މިދިޔަ ނޮވެމްބަރު މަހު މަރުވި ނޭޕާލް އަންހެން މީހާގެ ހަށިގަނޑު އޮތީ މޯޗަރީގައި ކަމަށާއި މައްސަލަ ތަހުގީގު ކުރަމުންދާ ކަމަށް ފުލުހުން ބުނެފިއެވެ.
މިދިޔަ ނޮވެމްބަރު މަހު ނިޔާވެފައި ވަނީ ނޭޕާލްއަށް ނިސްބަތްވާ އުމުރުން 25 އަހަރުގެ ކަންޗަން ދުންގެލް ކަމަށް ފުލުހުން ވަނީ މައުލޫމާތު ދީފައެވެ.
ފުލުހުން ބުނީ އައިޖީއެމްއެޗް ގެ އެމަޖެންސީ ރޫމްއަށް ގެނައި ނޭޕާލްގެ ރައްޔިތެއް ކަމަށްވާ ކަންޗަން ދުންގެލް ނިޔާވެފައިވާ މައްސަލަ މިދިޔަ މަހުގެ 9 ވަނަ ދުވަހު ހެނދުނުގެ ވަގުތެއްގައި ފުލުހުންނަށް ރިޕޯޓްކޮށްފައިވާ ކަމަށެވެ.
ތަހުގީގުން އެނގިފައިވާ ގޮތުގައި ކަންޗަން ދުންގެލް ހޮސްޕިޓަލަށް ގެނެސްފައި ވަނީ ވަރަށް ބޮޑަށް ބަނޑުގައި ރިއްސަން ފެށުމާ ގުޅިގެން ކަމށް ފުލުހުން ބުނެއެވެ. އަދި ހޮސްޕިޓަލަށް ގެނައުމުގެ މަގުމަތީގައި އޭނާގެ ހަބަރު ހުސްވެފައިވާކަން ތަހުގީގަށް ފާހަގަ ކުރެވިފައިވާ ކަމަށް ވެސް ފުލުހުން ވަނީ ބުނެފައެވެ.
ފުލުހުން ބުނީ މެޑިކަލް ލީގަލް ރިޕޯޓްގައި ކަންޗަން ދުންގެލްގެ މަރުވާން ދިމާވި ސަބަބު "ނޭނގޭ" ކަމަށް ބަޔާންކޮށްފައިވާ ކަމަށެވެ. އަދި ރިޕޯޓްގައި އޭނާއަށް ޖިންސީ އަނިޔާއެއް ލިބިފައިވާކަން އެއްވެސް މިންވަރަކަށް ފާހަގަކޮށްފައިނުވާ ކަމަށެވެ.
ކަންޗަން ދުންގެލްއަކީ އެނީމިއާގެ މެޑިކަލް ހިސްޓްރީއެއް އޮތް މީހެއްކަމަށް ފުލުހުން ބުނެއެވެ. އަދި ކަންޗަން ދުންގެލްގެ ހަށިގަނޑާ ސްޕޮންސާގެ ފަރާތުން ހަވާލުވެފައި ނުވާތީ އޭނާގެ ހަށިގަނޑު މޯޗަރީއަށް ގެންގޮސްފައި ވަނީ ފުލުހުންގެ ހަވާލުގައި ކަމަށް ފުލުހުން ވަނީ ބުނެފައެވެ.
ފުލުހުން އިތުރަށް ބުނީ މި މައްސަލަ ތަހުގީގު ކުރަމުންދާ ކަމަށެވެ.
