މިިދޔަ ބުރާސްފަތި ދުވަހު ހިންގި އަލިފާނުގެ ހާދިސާގައި ހައުސިން މަޝްރޫއުތަކާ ގުޅުންހުރި އެއްވެސް މައުލޫމާތެއް ނުގެއްލޭ ކަމަށާއި އެ މައުލޫމާތު ކްލައުޑްގައި ރައްކާކުރެވިފައިވާކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެއެވެ.
މި އަލިފާނުގެ ހާދިސާއާ ގުޅިގެން ގިނަ ބަޔަކު އަންނަނީ ބޯހިޔާވަހިކަމާ ގުޅޭ މަޝްރޫއުތައް ލަސްވާނެ ކަމުގެ ކަންބޮޑުވުމާއި، އަދި އެ މަޝްރޫއުތައް ކުރިއަށް ނުގެންދާނެ ކަމަށް ބުނެ މި ސަރުކާރަށް ފާޑުކިޔަމުންނެވެ. އަދި މިއީ ބަޔަކު ގަސްތުގައި ކުރި ކަމެއްގެ ގޮތުގައި ވެސް ގިނަ ބަޔަކު އަންނަނީ ތުހުމަތު ކުރަމުންނެވެ. ރައްޔިތުންގެ އެތައް ހައްގެއް ނިގުޅައިގަތުމަށް ހިންގި ޖަރީމާއެއްގެ ގޮތުގައި ގިނަ ބަޔަކު މި ހާދިސާ ސިފަކުރެއެވެ.
އަލިފާނުގެ ހާދިސާއާ ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއްތަލިބު ވިދާޅުވީ، ހައުންސިންގެ މަޝްރޫއުތަކާ ގުޅޭގޮތުން ތަފާތު ވާހަކަތައް ދައްކަމުން ގެންދާ ކަމަށެވެ. ރައްޔިތުންގެ އާންމު ބޯހިޔާވަހިކަމާ ގުޅުންހުރި އެއްވެސް މައުލޫމާތެއް ގެއްލިފައިނުވާ ކަމަށާއި އަދި ހައުސިންގް ލޯނުތަކާ ބެހޭ މައުލޫމާތުތައް ވެސް ކްލައުޑްގައި ރައްކާކުުރެވިފައިވާ ކަމަށް މުއްތަލިބް ވިދާޅުވިއެވެ.
އަލިފާނުގެ ހާދިސާ ހިނގި ސަރަހައްދުން ސާވާތައް ނަގައިގެން އެތަކެތީގައި ހުރި އެއްޗެހި ރިކަވާ ކުރުމުގެ މަސައްކަތް މިހާރު ކުރަމުން އަންނަ ކަމަށް މިނިސްޓަރު ވިދާޅުވިއެވެ. އަދި މިހާރު މަދުވެގެން ދިޔައީ ކޮން އެއްޗެއްތޯ ދެނެގަތުމަށް މަސައްކަތް ކުރަމުން އަންނަ ކަމަށް ވެސް ވިދާޅުވިއެވެ. އެ އަލިފާނުގެ ހާދިސާގައި ރައްޔިތުންނަށް ހިދުމަތް ދިނުމަށް ދޭން ބޭނުންވާ އެއްވެސް މައުލޫމާތެއް ގެއްލިފައި ނުވާ ކަމުގެ ޔަގީން ކަން މުއްތަލިބް ވަނީ ދެއްވާފައެވެ.
ތިން މިނިސްޓްރީ އެއްގެ އިތުރުން މާލެ ސިޓީ ކައުންސިލްގެ އިދާރާގެ ބައެއްގައި ރޯވި ހާދިސާއާ ގުޅިގެން މިއަދުގެ ޕްރެސްގައި ކޮމިޝަނާ އޮފް ޕޮލިސް (ސީޕީ) އަލީ ޝުޖާއު ވިދާޅުވެފައި ވަނީ، މި އަލިފާނުގެ ހާދިސާ ހިންގަން މެދުވެރިވީ ސަބަބުބދެނެގަތުމަށް ރާއްޖެއިން ބޭރުގެ އެހީ ހޯއްދަވާނެ ކަމަށެވެ.
މިދިޔަ ބުރާސްފަތި ދުވަހުގެ ހެނދުނު 6:30 ހާއިރު ހިނގި މި އަލިފާނުގެ ހާދިސާގައި އެންމެ ފުރަތަމަ އަލިފާން ރޯވެފައި ވަނީ ހައުސިން މިނިސްޓްރީގައެވެ. އޭގެ ފަހުން، ހުޅުގަނޑު ބޮޑުވެ، އެ އިމާރާތުގައި ހިންގާ ކޮންސްޓްރަކްޝަން މިނިސްޓްރީ އަދި އެ ތަނާ ޖެހިގެން ހުންނަ އެންވާރަންމެންޓް މިނިސްޓްރީގައި ވެސް ވަނީ ރޯވެފައެވެ. ހަތަރު ގަޑިއިރު ފަހުން އަލިފާން ނިއްވާލިއިރު މުޅި ތަން ބޭނުން ނުކުރެވޭ ވަރަށް ވަނީ އަނދާ ހުލިވެފައެވެ. އެހެންކމުން މި ތިން މިނިސްޓްރީގެ މަސައްކަތް ވަނީ ދަރުބާރުގެއަށް ބަދަލުކޮށްފައެވެ.
