މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި ރާއްޖޭގެ ފަތުރުވެރިކަމުގެ ސިނާއަތުގެ 25 ޕާޓްނަރުން ދިވެހިރާއްޖޭގެ ތަފާތު ތަޖުރިބާތައް ފިތުރު 2025 ފެއާގައި ދައްކާލަން ފަށައިފިއެވެ.
މި އަހަރުގެ އެންމެ ފުރަތަމަ ބޮޑު ޓްރެވަލް ޓްރޭޑް ފެއާ ކަމަށްވާ ފިތުރު 2025 ކުރިއަށް ދަނީ ސްޕެއިންގެ މެޑްރިޑްގައެވެ. މި ފެއާ ކުރިއަށް ދާނީ މިއަދުން ފެށިގެން މި މަހުގެ 26ގެ ނިޔަލަށެވެ.
އެމްއެމްޕީއާރްސީ އިން ބުނީ، ފިތުރު އަކީ ފަތުރުވެރިކަމުގެ ދާއިރާގެ 'ބެންޗްމާކް' ހަރަކާތެއް ކަމަށާއި މިއީ ފަތުރުވެރިކަމުގެ ސިނާއަތުގެ ޕްރޮފެޝަނަލުންނާއި ލެޓިން އެމެރިކާގެ އިންބައުންޑް އަދި އައުޓްބައުންޑް ބައިނަލްއަގްވާމީ މާކެޓްތަކަށް އަމާޒުކޮށްގެން މި ހަރަކާތުގައި ބާއްވާ އެންމެ ބޮޑު އެއް ހަރަކާތް ކަމަށެވެ. މި ފެއާގައި ބައިވެރިވުމަކީ ސްޕެއިން އަދި ޔޫރަޕްގައި ދިވެހިރާއްޖޭގެ ބްރޭންޑްގެ ޕްރެޒެންސް ހަރުދަނާކޮށް، ސަރަހައްދުގެ ލީޑިން މާކެޓްތަކުގެ ޓްރެވަލް އޭޖެންޓުންނާ ވަރުގަދަ ގުޅުންތަކެއް ގާއިމްކުރުމަށް އެހީތެރިވެދޭ ކަމެއް ކަމަށް އެމްއެމްޕީއާރްސީ އިން ބުނެއެވެ.
އަދި މި ފެއާގެ ތެރެއިން ރޮމޭންޓިކް ގެޓަވޭތަކާއި، ވެލްނެސް ރިޓްރީޓްތަކާއި، އާއިލީ ޗުއްޓީތަކާއި، އެޑްވެންޗާ ޗުއްޓީތަކާއި، ހޫނު މޫސުމުގެ ހަރަކާތްތަކާއި ވިންޓާ އެސްކޭޕް ފަދަ ދިވެހިރާއްޖެއަށް ހާއްސަ ތަފާތު ތަޖުރިބާތައް ދައްކާލުމުގެ ގިނަ ފުރުސަތުތަކެއް ލިބިގެންދާނެ ކަމަށް ވެސް އެ ކުންފުނިން ބުނެއެވެ. ސްޕެއިންގެ އެންމެ ކުރީ ސަފުގައި ނަގާ ކިޔާލެވޭ ޓްރެވަލް އެންޑް ޓްރޭޑް ފެއާގެ ތެރެއިން އެއް ފެއާ ކަމަށްވާ ފިތުރު އަކީ މި ސިނާއަތުގެ އެންމެ ފަހުގެ މައުލޫމާތު ހިއްސާކުރުމާއި ދިވެހިރާއްޖޭގެ ފަތުރުވެރިކަމުގެ ސިނާއަތުގެ ވަކިވަކި ޕްރޮޕަޓީތަކުގެ އާ އުފެއްދުންތަކާއި ތަޖުރިބާތައް ދައްކާލުމަށް މުހިންމު ޕްލެޓްފޯމެއް ކަމަށް އެމްއެމްޕީއާރްސީން ބުނެއެވެ.
ފިތުރު 2025 ގައި ދިވެހިރާއްޖޭގެ ސްޓޭންޑުން ދައްކުވައި ދެނީ ލަގްޒަރީ، ރޮމޭންޓިކް، އެޑްވެންޗާ، ސަގާފީ، އަދި ދެމެހެއްޓެނިވި ފަތުރުވެރިކަމެވެ. މިފެއާގައި ރާއްޖެގެ ސްޓޭންޑަށް އަންނަ ފަރާތްތަކަށް ދިވެހިރާއްޖޭގެ ޓްރެވަލް ޓްރޭޑް ޕާޓްނަރުންނާ ގުޅިގެން، ދިވެހިރާއްޖެއާ ބެހޭ އެންމެ ފަހުގެ މައުލޫމާތު ލިބޭނެއެވެ. މީގެ އިތުރުން، ދިވެހި ކެއުންތައް ރަހަބެލުމާއި ލިބާސް އާއި ފޭލި ފަދަ ޕްރޮޕްސް ހިމެނޭ ފޮޓޯ ބެކްޑްރޯޕެއްގައި ފޮޓޯނެގުމާއި ޕާސަނަލައިޒްޑް ދިވެހި ކެލިގްރަފީ ބުކްމާކްސް ފަދަ އިންޓަރެކްޓިވް ހަރަކާތްތައް ސްޓޭންޑްގައި ކުރިއަށްދާނެވެ. ދިވެހިރާއްޖޭގެ ތަފާތު އެކިއެކި ތަޖުރިބާތައް ދައްކަވުދައިދޭ ވީޑިއޯތައް ވެސް މި ފެއާ އިން ފެނިގެންދާނެވެ. އަދި ހަމަ ރާއްޖޭގެ ސްޓޭންޑަށް ޒިރާރަތްކުރާ ފަރާތަކަށް ދިވެހިރާއްޖޭގައި ހިލޭ ޗުއްޓީއެއް ހޭދަކުރުމުގެ ފުރުސަތު ލިބޭ ރެފްލް ޑްރޯއެއް އިތާ ހޮލިޑޭސް އިން ވަނީ ސްޕޮންސާ ކޮށްފައި ކަމަށް ވެސް އެމްއެމްޕީއާރްސީ އިން ބުނެއެވެ.
މިދިޔަ އަހަރު ސްޕެއިންއަކީ ދިވެހިރާއްޖޭގެ ޓޮޕް 10 މާކެޓުގެ ތެރޭގައި ހިމެނުނު މާކެޓެކެވެ. އެގޮތުން، މި މާކެޓުން ޖުމްލަ 47,835 ފަތުރުވެރިން ރާއްޖެއަށް ޒިޔާރަތް ކޮށްފައި ވެއެވެ.
