ސައުދީ އަރަބިޔާގެ ވެރިރަށް ރިޔާދުގެ ކިންގް ހާލިދު އިންޓަނޭޝަނަލް އެއާޕޯޓަށް ޔަމަނުގެ ހޫޘީ ހަނގުރާމަވެރިން ދިން ހަމަލާއެއްގައި 12 މީހުން މަރުވެ، 300 އަށްވުރެ ގިނަ މީހުން ޒަހަމްވެފައިވާ ކަމަށް ސައުދީ ރަސްމީ އިދާރާތަކުން ހާމަކޮށްފިއެވެ.
ސައުދީ ސިވިލް އޭވިއޭޝަން އޮތޯރިޓީން (ޖީސީއޭ) ހާމަކޮށްފައިވާގޮތުގައި، މި ހަމަލާގައި މަރުވި މީހުންގެ ތެރޭގައި ހިމެނެނީ ސައުދީ އަރަބިއްޔާގެ 4 ރައްޔިތުންނާއި، ބަންގްލަދޭޝްގެ 2 މީހުންގެ އިތުރުން އެމެރިކާ، އުރުދުން، ފަލަސްތީން، ސީރިޔާ، ސޫދާން އަދި މިސްރުގެ ކޮންމެ ގައުމަކުން 1 މީހެކެވެ. މީގެ އިތުރުން މި ހަމަލާގައި 309 މީހުން ޒަހަމްވެފައިވާއިރު، އޭގެ ތެރެއިން ބައެއް މީހުންގެ ހާލު ވަރަށް ސީރިއަސް ކަމަށް ރިޕޯޓުތައް ބުނެއެވެ.
މި ހަމަލާއާ ގުޅިގެން އެއާޕޯޓުގެ ހިދުމަތްތައް ވަގުތީގޮތުން މެދުކަނޑާލާފައިވާއިރު، ސައުދީ އިސްވެ އޮވެ ޔަމަނުގައި ހަރަކާތްތެރިވާ ކޯލިޝަނުންވަނީ މި ހަމަލާއަކީ ބައިނަލްއަގްވާމީ ގާނޫނާ ހިލާފު، ޖަރީމާއެއްގެ ގޮތުގައި ސިފަކޮށްފައެވެ. އަދި މިއީ ސަރަހައްދީ ސަލާމަތަށް ކުރިމަތިވި ސީދާ ނުރައްކަލެއް ކަމަށް ބުނެ ގަތަރު، މިސްރު، އުރުދުން އަދި އޮމާން ފަދަ ގައުމުތަކުންވެސް ވަނީ މި ހަމަލާ ކުށްވެރިކޮށްފައެވެ.
މި ހާދިސާއާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ބުނީ މިއީ ބަލައިގަނެވޭނެ ވަރަށްވުރެ ނުރައްކާތެރި ކަމެއް ކަމަށާއި، ހޫޘީންނާ ދެކޮޅަށް ސައުދީން ކުރާ މަސައްކަތުގައި އެމެރިކާއިން ބައިވެރިވުމާމެދު ވިސްނަމުންދާ ކަމަށެވެ. އަދި އެމެރިކާ، އިނގިރޭސިވިލާތް އަދި ކެނެޑާ ފަދަ ގައުމުތަކުންވަނީ އެ ގައުމުތަކުގެ ރައްޔިތުން ރިޔާދު އެއާޕޯޓު ސަރަހައްދަށް ދިޔުން މަނާކޮށް، ރައްކާތެރިވުމުގެ އެޑްވައިޒަރީތައް ނެރެފައެވެ.
މީގެ އިތުރުން މިހަމަލާ އާއި ގުޅިގެން ކުވެއިތު އެއާވޭސް، އެއާ އިންޑިއާ، ފްލައިދުބާއީ، ލުފްތަންސާ އަދި ޕާކިސްތާން އިންޓަނޭޝަނަލް އެއާލައިންސް ފަދަ އެއާލައިންތަކުން ވަނީ ރިޔާޒަށާއި ސައުދީގެ އެހެން އެއާޕޯޓުތަކަށް ކުރާ ދަތުރުތައް ވަގުތީގޮތުން މެދުކަނޑާލާފައެވެ. ހޫޘީން ވަނީ ދުނިޔޭގެ އެއާލައިންތަކަށް ސައުދީގެ ވައިގެ ސަރަޙައްދު ބޭނުންކުރުމާ ދެކޮޅަށް އެންމެ ފަހުގެ އިންޒާރު ދީފައެވެ. އަދި ޔޫރަޕިއަން ޔޫނިއަން އޭވިއޭޝަން ސޭފްޓީ އެޖެންސީން ވެސް ވަނީ ސައޫދީގެ ވައިގެ ސަރަޙައްދު ބޭނުންކުރުމުގައި މަދަނީ މަތިންދާބޯޓުތަކަށް ނުރައްކާ އޮތް ކަމަށް ބުނެފައެވެ.
ހޫޘީ ހަނގުރާމަވެރިންނާ ދެކޮޅަށް ސައުދީ އިސްވެ އޮންނަ ކޯލިޝަނުން ފަށާފައިވާ އަސްކަރީ އޮޕަރޭޝަނާ ގުޅިގެން، ރިޔާޒަށް ދެމުންގެންދާ ހަމަލާތައް އިތުރުވެފައިވާއިރު މީގެ ދެ ދުވަސް ކުރިން އެއާޕޯޓަށް ދިން ހަމަލާއެއްގައި ޕައިލެޓަކާއެކު ސައޫދީގެ ތިން ރައްޔިތުންވަނީ މަރުވެފައެވެ.
