ވ. ފުލިދޫ ކައިރިއަށް ފީނަން ގޮސް އުޅެނިކޮށް ގެއްލުނު 7 ފަތުރުވެރިއަކު ކަނޑުމަތިން ހޯދައި އެމީހުން ސަލާމަތް ކޮށްފިއެވެ.
ފުލުހުން ބުނީ، ޗައިނާގެ 7 ފަތުރުވެރިއަކު ގެއްލިގެން މިއަދު އިރުއޮއްސުނު ފަހުން ރިޕޯޓް ކޮށްފައިވާ ކަމަށެވެ. އެމީހުން ފީނަން ދިޔައީ ވ. ފުލިދޫ ކައިރީ އޮންނަ ބޯމަސް ކަނޑު ޑައިވް ސައިޓަށް ކަމަށް ފުލުހުން ބުނެއެވެ.
އެމީހުން ގެއްލިގެން ހޯދުމަށްޓަކައި އެ ސަަރަހައްދުގައި އެ ވަގުތު ހަރަކާތްތެރިވި ފުލިދޫ ލޯންޗަކުން ވަނީ އެމީހުން ސަލާމަތްކޮށްފައި ކަމަށް ފުލުހުން ބުނެއެވެ.
އެ އެންމެންގެ ހާލު ވެސް ރަނގަޅު ކަމަށް ފުލުހުން ބުނެއެވެ.
ރާއްޖެއަށް ޒިޔާރަތްކުރާ ފަތުރުވެރިން ފީނަން ނުވަތަ ސްނޯކްލިން އަށް އެކި ސަރަހައްދުތަކަށް ދާ އިރު، މިފަދަ ހާދިސާތައް ދިމާވެފައި ހުރެއެވެ. ހާއްސަކޮށް މޫސުން ގޯސް ދުވަސް ވަރު މިފަދަ ހާދިސާތައް ހިނގާކަން ފާހަގަ ކުރެވެއެވެ.
