މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގައި ރީ-ރަޖިސްޓާ ނުކުރާތީ މަތީ ތައުލީމާއި ތަމްރީނު ދޭ 101 މަރުކަޒެއްގެ ޕްރޮގްރާމްތައް ބަލައިނުގަންނަން އެ އޮތޯރިޓީއިން ނިންމައިފިއެވެ.
އެ 101 މަރުކަޒުގެ ނަން ހިމެނޭ ލިސްޓެއް އެމްކިއުއޭއިން ވަނީ އާންމުކޮށްފައެވެ.
މިއަދު ނެރުނު އިއުލާނެއްގައި އެމްކިއުއޭއިން ބުނީ "މަތީ ތައުލީމާއި ތަމްރީނުގެ ގާނޫނު" ގެ ދަށުން ދިވެހިރާއްޖޭގައި މަތީ ތައުލީމާއި ތަމްރީން ދޭ މަރުކަޒުތައް ހިންގޭނީ މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވުޒާރާގައި ރަޖިސްޓާ ކުރުމަށް ފަހުގައި ކަމަށެވެ.
އެގޮތުން މިއަދާ ހަމައަށް ރީ-ރަޖިސްޓާ ކޮށްފައިނުވާ 101 މަރުކަޒެއްވާކަން ފާހަގަކޮށް އެމްކިއުއޭއިން ބުނީ ރަޖިސްޓާ ކޮށްފައިނުވާ މަރުކަޒުތަކުގެ ލިސްޓްގައި ހިމެނޭ އެ މަރުކަޒުތަކުން ކުރިން ހުއްދަދީގެން ހިންގަމުން އައި ޕްރޮގްރާމްތައް އަދި ހިންގާ ޕްރޮގްރާމްތައް މިއަދުން ފެށިގެން ގަބޫލުނުކުރަން ނިންމާފައިވާ ކަމަށެވެ.
އެހެން ނަމަވެސް ކުރިން އެޕްރޫވަލް ދީފައިވާ ޕްރޮގްރާމްތަކުން ކިޔަވާފައިވާ އަދި އެމްކިއުއޭ އަށް ބެޗް އޮޑިޓަށް ފޮނުވާފައިވާ ދަރިވަރުންގެ ސަނަދު އެ އޮތޯރިޓީން ގަބޫލުކުރާނެ ކަމަށް ވެސް އެމްކިއުއޭއިން ވަނީ ބުނެފައެވެ.
