ޓެރަރިސްޓް ހަރަކާތްތަކަށް ހިތްވަރުދީ، އެ ކަންކަމާ ގުޅުން ހުރި އެތައް ކަމެއް ކުރި ކަމުގެ ތުހުމަތުގައި ހައްޔަރުކޮށް، ދައުވާ އުފުލާފައިވާ ހޫދު މުހައްމަދު ޒާހިރު ބަންދުން ދޫކޮށްލާފައިވަނީ ގޯސްކޮށް ކަމަށް ހައި ކޯޓުން ކަނޑައަޅައިފިއެވެ.
ޔޫރަޕުގެ ދެ ގައުމެއްގެ އިދާރާއަކާއި އެމެރިކާގެ އެފްބީއައިއާ ގުޅިގެން ދިވެހި ފުލުހުން ވ. ދެލްވައްތަ، ހޫދު މުހައްމަދު ޒާހިރު (އައިސިސް ހޫދު) ހައްޔަރުކޮށްފައިވަނީ ޖެނުއަރީ 6، 2022 ގައެވެ. ހޫދުގެ މައްޗަށް ފަސް ދައުވާއެއް ކޮށްފައިވާއިރު އޭޕްރީލް 19، 2022 އިން ފެށިގެން އޭނާ ހުރީ ޝަރީއަތް ނިމެންދެން ބަންދު ކޮށްފައެވެ. ނަމަވެސް 2024 ވަނަ އަހަރު އޮކްޓޯބަރު މަހުގެ ތެރޭގައި ކްރިމިނަލް ކޯޓުން ވަނީ ޝަރީއަތް ނިމެންދެން އޭނާ ބަންދު ކުރަން ކޮށްފައިވާ އަމުރު ބަދަލުކޮށް، 60 ދުވަހަށް ސަސްޕެންޑްކުރުމަށް ނިންމާފައެވެ. އަދޮ އެ މުއްދަތު ހަމަވެ، ސަސްޕެންޝަން އިތުރުކޮށްދޭން މިދިޔަ އަހަރުގެ ޑިސެމްބަރު މަހު ހުށަހެޅުމުން ކްރިމިނަލް ކޯޓުން ވަނީ އިތުރު 60 ދުވަހަށް ހޫދު ބަންދު ކުރަން އަމުރު ނެރެފައެވެ.
ކްރިމިނަލް ކޯޓުން ނެރުނު މި އަމުރާއި ގުޅިގެން ދައުލަތުން އެ މައްސަލަ ހައި ކޯޓުގައި އިސްތިއުނާފުކޮށްފައިވައިރު، އިއްޔެ ހައި ކޯޓުން އިއްވި ހުކުމްގައި ބުނީ ހޫދުގެ ޝަރީއަތް ނިމެންދެން ބަންދުކޮށްފައިވަނީ ޓެރަރިޒަމްގެ ގާނޫނުގެ ދަށުން ކަމަށެވެ. ހާއްސަ އިޖުރާއަތުގެ ދަށުން ބަންދުގައި ހުރި މީހެއްގެ ބަންދު މުރާޖައާކޮށް، އަލުން ގޮތެއް ކަނޑައަޅަން ޖެހޭނީ އެ ހާއްސަ އިޖުރާއަތު ބަޔާންކުރާ ގާނޫނުގައި ބަންދާ މެދު ގޮތް ކަނޑައަޅަން ޖެހޭ އުސޫލުތައް ބަޔާންކޮށްފައިވާ ނަމަ އެ އުސޫލުތަކުން ކަމަށް ހައިކޯޓުގެ ހުކުމުގައި ވަނީ ބުނެފައެވެ. އެހެންކަމުން، ހޫދުގެ ބަންދު މުރާޖައާ ކޮށްފައިވަނީ ރަނގަޅު އިޖުރާއަތެއްގެ ތެރެއިން ނޫން ކަމަށް ހައިކޯޓުން ވަނީ ނިންމާފައެވެ.
ހޫދުގެ މައްޗަށް އުފުލާފައިވާ ދައުވާތަކަކީ:
- އިންޓަނެޓް މެދުވެރިކޮށް ޓެރަރިޒަމްގެ އަމަލެއް ކުރުމަށް ހިތްވަރުދިނުމުގެ ކުށުގެ ދައުވާއެވެ. އަސާސީ އަދަބަކީ 10 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ.
- އިންޓަނެޓް މެދުވެރިކޮށް ޓެރަރިސްޓް ޖަމާއަތެއްގެ ލިޔެކިއުންތައް ފެތުރުމުގެ ކުށުގެ ދައުވާއެވެ. އަސާސީ އަދަބަކީ 10 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ.
- ޓެރަރިސްޓް ޖަމާއަތެއްގެ މެންބަރަކަށް ވުމުގެ ކުށުގެ ދައުވާއެވެ. އެ ދައުވާގެ އަސާސީ އަދަބަކީ 10 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ.
- ޓެރަރިސްޓް ޖަމާއަތަކަށް ތާއީދު ކުރުމުގެ ކުށުގެ ދައުވާއެވެ. މި ދައުވާގެ އަސާސީ އަދަބަކީ ތިން އަހަރާއި ފަސް އަހަރާ ދެމެދުގެ މުއްދަތަކަށް ޖަލަށްލުމެވެ.
- ޓެރަރިސްޓް ޖަމާއަތަކަށް ތާއީދު ކުރާ މީހެއްކަން ދޭހަވާ ފަދަ ލިޔުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ދައުވާއެވެ. އަސާސީ އަދަބަކީ އަހަރަކާއި ތިން އަހަރާ ދެމެދުގެ ޖަލު ހުކުމެކެވެ.
މި ދައުވާތައް ސާބިތުވެއްޖެ ނަމަ 53 އަހަރުގެ ހުކުމެއް އަންނާނެއެވެ.
