ނޮވެމްބަރު މަހު މަރުވި ނޭޕާލް އަންހެން މީހާގެ ހަށިގަނޑު މިދިޔަ އަންގާރަ ދުވަހު ގައުމަށް ފޮނުވާލާފައިވާ ކަމަށް ފުލުހުން ބުނެފިއެވެ.
މިދިޔަ ނޮވެމްބަރު މަހު ނިޔާވެފައި ވަނީ ނޭޕާލްއަށް ނިސްބަތްވާ އުމުރުން 25 އަހަރުގެ ކަންޗަން ދުންގެލް އެވެ.
ފުލުހުން މައުލޫމާތުދީފައިވާ ގޮތުގައި އައިޖީއެމްއެޗް ގެ އެމަޖެންސީ ރޫމްއަށް ގެނައި ނޭޕާލްގެ ރައްޔިތެއް ކަމަށްވާ ކަންޗަން ދުންގެލް ނިޔާވެފައިވާ މައްސަލަ ރިޕޯޓްކޮށްފައި ވަނީ މިދިޔަ ނޮވެމްބަރު މަހުގެ 9 ވަނަ ދުވަހު ހެނދުނުގެ ވަގުތެއްގައެވެ.
ތަހުގީގުން އެނގިފައިވާ ގޮތުގައި ކަންޗަން ދުންގެލް ހޮސްޕިޓަލަށް ގެންގޮސްސްފައި ވަނީ ވަރަށް ބޮޑަށް ބަނޑުގައި ރިއްސަން ފެށުމާ ގުޅިގެން ކަމަށް ފުލުހުން ބުނެއެވެ. އަދި ހޮސްޕިޓަލަށް ގެނައުމުގެ މަގުމަތީގައި އޭނާގެ ހަބަރު ހުސްވެފައިވާކަން ތަހުގީގަށް ފާހަގަ ކުރެވިފައިވާ ކަމަށް ވެސް ފުލުހުން ވަނީ ބުނެފައެވެ.
ފުލުހުން ބުނެފައި ވަނީ މެޑިކަލް ލީގަލް ރިޕޯޓްގައި ކަންޗަން ދުންގެލްގެ މަރުވާން ދިމާވި ސަބަބު "ނޭނގޭ" ކަމަށް ބަޔާންކޮށްފައިވާ ކަމަށެވެ. އަދި ރިޕޯޓްގައި އޭނާއަށް ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަކޮށްފައިނުވާ ކަމަށެވެ.
ކަންޗަން ދުންގެލްއަކީ އެނީމިއާގެ މެޑިކަލް ހިސްޓްރީއެއް އޮތް މީހެއްކަމަށް ފުލުހުން ބުނެއެވެ. އޭނާގެ ހަށިގަނޑު އަނބުރާ ފޮނުވާލާފައި ވަނީ ހަވާލުވާނެ މީހެއް ނެތި، ގިނަދުވަސްތަކެއްވަންދެން މޯޗަރީގައި ބޭއްވުމަށްފަހުއެވެ.
