ކީރިތި ޤުރުއާނުގެ އާޔަތަކަށް އުނިއިތުރު ގެނެސްގެން ދައުލަތުގެ މީޑިއާ ޕީއެސްއެމުން ވީޑިއޯ އެއް ފަތުރަމުންދާ ކަމަށް ބުނެ، އެމްޑީޕީގެ މެންބަރުން ހުށަހެޅި ކުއްލި މައްސަލަ ބަލައިގެންފިއެވެ.
މިއަދުގެ ޖަލްސާއަށް ކެންދޫ ދާއިރާގެ މެންބަރު މައުރޫފް ޒާކިރު ހުށަހެޅުއްވި މައްސަލައިގައި ވިދާޅުވީ، ކީރިތި ޤުރުއާނުގެ އާޔަތްތަކަށް ބަދަލު ގެނެސް ޕީއެސްއެމްގެ ޗެނަލްތަކުން ދައްކަމުންދާ ކަން ފާހަގަ ކުރެވިފައިވާ ކަމަށާއި، އެއީ ކީރިތި ޤުރުއާނަށް އިހާނެތިކޮށް ހިތައި ގަސްދުގައި ބަދަލު ގެނެސް، އާޔަތްތަކުގެ މާނަ އޮޅުވާލަން ކުރަމުންދާ ކަމެއް ކަމަށެވެ.
މީގެ އިތުރުން މައުރޫފްގެ ކުއްލި މައްސަލައިގައި ފާހަގަކުރެއްވި އެހެނިހެން ކަންކަމުގެ ތެރޭގައި ހިމެނެނީ:
- ގައުމުގެ ހާލަތާ ގުޅޭގޮތުން ވާހަކަ ދައްކަން ސިޔާސީ ޕާޓީތަކަށް ހަމަހަމަ ފުރުސަތުތައް ނުދިނުން
- ސަރުކާރާ އިދިކޮޅު ފަރާތްތަކުގެ ހަގީގަތާ ހިލާފު ވާހަކަ ފަތުރަމުން ދިއުން
މި މައްސަލައަށް ބަހުސްކުރަން ފެނޭތޯ ރިޔާސަތުން ވޯޓަށް އެހުމުން ވޯޓުގައި ބައިވެރިވި 70 މެންބަރުން ވެސް ވޯޓު ދެއްވީ މި މައްސަލަ ބަލައިގަނެ ބަހުސް ކުރުމަށެވެ.
މައުރޫފް ވިދާޅުވީ، ޤުރުއާނުގެ އާޔަތްތަކަށް ބަދަލު ގެނައުމަކީ ކުރެވެން ވާނެ ކަމެއް ނޫން ކަމަށެވެ. އޭނާ ވަނީ މިކަމުގެ ފަހަތުގައިވާ ފަރާތްތައް ހޯދައި، މި ކަން ރަނގަޅަށް ތަހްގީގުކޮށް އެ ފަރާތްތަކަށް ފިޔަވަޅު އެޅުމަށް ގޮވާލައްވައިފައެވެ.
މި މައްސަލައިގައި ފާހަގަކޮށްފައި ވަނީ މިދިޔަ ހަފްތާގައި ރައީސް ޑރ. މުހައްމަދު މުއިއްޒު ކ. އަތޮޅާއި އއ. އަތޮޅުގެ ބައެއް ރަށްރަށަށް ކުރެއްވި ދަތުރުފުޅުގެ ތެރެއިން ބޭއްވި ޖަލްސާއެއްގައި ޤުރުއާން ކިޔެވިއިރު، ވަގުތުން ދެއްކި ވީޑިއޯއަކުން ތަންކޮޅެއް އުނިކުރިކަމަށް ބުނާ މައްސަލައެކެވެ. މި ކަމުގައި ފާޑުކިއުންތައް އަމާޒުވުމާ ގުޅިގެން ޕީއެސްއެމުން ވަނީ ވީޑިއޯ ހިމެނޭ ހުރިހާ ޕޯސްޓެއް ސޯޝަލް މީޑިއާއިން ނަގައިފައެވެ.
ކޮބާ ޝެއިޚު ޖަވާބު އަލީރަމީޒް މެން ތިކަންސަމާލުކަންގެންނަން