2034 ވަނަ އަހަރުގެ ވޯލްކަޕް ފުޓްބޯޅަ މުބާރާތް ސައުދީ އަރަބިއްޔާގައި ބާއްވާ ގޮތަށް ހަމަޖައްސައިފިއެވެ.
އެއަހަރުގެ މުބާރާތް ސައުދީގައި ބާއްވަން ނިންމާފައިވަނީ ދުނިޔޭގެ ފުޓްބޯޅަ ޖަމިއްޔާ ފީފާއިން އިއްޔެ ބޭއްވި ބައްދަލުވުމެއްގަައި މެމްބަރު ގައުމުތަކުން ދިން ވޯޓުންނެވެ.
2034 ވަނަ އަހަރުގެ މުބާރާތް ބޭއްވުމަށް ބިޑް ހުށަހަޅާފައިވަނީ ވެސް ސައުދީން އެކަންޏެވެ. އަދި އެބިޑް ސައުދީއަށް ލިބޭނެ ކަން މީގެ އަހަރެއްހާ ދުވަސް ކުރިން ވަނީ ޔަގީން ވެފައެވެ. އެއީ އެކަމަށް ދެން ވާދަކުރަން އުޅުނު އޮސްޓްރޭލިޔާއިން ވޯލްކަޕް ބާއްވަން ބިޑެއް ހުށަނޭޅުމުނުންނެވެ.
ސައުދީގައި 2034 ވަނަ އަހަރުގެ ވޯލްޑްކަޕް ބާއްވަން ހަމަޖެއްސުމުން ހުޅަނގުގެ ބައެއް ޖަމާއަތްތަކުން ވަނީ ކަންބޮޑުވުން ފާޅުކޮށްފައެވެ. އެހެން ނަމަވެސް ވޭތުވެދިޔަ އަހަރުތަކުގައި ސައުދީ ސަރުކާރުން ފުޓްބޯޅަ ކުރިއެރުވުމަށްކޮށްފައިވާ އިންވެސްޓްމަންޓްތަކާ އެކު ސައުދީގެ ލީގު މިހާރު ވަނީ ވާދަވެރި އަދި ތަޖުރިބާކާރު ގިނަ ތަރިންތަކެއް ކުޅުމަށް ޝައުގުވެރިވާ ލީގަށް ވެފައެވެ.
2030 ވަނަ އަހަރުގެ ވޯލްޑްކަޕްގެ މެޗުތައް 6 ގައުމެއްގައި
އިއްޔެ ވާޗުއަލްކޮށް ބޭއްވި ފީފާ ބައްދަލުވުމުގައި ވަނީ 2030 ވަނަ އަހަރުގެ މުބާރާތް ތިން ގައުމެއްގައި ބާއްވަން ވެސް ނިންމާފައެވެ. އެއީ ސްޕެއިން، ޕޯޗުގަލް އަދި މޮރޮކޯއެވެ.
2030 ވަނަ އަހަރަކީ ވޯލްޑްކަޕަށް އެއް ގަރުނު ވާ އަހަރު ކަމުން އެފަހަރުގެ މުބާރާތުގައި މިކަން ކުލަގަދަކޮށް ފާހަގަކުރުމަށް ވަނީ ހަމަޖެހިފައެވެ. އެހެން ކަމުން، މުބާރާތުގެ ފުރަތަމަ ތިން މެޗު ކުޅުމަށް ހަމަޖެހިފައިވަނީ ދެކުނު އެމެރިކާގެ ތިން ގައުމެއްގައެވެ. އެއީ އުރުގުއޭ، އާޖެންޓީނާ އަދި ޕެރަގުއޭއެވެ.
2022 ވަނަ އަހަރުގެ ވޯލްޑްކަޕް ގަލްފްގެ ގައުމެއް ކަމަށްވާ ގަތަރުގައި ބޭއްވި އިރު އެމުބާރާތް ވެގެން ދިޔައީ ފަހުގެ ތާރީހެއްގައި ބޭއްވި އެންމެ ކާމިޔާބު އަދި އެންމެ ފާހަގަކޮށްލެވޭ މުބާރާތަށެވެ.
ދެން އެންމެ އަވަހަށް އޮންނަ ވޯލްޑްކަޕް ފުޓްބޯޅަ މުބާރާތް އޮންނާނީ ތިން ގައުމެއްގައެވެ. އެއީ ނޯތް އެމެރިކާގެ ތިން ގައުމެއް ކަމަށްވާ ކެނެޑާ، މެކްސިކޯ އަދި އެމެރިކާއެވެ. އެމުބާރާތުގެ ފުރަތަމަ މެޗު ކުޅެން ހަމަޖެހިފައިވަނީ 11 ޖޫން 2026 ގައެވެ.
