ސަރުކާރު ހިއްސާވާ ކުންފުނިތަކުގެ ބޭނުންތަކަށް ލޯނު ނެގުމުގެ ކުރިން ފިނޭންސް މިނިސްޓްރީގެ ހުއްދަ ހޯދަންޖެހޭ ގޮތަށް އުސޫލު ބަދަލު ކޮށްފައިވާ ކަމަށް ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑު (ޕީސީބީ) އިން ބުނެފިއެވެ.
އެ ބޯޑުން ކުންފުނިތަކަށް ފޮނުވި ސާކިއުލާއެއްގައި ބުނީ ސަރުކާރު ހިއްސާވާ ކުންފުނިތަކުގެ ހިންގާ ގަވާއިދު މި މަހުގެ 25 ވަަނަ ދުވަހު ބޭއްވި ބޯޑު ބައްދަލުވުމުގައި ފާސްކޮށްފައިވާ ކަމަށެވެ. ސަރުކާރު ހިއްސާވާ ކުންފުނިތަކުން ލޯނު ނެގުމުގައި އަމަލުކުރާނެ ގޮތުގެ ގައިޑްލައިނެއް އެކުލަވާލައި، އެ ގައިޑްލައިނުގައި ފުރިހަމަ ކުރަންޖެހޭ ކަންކަން ފުރިހަމަ ކުރުމަށްފަހު، ހުއްދަ ހޯދުމަށް ފިނޭންސް މިނިސްޓްރީއަށް ހުށަހަޅަންޖެހޭނެ ކަމަށް އެ ސާކިއުލާގައި ބުނެފައި ވެއެވެ.
އެ ގައިޑްލައިނުގައިވާ ގޮތުގައި ކުންފުނިތަކުން ބަޖެޓު އެކުލަވާލާ އިރު، އަހަރުތެރޭ ކުންފުންޏަށް ބޭނުންވާ ހަރު މުދަލަށާއި، ކުންފުނި ހިންގުމަށާއި ނުވަތަ ވިޔަފާރި ފުޅާކުރަން ލޯނެއް ބޭނުންވާ ނަމަ، އެކަމުގެ އެސެސްމަންޓަކާ އެކު ބަޖެޓުގައި ހިމަނަން ޖެހޭނެއެވެ. އަދި ލޯނު ބޭނުންވާ ސަބަބު ދެނެގަނެ ފައިނޭންސް ކުރަން ހުރި އޮޕްޝަންތަކުގެ އެސެސްމަންޓެއް ހަދައި، ލޯނު ދޫކުރާ އެއް ފަރާތަށް ވުރެ ގިނަ ފަރާތްތައް ދިރާސާކޮށް އެކުލަވާލައި ޓެކްނިކަލް ކަރުދާހެއް ކުންފުނީގެ ބޯޑުން މެނޭޖްމަންޓަށް ހުށަހަޅަން ޖެހޭނެއެވެ. އެ ކަރުދާހުގައި ލޯނު ބޭނުންވާ ސަބަބާއި ކުންފުނީގެ މާލީ ހާލަތާއި ޝަރުތުތަކާއި ލޯނު އަނބުރާ ދެއްކުމުގެ ގާބިލްކަން ހުރި މިންވަރު ވެސް ހިމަނަން ޖެހެއެވެ.
އަދި ނަގަން އެދޭ ލޯނުގެ ސަބަބުން އެ ކުންފުންޏަކުން ކުރިން ނަގާފައިވާ ލޯނުތަކަށް ފައިނޭންސް ކުރުމަށް އަދި އަނބުރާ ލޯނު ދެއްކުމަށް އެއްވެސް ދައްޗެއް ނުވަތަ ގޮންޖެހުމެއް ކުރިމަތިވާނެކަން ނުވަތަ ނޫންކަން ހާމަކުރުމަށް ވެސް ވަނީ އެ ގައިޑްލައިންގައި ލާޒިމްކޮށްފައެވެ. މީގެއިތުރުން، ލޯނު ނެގުމުން ދައުލަތުގެ ބަޖެޓަށް އިތުރަށް ބަރޯސާވާނެ ކަމަށް ބެލެވޭ ނަމަ އެ މިންވަރު ވެސް ހިމެނުމަށާއި ލޯނު ނަގާނެ ފަރާތެއް ކަނޑައެޅުމުގައި ސަރުކާރު ހިއްސާވާ ލޯނު ދޭ ކުންފުނިތަކާއި މާލީ އިދާރާތަކަށް އިސްކަން ދިނުން ހިމެނެއެވެ.
އާ އުސޫލުގެ ދަށުން، ފިނޭންސް މިނިސްޓްރީގެ ހުއްދަ ހޯދުމަށް ފޮނުވޭނީ، ލޯނާ ގުޅޭ އެ ކަރުދާސް ކުންފުނީގެ ބޯޑަށް ހުށަހަޅައި ފާސްކުރުމަށް ފަހުގައެވެ.
ސަރުކާރު ހިއްސާވާ ކުންފުނިތަކުން ލޯނު ނެގުމުގައި އަމަލު ކުރާނެ އުސޫލުގެ އިތުރުން، އިދާރީ އަދި މުސާރައިގެ އޮނިގަނޑަށް ބަދަލު ގެނައުމާއި، އިންވެސްޓްމަންޓުތައް ކުރުމުގެ ކުރިން ވެސް ފިނޭންސް މިނިސްޓްރީގެ ހުއްދަ ހޯދަންޖެހޭ ގޮތަށް ޕީސީބީން ވަނީ އުސޫލު ބަދަލު ކޮށްފައެވެ.
މި ބަދަލު ގެނައުމުގެ ކުރިން، އެސްއޯއީތަކަށް މި ހުއްދަ ދެމުން އައީ ސީދާ ޕީސީބީންނެވެ.
