަމުގައި ވެސް އެތައް ކަމެއް ހާސިލްކޮށްފައިވާ ކަމަށާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރައްވާ މަސައްކަތްފުޅަކީ ގައުމީ މަސައްކަތެއްގެ ގޮތުގައި ފައިސަލް ސިފަކުރެއްވިއެވެ.
2 މިލިނަ ްފަތުރުވެރިންގެ އަމާޒު ހާސިލް ވާނެ ކަމަށް ފައިސަލް ވިދާޅުވެފައިވާއިރު، ޓޫރިޒަމް މިނިސްޓްރީން އާންމުކުރި އެންމެ ފަހުގެ ތަފާސްހިސާބު ތަކުން ދައްކާ ގޮތުގައި މި މަހުގެ 16 ވަނަ ދުވަހުގެ ނިޔަލަށް ރާއްޖެއަށް ވަނީ ޖުމްލަ 1.76 މިލިއަން ފަތުރުވެރިން އައިސްފައެވެ. މިދިޔަ އަހަރު މި މުއްދަތާ ހަމައަށް ރާއްޖެއަށް އައިސްފައި ވާ ފަތުރުވެރިންގެ އަދަދަކީ 1.61 މިލިއަން ކަމަށްވާ އިރު، 2022 ވަނަ އަހަރު މި މުއްދަތުގައި ވަނީ 1.42 މިލިއަން ފަތުރުވެރިން އައިސްފައެވެ.
މި މަހުގެ 16 ދުވަހުގެ ތެރޭގައި ޖުމްލަ 92،166 ފަތުރުވެރިން އައިސްފައިވާ އިރު، މިދިޔަ މަހު ވަނީ 172،621 ފަތުރުވެރިން އައިސްފައެވެ. މުޅި އަހަރަށް ބަލާއިރު އެންމެ ގިނަ ފަތުރުވެރިން އައިސްފައި ވަނީ އަހަރުގެ ފުރަތަމަ ދެ މަހުއެވެ. އެގޮތުން ޖެނުއަރީ މަހު 192،385 ފަތުރުވެރިން އައިސްފައިވާ އިރު، ފެބްރުއަރީ މަހު ވަނީ 217،392 ފަތުރުވެރިން އައިސްފައެވެ.
މި އަހަރު ތެރޭ އެންމެ ގިނަ ފަތުރުވެރިން އައި ރިކޯޑު މުގުރާލާފައި ވަނީ، 10،213 ފަތުރުވެރިން ރާއްޖެއަށް އައި ފެބްރުއަރީ 10 ވަނަ ދުވަހެވެ.
މިހާތަނަށް އެންމެ ގިނަ ފަތުރުވެރިން ރާއްޖެއަށް ޒިޔާރާތް ކޮށްފައި ވަނީ ޗައިނާއިންނެވެ. އެގައުމުން 245،370 ފަތުރުވެރިން ރާއްޖެ އައިސްފައިވާ އިރު އެންމެ ގިނަ ފަތުރުވެރިން އައި ލިސްޓުގެ ދެވަނައިގައި އޮތީ 196،898 ފަތުރުވެރިންނާއެކު ރަޝިއާއެވެ. އަދި ޔޫކޭ ވަނީ 152،571 ފަތުރުވެރިންނާ އެކު އެ ލިސްޓުގެ ތިން ވަނައިގައެވެ. މިދިޔަ އަހަރު އެންމެ ގިނަ ފަތުރުވެރިން ރާއްޖެއަށް ޒިޔާރަތްކުރި އިންޑިއާ އޮތީ 107،382 ފަތުރުވެރިންނާއެކު މި ލިސްޓުގެ ހަ ވަނައިގައެވެ.
