ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް ބައިނަލްއަގްވާމީ ފެންވަރުގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑް ރާއްޖެއިން ފަސް ވަނަ ފަހަރަށް ދިފާއުކޮށްފިއެވެ.
ވޯލްޑް ޓްރެވަލް އެވޯޑްސްގެ "ވޯލްޑްސް ލީޑިންގް ޑެސްޓިނޭޝަން"ގެ އެވޯޑު ރާއްޖެއަށް ލިބުނުކަން އިއުލާންކުރެއްވީ ޕޯޗުގަލްގެ "ސެވޯއީ ޕެލެސް" ހޮޓެލްގައި ވޯލްޑް ޓްރެވެލް އެވޯޑްސްގެ ދުނިޔޭގެ ވަނަތަކަށް އެވޯޑް ދިނުމަށް ރޭ ބޭއްވި ހަފްލާގައެވެ.
މި ޝަރަފްވެރި އެވޯޑާއި ރާއްޖޭގެ ފަރާތުން ހަވާލުވެވަޑައިގަތީ ޓޫރިޒަމް މިނިސްޓަރު އިބްރާހިމް ފައިސަލްއެވެ.
އެވޯޑާއި ހަވާލުވެވަޑައިގަންނަވާ ފޮޓޯއާއެކު ފައިސަލް "އެކްސް" ގައި ހިއްސާ ކުރެއްވި ޕޯސްޓެއްގައި ވިދާޅުވީ އެ އެވޯޑު ރާއްޖެއަށް ލިބުނީ އެތައް ބައެއްގެ ބުރަ މަސައްކަތުން ކަމަށާއި އެ އެވޯޑާ ހަވާލުވާން ފުރުސަތު ލިބުމަކީ ލިބިގެންދިޔަ ފަހުރެއް ކަމަށެވެ.
"ވޯލްޑްސް ލީޑިންގް ޑެސްޓިނޭޝަން" އެވޯޑުގެ އިތުރުން "ވޯލްޑް ލީޑިން ގްރީން ޑެސްޓިނޭޝަން" އެވޯޑް ވެސް ރާއްޖެ އަށް ވަނީ ލިބިފައެވެ. ޑަބްލިއުޓީއޭއިން އިންތިޒާމު ކޮށްގެން ކުރިއަށްގެންދާ މި އޮވޯޑު ހަފްލާގައި ލިބިގެންދާ އެވޯޑުތަކަކީ ދުނިޔޭގެ ޓޫރިޒަމާއި ދަތުރުފަތުރުގެ ސިނާއަތުގައި ވެސް އެންމެ ޝަރަފުވެރި އަދި އެންމެ ފާހަގަކޮށްލެވޭ އެވޯޑުތަކެވެ.
"ވޯލްޑްސް ލީޑިންގް ޑެސްޓިނޭޝަން" އެވޯޑު ރާއްޖެއިން ފުރަތަކަ ފަހަރަށް ހާސިލް ކުރީ 2020 ވަނަ އަހަރުއެވެ. އޭގެ ފަހުން މިއީ ރާއްޖެއިން ވިދި ވިދިގެން އެ އެވޯޑު ހާސިލް ކުރާ ފަސްވަނަ ފަހަރެވެ.
