ރައީސް ޑރ. މުހައްމަދު މުއިއްޒު މިދިޔަ ހަފްތާގައި ކ. އަތޮޅާއި އއ. އަތޮޅަށް ކުރެއްވި ދަތުރުފުޅުގައި ދައުލަތުގެ މީޑިއާ ޕީއެސްއެމުން ވަގުތުން ދުރަށް ދެއްކި ޖަލްސާއެއްގައި ކީރިތި ޤުރުއާނުން ބައެއް އުނިކުރި މައްސަލައާ ގުޅިގެން އެ ވަގުތު ޑިއުޓީގައި ތިބި މުވައްޒަފުން މަގާމުން އެކަހެރިކޮށްފައިވާ ކަމަށް، އެ ކުންފުނިން ހާމަކޮށްފިއެވެ.
ޕީއެސްއެމުން ނެރުނު ބަޔާނެއްގައި ބުނީ، އެ ކުންފުނީގެ ޗެނަލްތަކުން ގެނެސްދިން ޖަލްސާއެއްގައި ކީރިތި ޤުރުއާނުން ބައެއް އުނިވިކަން އެނގުމާއެކު، އިސް މުވައްޒަފުން ހިމެނޭ ކޮމިޓީއެއްގައި އެ މައްސަލަ ބަލާފައިވާ ކަމަށެވެ.
އެ މައްސަލައާ ގުޅޭގޮތުން ޕީއެސްއެމުން ބުނީ، ކީރިތި ޤުރުއާނުން ބައެއް އުނިވީ އެޑިޓްކުރުމުން ނޫން ކަމަށެވެ. ބަޔާނުގައި އެ ކުންފުނިން އިތުރަށް ބުނި ގޮތުގައި:
- ޖަލްސާ ލައިވްކުރަން ފެށީ ޕީއެސްއެމް ނިއުސްގެ ހަބަރު ކޮންޓްރޯލް ރޫމުން، އެއަށްފަހު މައި ކޮންޓްރޯލް ރޫމަށް ސިގްނަލް ބަދަލުކުރެވިފައިވޭ
- އެއް ކޮންޓްރޯލް ރޫމުން އަނެއް ކޮންޓްރޯލް ރޫމަށް އާންމުކޮށް ސިގްނަލް ބަދަލުކުރޭ، ނަމަވެސް މީހަކު ވާހަކަ ދައްކަމުންދާ ވަގުތު ސިގްނަލް ބަދަލުނުކުރޭ
އެކަމަކު ހަބަރު ކޮންޓްރޯލް ރޫމުން މައި ކޮންޓްރޯލް ރޫމަށް ސިގްނަލް ބަދަލުކުރީ ކީރިތި ޤުރުއާން ކިޔަވަމުން ގެންދިޔަ ވަގުތު ކަމަށާއި މިއީ އާންމުކޮށް ކުރާ ކަމެއް ނޫން ކަމުގައި ޕީއެސްއެމުން ބުންޏެވެ.
މިހެންވެ، އެ ވަގުތު ކޮންޓްރޯލް ރޫމްގައި ތިބި މުވައްޒަފުން އެކަމަށް މައާފަށް އެދިފައިވާ ކަމަށް އެ ކުންފުނިން ބުންޏެވެ.
"އަދި ހަބަރު ކޮންޓްރޯލް ރޫމާއި މައި ކޮންޓްރޯލް ރޫމްގައި އެ ވަގުތު ޑިއުޓީގައި ތިބި މުވައްޒަފުން މިހާރު ވަނީ އެ މީހުން ކުރަމުން އައި މަސައްކަތުން އެކަހެރިކުރެވިފައެވެ،" ބަޔާނުގައި ވެއެވެ.
މިކަމާ ގުޅިގެން މިއަދު ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައި، އެ މައްސަލައަށް މެންބަރުން ބަހުސް ވެސް ކޮށްފައިވެއެވެ.
ލައިވް އިވެންޓް ތަކުގާ މިފަދަ ކަމެއް ހިނގާފާނެ، މީގައި އެކަން ކުރީ ކީރިތި ޤުރުއާނަށް ކުޑައިމީސްކޮށް، ޤަދަރު ކުޑަކޮށްލުމުގެ ބޭނުމުގައިތޯ ބެލުމަށް ކަން ހިނގާ ދިޔަ ގޮތަށާއި، އެކަން ކުރި ބައެއްގެ ނިޔަތް ދެނެގަތުމަކީ ހަޤީޤަތަށް ވާޞިލްވުމަށް ވަރަށް މުހިއްމު ކަމެއް.