އާންމުން އެއްވެ އުޅޭ ސަރަހައްދުތައް އިތުރަށް މޮނިޓާ ކުރަން ފަށާފައިވާ ކަމަށް މޯލްޑިވްސް އިމިގްރޭޝަނުން ބުނެފިއެވެ.
އެފަދަ ސަރަހައްދުތައް އިމިގްރޭޝަނުން އިތުރަށް ބަލަން ފާށާފައި މިވަނީ އާންމު ސަރަހައްދުތަކަށް އެއްވެ އުޅޭ ބިދޭސީންގެ މެދުގައި ފަހަކަށް އައިސް އާއްމު މަސްލަހަތު ގެއްލޭފަދަ ކަންކަން ހިންގަމުންދާތީއެވެ.
އާއްމު މަސްލަހަތައް ނުރައްކާވާފަދަ އަމަލުތައް ތަކުރާރުވިއަ ނުދިނުމަށް މި ހަރަކާތް ސިލްސިލާކޮށް ކުރިއަށް ގެންދިއުމަށް ނިންމާފައިވާ ކަމަށްވެސް އިމިގްރޭޝަނުން ވަނީ ބުނެފައެވެ. "މިއަދު އިމިގްރޭޝަންގެ އެންފޯސްމަންޓް އެންޑް ކޮމްޕްލަޔަންސް ޑިވިޝަންގެ އޮފިސަރުން ވަނީ މި ސަރަހައްދުތައް މޮނިޓާކުރަން ފަށާފައި" އިމިގްރޭޝަނުން ބުންޏެވެ.
އަދި ހަމަ އެހެންމެ މި ހަރަކާތްތައް ކުރިއަށްދާއިރު ގަވާއިދާ ހިލާފަށް އުޅޭ ބިދޭސީންގެ މައްސަލައެއް ފާހަގަވެއްޖެނަމަ ޓާސްކުފޯހުން އެފަދަ ބިދޭސީންނާ މެދު ފިޔަވަޅު އަޅާނެ ކަމަށްވެސް އިމިގްރޭޝަނުން ބުނެއެވެ.
ފަހަކަށް އައިސް ދޭދޭ ބިދޭސީންގެ މެދުގައި ހަމަނުޖެހުން އިތުރުވެ އެފަދަ މައްސަލަތަކުގައި މާރާމާރީ ހިންގާ އާންމު މަސްލަހަތު ނަގާލުމަށް މަސައްކަތް ކުރަމުން ދެއެވެ. އެގޮތުން މި މަހުގެ 17 ވަނަ ދުވަހުވެސް އާޓިފިޝަލް ބީޗުގައި ބިދޭސީންތަކެއްގެ މެދުގައި މާރާމާރީއެއް ހިންގާފައިވާއިރު އެ މައްސަލައާއި ގުޅޭ ތިން މީހަކު ވަނީ ޑީޕޯޓު ކުރުމަށް އިމިގްރޭޝަނުން ނިންމާފައެވެ.
އަދި ހަމައެެހެންމެ މިދިޔަ އަހަރު ޑިސެމްބަރުމަހުގެ ކުރީކޮޅުވެސް އާޓިފިޝަލް ބީޗުގައި ބިދޭސީންތަކެއް ވަނީ މާރާމާރީ ހިންގާފައެވެ. އެފަހަރުވެސް އެކަމުގައި އިސްކޮށް ހުރި ބިދޭސީ މީހާ ވަނީ ޑިޕޯޓްކޮށްލާފައެވެ. މިފަދަ މައްސަލަތަކުގައި ގިނައިން ހަރަކާތްތެރިވަމުންދަނީ ރާއްޖޭގައި ގަވާއިދާ ހިލާފަށް އުޅެމުންދާ ބިދޭސީންކަން ވެސް ފާހަގަކޮށްލެވެއެވެ.
