ރާއްޖެ އިޝްތިހާރުކުރާ ގޮތައް ބޮޑު ބަދަލުތަކެއް ގެނައުމަށް ނިންމާފައިވާކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީގެ މެނޭޖިން ޑިރެކްޓަރު އިބްރާހީމް ޝިއުރީ ވިދާޅުވެއްޖެއެވެ.
ކޮންމެ އަހަރަކުވެސް އެމްއެމްޕީއާރުސީ އިން ރާއްޖެ އިޝްތިހާރުކުރުމަށް ބައިނަލްއަގްވާމީ ފެއާތަކުގައި ބައިވެރިވަމުން އަންނައިރު ޝިއުރީ ވިދާޅުވީ، މީގެކުރިން ބައިނަލްއަގްވާމީ ފެއާތަކުގައި ބައިވެރިވުމަށް ބޮޑު ހަރަދެއް ކުރަމުން އަންނަ ކަމަށެވެ. ނަމަވެސް މިއަހަރު އެ ކުންފުނީގެ އަމާޒު ހުރީ ފެއާތަކުގައި ބައިވެރިވުމަށް ކުރާ ހަރަދު 30 ޕަސެންޓު ކުޑަކޮށް ރާއްޖެ ޕްރޮމޯޓްކުރަމުން އައި ގޮތްތަކަށް ބަދަލުތަކެއް ގެނައުމަށް ކަމަށެވެ.
ރާއްޖެ އިޝްތިހާރުކުރުމަށް ކުރިއަށް ގެންދަން ނިންމާފައިވާ ގޮތުގެ ޕްލޭންތައް ހިއްސާކޮށް ޝިއުރީ ވިދާޅުވީ މިއަހަރު "މޯލްޑިވްސް ވީކް" ގެ ނަމުގައި ބޮޑު ރޯޑްޝޯއެއް ބޭއްވުމަށް ހަމަޖެހިފައިވާކަމަށެވެ. އަދި ވާޗުއަލް އެކްޓިވިޓީސްގެ އިތުރުން އިންޓަނޭޝަނަލް ކޮލޭބްރޭޝަންސްތައް ތައާރަފުކުރުމަށް ނިންމާފައިވާކަމަށް އޭނާ ވިދާޅުވިއެވެ.
މީގެ އިތުރުން ޝިއުރީ ވިދާޅުވީ މިއަހަރު އިންޓަނޭޝަނަލް ސްޓާރުންނާއިއެކު ގްލޯބަލް އެމްބެސެޑާ ޕްރޮގްރާމެއް ތައާރަފްކުރުމަށް ނިންމާފައިވާކަމަށެވެ.
