ދިރާސީ މަސައްކަތްތައް ކުރުމަށް ހާއްސަ ފަންޑެއް މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން އިފްތިތާހްކޮށްފިއެވެ.
އެމްއެމްއޭއިން ދެ ދުވަހުގެ މުއްދަތައް ކުރިއަށްގެންދާ ރިސާޗް ކޮންފަރެންސްގައި މި ފަންޑު އިފްތިތާހުކޮށްފައިވާއިރު، މި ފަންޑު އެމްއެމްއޭ އިން ފަށާފައިވަނީ 1 މިލިއަން ރުފިޔާ އާއެކުއެވެ. އެމްއެމްއޭއިން ބުނީ މި ފަންޑުގެ އަމާޒަކީ ދިރާސާތައް ކުރުމަށް ހިތްވަރުދީ ދިރާސާ ކުރާ ފަރާތްތަކަށް ފަހި މާހައުލެއް ބިނާކުރުން ކަމަށެވެ.
މި ކޮންފަރެންސްގެ ތެރެއިން ދިރާސީ މަސައްކަތް ކުރުމަށް ދެ އެއްބަސްވުމެއްގައިވެސް ވަނީ ސޮއިކޮށްފައެވެ. އެގޮތުން ދިރާގާއިއެކު ސޮއިކޮށްފައިވާ އެއްބަސްވުމަކީ ދެމެހެއްޓެނިވި ކުރިމަގަކަށް ދިރާސާތައް ފުޅާކުރުމާއި އީޖާދީ އުފެއްދުންތައް ކުރިއެރުވުމަށް އެކުލަވާލި އެއްބަސްވުމެކެވެ. އަދި މެލޭޝިއާގެ ޔުނިވާސިޓީއެއް ކަމަށްވާ އިސްލާމް ސެލަންގޫރާއި އެކު ސޮއިކޮށްފައިވާ އެއްބަސްވުމަކީ އިގްތިސާދީ ދިރާސާތައް ކުރިއެރުވުމަށާ، ތައުލީމާއި އީޖާދުކުރުމުގެ ދާއިރާއިން އެކުގައި މަސައްކަތްކުރުމަށް ސޮއިކުރެވުނު އެއްބަސްވުމެކެވެ.
މަރުކަޒީ ބޭންކުން އިންތިޒާމުކޮށްގެން ބާއްވާ ފުރަތަމަ ރިސާޗް ކޮންފަރެންސްގައި ކީނޯޓާއި ޕެނަލް ޑިސްކަޝަންތަކާއި ދިރާސީ ކަރުދާސްތައް ހުށަހެޅުމުގެ އިތުރުން ވޯކްޝޮޕްތައްވެސް ކުރިއަށް ދާނެއެވެ. މިއަހަރުގެ ކޮންފަރެންސް ތީމަކީ "އިގްތިސާދީ ދިރާސާތައް ފުޅާކުރުމުގައި ދެމެހެއްޓެނިވި ކުރިމަގަކަށް ސިޔާސަތުތައް ބައްޓަންކޮށް އީޖާދުކުރުން"މެވެ.
